ބަރުބާދުވީ ލޯބީގެ ދުނިޔެ (6)
ތާނަކުރީ: މުޙަންމަދު ޝާހިދު ޙަލީމް (1987) 3 ސެޕްޓެމްބަރު (ހުކުރު) އާ ގުޅޭ
އަނެއް ދުވަހު ޑަކުޓަރު އަތުވެއްޖެއެވެ. ތަފާތު ދެތިން ހަތަރު ވާހަކައަކަށް ފަހު ވަރަށް އިތުބާރު ހުރި ރާގެއްގައި ބުންޏެވެ."އަހަރެން ފަރީއާ އިންނަން ވިސްނާތާ އެތައް ދުވަހެއް ވެއްޖެ."
"ކީއްވެގެން--؟" ހައިރާންވެގެން ފަރީ ސިހިއްޖެއެވެ.
"ހަމަ އެހެންވެގެން-- އަހަންނަށް ރަނގަޅުވީ ފުރަތަމަ އަންހެންކުއްޖަކީ ފަރީ. ނޫނީ އަހަންނަށް ފަރީ ދެކެ ލޯބިވެވެން ފެށީ ކަން ނޭނގެ."
"ލޯބި--" ފަރީ ނަފުރަތާ އެކު އަނގަހަދައިލިއެވެ. "ފިރިހެނުންގެ ކުރިމަތީގައި ލޯތްބަކީ އެއްވެސް ޖަޒުބާތެއް ނޫން. ދެން އޮތީ ކައިވެނި. އަޅުގަނޑަށް މި ދުނިޔެއަކު އެއްވެސް ފިރިހެނަކު ނެތް."
"ފަރީ ހާދާ މޮޅޭ. ފިރިހެނުންނަށް ތިހާ ބޮޑު ތައުހީނެއް ތި ކުރީޔޯ؟"
"ޑަކުޓަރު އެއަށް ތައުހީނޭ ކިޔުއްވާ. އަޅުގަނޑު ކިބައިގައި އެ ޖަޒުބާތެއް ނެތް. އަޅުގަނޑަކީ ފިނި ގަނޑުފެންބުރިއެއް. ފުރާނަ ހުރިއްޔާ ޖެހޭނީ ދިރިއުޅެން. އެކަމަކު އަޅުގަނޑުގެ ކިބައިގައި ދިރިއުޅުމުގެ ހޫނުކަމާއި ޖަޒުބާތުގެ ހޫނުކަމެއް ނެތް. އެއްވެސް މީހަކު ފުރާނަ ނެތް މަސްގަނޑަކާ ކައިވެނިކުރާކަށް ނުރުހޭނެ."
"ފަރީޔާ ބެހޭ ގޮތުން ކަންތައްތައް ތި ނިންމަނީ ޚުދު ފަރީ އަމިއްލައަށް. އަހަރެން ފަރީގެ ކިބައިގައި ދިރުމާއި، ހޫނުކަމާއި ޖަޒުބާތު އުފައްދާނަން."
"ވާނެ ކަމެއް ނޫން. ޑަކުޓަރު ސާހިބު. އެއީ ސިކުނޑީގެ ގޮތުން އުފެދޭކަމެއް. އަޅުގަނޑުގެ ސިކުނޑި ޑަކުޓަރު ގަބޫލުނުކުރާ އިރު މަސައްކަތް ކުރުން އެއީ ބޭކާރު ކަމެއް."
"ކީއްވެގެން؟ ފަރީގެ ސިކުނޑި އަހަރެން ގަބޫލު ނުކުރަނީ ކީއްވެގެން. އަހަންނަށް އެހާ ދުވަސްވީތަ؟ -- އަހަންނާ ދިމާއަށް ބަލައިލާފަ ބުނެބަލަ."
ފަރީ ހީނލިއެވެ. "އަމިއްލަ ނަފުސުގެ މައްޗަށް ޑަކުޓަރު ވަރަށް ފަޚުރުވެރިވެލައްވާނެ ކަން ނޭނގެ. އެކަމަކު--"
"އެކަމަކު ކިހިނެއްވީ؟"
"ރީތި ފިރިހެނުން ދެކެ އަޅުގަނޑު އަބަދުވެސް ނަފުރަތުވަން. ކުރިން ވެސް އަޅުގަނޑު ނަންގަތިން ކަން ނޭނގެ."
"ނޫން ފަރީ! ފަރީ ތި ހުރީ ވަރަށް ބޮޑު ކުށްހީއެއްގަ. ފިރިހެނަކު ރީއްޗަސް ހުތުރަސް އޭނަގެ ސިކުނޑިއާ ފިކުރުކުރާގޮތް އެއްގޮތް ނަމަ އެއްވެސް ތަފާތެއް ނެތް. ރީތި ފިރިހެނުން އެ މީހުންގެ ހުތުރު އަނބިން ދެކެ މިސާލެއް ނެތް ފަދަ ލޯބިވީ ކަމާ، ސިފަ ހުތުރު އެތަކެއް ފިރިހެނުން އެ މީހުންގެ ރީތި އަނބިން އަންދާ މަރަމުން ގެންދާކަމުގެ ކިތަންމެ މިސާލެއް މި ދުނިޔެއިން ލިބެން އެބަ ހުރި. އެ ހުރިހާ ކަމަކީ ވެސް ތިމާގެ ތަރުބިއްޔަތާ ވިސްނުން ހުންނަ ގޮތުގެ ނަތީޖާ. އަހަންނަކީ ބޭރުފުށުގެ ވައްތަރަށް ލޯބިކުރާ މީހެއްތަ؟ ނޫނީ އަހަންނަށް ރަނގަޅު އަންހެންކުއްޖަކު ނުލިބޭނީތަ؟"
"ސާހިބާއަށް މި ރަށުގައި އިން އެންމެ ރީތި އަންހެންކުއްޖާއާ ކައިވެނި ކުރެއްވިދާނެ. ވީއިރު އަޅުގަނޑު ފަކީރުގެ މައްޗަށް އޯގާވެރިކަމުގެ ނަޒަރަކުން ތިޔަ ބައްލަވަނީ ކީއް ކުރައްވަން؟ އޯގާވެރިކަމުގެ ޖަޒުބާތު ދެކެ ވެސް އަޅުގަނޑު ނަފުރަތުވަން. މީހެއްގެ ހިތުގަ އަޅުގަނޑާ މެދު ރަޙުމް އުފެދިގެން އަޅުގަނޑާ ކައިވެނިކުރުން އެއީ އަޅުގަނޑު ރުހޭ ކަމެއް ނޫން."
"ފަރީއާ މެދު ހިތުގަ ރަޙުމް އުފައްދާކަށް ކޮންމެހެން އަހަރެން ބޭނުމެއް ނޫން. އެ މީހުނާ މެދު އަހަރެންގެ ހިތުގަ ރަޙުމް އުފައްދާނެ އެހެން މީހުން މި ދުނިޔޭގަ މަދުތަ؟ އަހަރެންގެ ޚިޔާލުގަ އަހަރެން ކަހަލަ އިންސާނެއްގެ ވަރަށް ރަނގަޅު އަތްނބަކަށް ފަރީއަށް ވެވިދާނެ. އަނިޔާއެއް ލިބިފަވާ އަންހެންކުއްޖަކީ އަގުބޮޑު މުތީއަކަށް ވޭ.-- އަހަންނަށް ފަރީގެ އަގަކީ ކޮބައިކަމެއް ފަރީއަކަށް ނޭނގޭނެ."
" ޑަކުޓަރު ތިޔަ ކިޔުއްވަނީ ކީކޭ ކަމެއް ނޭނގެ. އަޅުގަނޑު މި ވަނީ ވިސްނާ ފިކުރުކުރުމުގެ ހުރިހާ ހައްދެއް ފަހަނަޅާފަ. ކައިވެނީގެ ބަސް އަޅުގަނޑުގެ ބަސްފޮތުން ވަނީ ގެއްލިފަ-- އަޅުގަނޑު ޑަކުޓަރަކާ އެއްގޮތަކަށް ވެސް ކައިވެންޏެއް ނުކުރާނަން. ފަހަރެއްގަ ވެސް ނުކުރާނަން."
"އެއްވެސް ކަމެއް ނޫން. އަހަރެން ފަރީއަށް އަދި ދަނޑިވަޅު ދޭނަން. ފަރީ ހޭލައްވާލާނަން. އަދި ރުއްސާނަން. އިންތިޒާރުކުރާކަށް އަހަރެން ކަންބޮޑެއް ނުވޭ."
ޑަކުޓަރު ހިނގައްޖެއެވެ. މުޅި އެ ދުވަހު ފަރީ ހުރީ އުދާސްވެފައެވެ. އެ އުދާސްކަން އަނެއް ދުވަހު ވެސް އޭނާގެ ކަރުގެ ހާރަށް ވެފައި ވިއެވެ... މި ދިރިއުޅުން ވޭތިވާނީ ކިހިނެއް ހެއްޔެވެ. ނޭނގޭ ހިތާމަތައް އޭނާގެ ފަސްބަޔަށް އެޅެނީއެވެ. ދިރިއުޅުން ވީރާނާވެފައި ވާ ކަމަށް ފެންނަ ވަރުން، މަސަލަސްކޮށްގެން ދިރިއުޅުން ވޭއްޗެއް ނުކުރެވޭނެކަމުގައި މިއަދު އަނެއްކާވެސް އޭނާއަށް އިޙްސާސްކުރެވެން ފަށައިފިއެވެ. ފުރަތަމަ ފަހަރު ދެރަވުމުން ދެވަނަ ފަހަރަށް ދަނޑަށް ނުކުންނާން އެކަށީގެންނުވާ ވަރު ވެފައިވާ ކުޅުންތެރިއެކޭ އޭނާއެކޭ އެއްގޮތެވެ. އޭނާގެ ފުރަތަމަ ދެރަވުން އެންމެ ފަހުގެ ދެރަވުމަށް ވެއްޖެއެވެ. އޭނާ ހެދުން ބަދަލެއް ނުކުރެއެވެ. ބޯއޮމާނެއް ނުމެ ކުރޭ މެއެވެ.
އޭނާ އެމް.އޭ.ގެ އިމްތިޙާނަށް ތައްޔާރުވާން ޑަކުޓަރު ޖާދޫ އޭނާއަށް މަޝްވަރާދިންތާ ދުވަސްކޮޅެއް ވެއްޖެއެވެ. އެމް.އޭ ނަގާން ވީ ވެސް ނަފުސިއްޔާތުގެ ރޮނގުންނެވެ. ޑަކުޓަރު ނަފުސިއްޔާތާ ބެހޭ އަދަދެއް ނެތް ހައި ގިނަ ފޮތް ގެނެސް ފުނިޖަހައިދިނެވެ. އަދި ނުވިސްނޭ ތަންތަން ފާހަގަކޮށްފައި ބަހައްޓާން ބުންޏެވެ. އެއީ ޑަކުޓަރު އެ ތަންތަން ވިސްނައި ދިނުމަށެވެ.
އެ ވަގުތު އޭނާ އިނީ ބޮޑުކޮޓަރީގެ ދޫލަމަތީގައި އިށީނދެގެން ފޮތްތައް ފުށުން ޖަހަޖަހައިފައި ބަލާށެވެ. އޭނާގެ ހިތަށް އަރައެވެ. ހިތް ނުތަނަސްވެފައިވާ ވަގުތެއްގައި އެއްވެސް ލިޔުމަކުން، އެއްެވެސް ފޮތަކުން، އެއްވެސް އެއްޗަކުން ހަމަޖެހުމެއް ނުލިބޭނެއެވެ. ހަމަޖެހުން އޮތީ ކޮން ތަނެއްގައި ހެއްޔެވެ؟
އެ ވަގުތު ބޭރުން ރަނގަބީލު ޖަހައިލައިފިއެވެ. ދަރިފުޅުގެ އާޔާ އައިސް، އޭނާއާ ބައްދަލުކުރާން މީހަކު އައިސް ހުރި ވާހަކަ ބުނެފިއެވެ. އޭނާ އެ އިން ގޮތަށް ދޫލަމަތީގައި ކުޑަކަކޫޖަހައިގެން އިނދެފައި އާޔާ ގާތު ބުންޏެވެ. އޭނާ އެތެރެއަށް ފޮނުވާށެވެ. ދުނިޔޭގެ އެއްވެސް އާދަކާދައަކާ މެދު އޭނާގެ ކުޑަވެސް ފަރުވާލެއް ނެތީ ކަހަލައެވެ. އޭނާ އަނެއްކާ ވެސް ބޯ ފޮތެއްގެ ގަނޑުއުކުމަށް ގެއްލިއްޖެއެވެ. އޭނާގެ ސަމާލުކަން އެ ކަމުން ކެނޑުނީ ދޮރުމަތިން ހިޔަންޏެއް ވީމައެވެ. އިސްއުފުލައިލައިފައި ބަލައިލިއެވެ.-- ދެން އޭނާ ބޭރަށް ލީ ނޭވާ ބޭރުގައި އެތެރެއަށް ލީ ނޭވާ އެތެރޭގައި ހަރުލައްޖެއެވެ.
"ޖަމާލު -- ޖަމާލު -- ޖަމާލު"
އޭނާގެ އެތެރެހަށިން އަލިފާންރޯޅި އުފުލެން ފަށައިފިއެވެ. ނޭވާއަށް އޭނާގެ އިޚުތިޔާރެއް ނުފޯރުވުނެވެ. ކުލައޮއްސިއްޖެއެވެ. ހައިރާންވެގެން ލޯބޮޑުކޮށްފައި އެ އައި މީހާއާ ދިމާއަށް ބަލަން ފަށައިފިއެވެ. އޭނާއަށް އެ މީހަކު ނޭނގުނު ކަހަލައެވެ. ނޫނީ ނުދަންނަ ކަހަލަ އެވެ. ނޫނީ މީގެ ކުރިން ދުވަހަކު ވެސް ނުދެކޭ ކަހަލަ އެވެ. ދުށް ނަމަ ދުށީ ކޮން ތަނަކުން ކޮން އިރަކު ބާވައެވެ؟
އަތްމަތި ހުސްވެފައިވާ ޖުވާ ކުޅޭ މީހެއް ހެން އެހެރީ ކާކު ހެއްޔެވެ؟ ކާކު ހެއްޔެވެ؟ -- ކާކު ހެއްޔެވެ؟ -- ކާކު ހެއްޔެވެ؟
އޭނާގެ ހިތާއި ހަށިގަނޑުގެ ހުރިހައި ދޮރަކާއި ކުޑަދޮރެއް ހުޅުވެން ފަށައިފިއެވެ. ކަލެއަކީ ކާކު ހެއްޔެވެ؟ -- ކަލެއަކީ ކާކު ހެއްޔެވެ؟ -- ކަލެއަކީ ކާކު ހެއްޔެވެ؟
އޭނާގެ ކޮންމެ ބަލައިލުމެއްގައި އޮޅުންފިލުވުމާއި ބީރައްޓެހިކަމުގެ ބައްތި ދިއްލިއްޖެއެވެ. އެއީ ކާކު ހެއްޔެވެ؟ އެއް އިރެއްގައި އަމިއްލަ މީހެކެވެ. މިހާރު އެއްވެސް މީހެއް ނޫނެވެ.
އެއީ ހިޔަންޏެއް ހެއްޔެވެ؟ ހީކުރެވޭ ގޮތެއް ހެއްޔެވެ؟ ނުވަތަ ހުވަފެނެއް ހެއްޔެވެ؟
އެއީ ކުރީގެ ޙަޔާތެއް ހެއްޔެވެ؟ ފާއިތުވީރޭގެ ރީތި ހުވަފެނެއް ހެއްޔެވެ؟ ނުވަތަ އޮއްސެމުންދާ އިރުގެ ހިޔަނި ހެއްޔެވެ؟ އެ މީހާ ހަމަހިމޭނުން ދޮރުމަތީގައި ހުއްޓެވެ. ފަރީ އޭނާއާ ދިމާއަށް ބަލަމުން ގެންދާ ގޮތަށް އޭނާ ވެސް ފަރީއާ ދިމާއަށް ބަލަމުން ގެންދަނީއެވެ. ދެން އެ ދެ މީހުންނަށް ކުއްލިއަކަށް އާޔާ ހުރިކަން އިޙްސާސް ކުރެވިއްޖެއެވެ. އޭރު އާޔާ ތިންވަނަ ފަހަރަށް ޖަމާލު ގާތު އިށީންނާން ބުނަނީއެވެ. ޖަމާލު ބަލިވެފައިވާ ހިނގުމެއްގައި އައިސް ފަރީ ކުޑަކަކޫ ޖަހައިގެން، ބުދެއް ހެން އިން ހިސާބުގައި ސޯފާއެއްގައި އިށީނދެއްޖެއެވެ. މަރުވެފައިވާ އަޑަކުން އޭނާ ބުންޏެވެ. "މި އައީ މޯނާ ދެކެލަން."
ދެން ފަރީ ހަނދާންވެއްޖެއެވެ. ވަރިކުރި އިރު ހަމަޖައްސައިފައި އޮތީ މޯނާ މަންމަ ގާތުގައި ބެހެއްޓުމަށެވެ. ޖަމާލު އޭނާއަށް ޚަރަދުދިނުމަށާއި ބޭނުން ވަގުތަކު އައިސް އޭނާޔާ ބައްދަލު ކުރުމަށެވެ.
"ވީ އިރު މީނާ ... މީނާ މި އައީ އެ ކަމާތާ." ފަރީގެ އިޙްސާސްތައް އެނބުރި އަންނަން ފަށައިފިއެވެ.
"އާޔާ! މޯނާ ގެނޭ." ފަރީ ވަކި އަސަރެއް ނެތް ރާގެއްގައި ބުންޏެވެ.
"އަޅުގަނޑު މޯނާ ނިންދަވައިފައި މި އައީ ހަމަ ދެންމެ." ފަރީ އެއްޗެކޭ ބުނުމުގެ ކުރިން އާޔާ އަވަހަށް ބުންޏެވެ.
"ރޭ ހަތަރުދަމު ބޭބީ އުޅުނީ ބަނޑަށް ތަދުވާތީ. އެ ކަމާ ހުރެ އޭނާއަށް ރޭގައި ނުވެސް ނިދޭ. މިހާރު މި އައީ ޑަކުޓަރު ދިން ބޭސްދީފައި ނިންދަވައިފައި. މި ވަގުތު ބޭބީ ހޭލެއްވުން ރަނގަޅުވާނެތޯ!" ފަރީ އަދި ވަކިގޮތެއް ނުނިންމިގެން އުޅެނިކޮށް ޖަމާލު ކޮޅަށް ތެދުވެއްޖެއެވެ.
"އެއްވެސް ކަމެއް ނޫން. އޭނާ ނިދިޔަދީ. މާދަމާ މިހާ އިރު އަލުން އަންނާނަން." އޭނާ ދިޔުމުގެ ކުރިން އުދާސް ނަޒަރަކުން ފަރީއަށް ބަލައިލިއެވެ. އޭނާ ދިޔުމުގެ ކުރިން ހިތާމައިގެ ނަޒަރަކުން ފަރީއަށް ބަލައިލިއެވެ. ފަރީ ނުރުހިފައި އިން ރާނީއަކަށް ވެެގެން އިނެވެ. ފަރީ އިސްޖަހައިލިއެވެ. ބަދަލުހިފުމުގެ ކޮންމެވެސް ޖަޒުބާތެއް އޭނާގެ ހިތުގައި އުތުރިގަތީކަން ނޭނގެއެވެ. އޭނާ މޫނު ހަރުކަށިކޮށްލިއެވެ. ބީރައްޓެހިކޮށްލިއެވެ. ޖަމާލަށް އެއްޗެކޭ ބުނާކަށް ނުކެރުނެވެ. މަރުވެފައިވާ ފިޔަވަޅުތަކެއްގައި ބޭރަށް ނުކުމެއްޖެއެވެ. ދުރަށް އަޅަމުން ދިޔަ އެ މާޔޫސް ފިޔަވަޅުތަކަށާއި ހިތްހަލާކުވެފައި ވާ އެ މީހާ އަށް ބަލާން ފަރީ އިނެވެ. ނުފެންނަ ހިސާބަށް ދަންދެނެވެ. މިއީ އެ ޖަމާލެއް ނޫނެވެ. ރީތި، ނަލަ، ބޮޑާ ޖަމާލެއް ނޫނެވެ. ދާވެފައި ވާ ކުރުތާއަކާއި ހަރުވާޅެކެވެ. ތުނބުޅި ދިގުވެފައެވެ. މީހާ އަނދައިފައެވެ. މޫނުމަތީގެ އުޖާލާކަން ގެއްލިފައެވެ. -- އޭނާއަށް ކިހިނެއް ވީ ބާއެވެ؟ ބަލިވެއުޅުނީ ބާއެވެ؟ ނޫނީ -- ނޫނީ -- ފަރީ އުފާވާް ފަށައިފިއެވެ. އޭނާ ބަރުބާދުކޮށްލުމަށް ފަހު ޚުދު ޖަމާލު ވެސް ބަރުބާދުވީތީއެވެ. ދުވަސް ދިޔައީތީއެވެ. އެ ވީ ރަނގަޅަށެވެ. އެ ކަހަލަ ކިބުރުވެރި ފިރިހެނުންނަށް ވާންވީ ހަމަ އެހެންނެވެ. އެކަމަކު މި އުފަލަކީ ވެސް ދާއިމީ އުފަލަކަށް ނުވިއެވެ. ކުޑަ އިރުކޮޅެއްގެ ފަހުން އޭނާ ނުތަނަވަސް ވެއްޖެއެވެ. އޭނާއަށް ހީވަނީ ހިތަށް ކަށްޓެއް ހެރިފައި ހުންނަހެންނެވެ. ކަރުބުޑުގައި އެއްޗެއް ތާށިވެފައި ހުންނަ ހެންނެވެ. އެހެން ވީ އިރު އޭނާ ވެސް އެހެރީ އަހަރެންނެކޭ އެއްފަދައިން ހިތްދަތިވެފައެވެ. ނުތަނަވަސްވެފައެވެ. ކަންބޮޑުވެފައެވެ. ލަދުގެން ދެރަވެފައެވެ. -- އޭނާގެ ގައިގައި ކިހައި ބޮޑަކަށް ކުޅިފަސް ގެއްލިފަި ހުރި ފާޑު ޖަހާ ހެއްޔެވެ! އޭނާގެ ގާތުގައި ފެންފޮދެއް ބޭނުންތޯ ވެސް އަހައި ނުލީ އެއީ އަޚުލާޤުގެ ކޮން ބާބެއް ހެއްޔެވެ! އެންމެ ރަނގަޅެވެ. ޖަމާލަކީ ފަރީގެ ދުޝްމިނެކެވެ. އެކަމަމު މިއަދު ދެރަވުން ގަބޫލުކޮށްގެން އޭނާގެ ދޮރޯށިދޮށަށް އަތުވެއްޖެއެވެ. ދަރިފުޅުގެ ލޯބިން މަޖުބޫރުވެގެން ނަމަވެސް އެންމެ ރަނގަޅެވެ. ގެއަށް އައި އިންސާނަކާ މެދު މިހައި އަޚުލާޤެއް ނެތް ގޮތަކަށް ކަންތައް ކޮށްގެން ނުވާނެއެވެ. އަނެއްކާ ޖަމާލަކީ އެއް ދުވަސްވަރެއްގައި އޭނާގެ ޙަޔާތުގެ ބައިވެރިޔާއެވެ. މަންޒިލަށް ދެވުމުގެ ކުރިން މަގު ދެ ކަފި ވީ ނަމަވެސް ވާނީ ކީއްހެއްޔެވެ؟
އެ ކަމާ ދެރަވެވުމާ އެކު އޭނާ ގާތަށް ރުޅިއަންނާން ފަށައިފިއެވެ. ހަމަހިމޭނުން ހައިރާންވެފައި ހުރި އާޔާއާ ދިމާއަށް އޭނާ އެއްޗެހިގޮވައިގެންފިއެވެ. އާޔާ އޭރު ވެސް ހުރީ އެ ނުދަންނަ މީހާގެ ސިއްރުން ފުރިފައިވާ އައުމާ މެދު ފިކުރުކުރާށެވެ. އެ އާޔާއަކީ އޭނާ މަންމަގެ ގެއަށް އައުމަށް ފަހު ހޯދި އާޔާއެކެވެ. އެހެންކަމުން އޭނާ މޯނާގެ ބައްޕައެއް ނުދެކެއެވެ. ފަރީ އޭނާއާ ދިމާއަށް، ގެއަށް އައި މެހުމާނު ގާތު ސައިބޮއިގެން ދާން މަޑުކުރާން ނުބުނާހައި އޭނާގެ ގޮތެއް ނެތޭ ކިޔައިގެން އެއްޗެހި ގޮވައިގަތުމުން ވީ ގޮތް ހިސާބަކަށް އޭނާ އަށް ވިސްނުނެވެ.
* * *
އަނެއް ދުވަހެވެ. އޭނާ ޖަމާލަކަށް އިންތިޒާރެއް ނުކުރެއެވެ. އިންތިޒާރުކުރާން ވީ ވެސް ކީއްވެގެން ހެއްޔެވެ. މިހާރު އިންތިޒާރުކުރުމަކީ ބޭކާރު ކަމެކެވެ. އެހެންނަމަވެސް ނުތަނަވަސްކަމެއް ހުރިހައި ވަގުތެއްގައި ވެސް އޭނާ ވަށައިލައިފައި ވިއެވެ. ބާރަޖަހަން ކައިރި ވީ އިރު އޭނާއަށް ހަމަނުޖެހޭ ގޮތް ވެރިވާން ފަށައިފިއެވެ. ސާފު ތާހިރު ހެދުމެއް ލައިގެން އިންނާން، ބައެއް ފަހަރު ހިތަށްއަރައެވެ. ދެން ބުނެއެވެ. އަހަންނަކާ ކޮން ކަމެއް ހެއްޔެވެ! -- މި ގޮތަށް ރީތިނުވެ އިންދައި ފެނުނީމާ އަހަރެން ވެސް ހިތާމަކުރަނީއެކޭ އޭނާގެ ހިތަކަށްނާރާނެ ބާއެވެ؟ އެކަމަކު ތައްޔާރުވެގެން އިނދެއްޖެއްޔާ އަހަރެން އިންނަނީ ވަރަށް އުފަލުންނޭ ހިއެއް ނުކުރާނެ ބާއެވެ؟ އެކަމަކު އަހަރެން އޭނާގެ ކުރިމައްޗަށް ދިޔުމުގެ ބޭނުމަކީ ކޮބައިހެއްޔެވެ؟
ކޮންމެއަކަސް ގަޑިޖެހުމުގެ ކުރިން އޭނާ ދަރިފުޅު ރަނގަޅަށް ނަލަހައްދައިފިއެވެ. އަދި އެ ދަރިފުޅުގެ ވިސްނުން، ބައްޕައާ ބައްދަލުކުރާން ތައްޔާރު ވެސް ކޮށްފިމެއެވެ. ދެން ޚުދު އޭނާ، އިންނަ ހިތް ނެތުމާ އެކުގައި ވެސް ބޮޑުކޮޓަރީގައި އެ ތަނުގައި އިށީނދެއްޖެއެވެ. ރަނގަބީލުގެ އަޑުއިވުމުން، އާޔާއަށް އެންގިފައި ވާ ގޮތުގެ މަތިން އާޔާ މޯނާ ގޮވައިގެން ބޭރަށް ނުކުމެއްޖެއެވެ. އެކަމަކު ކުޑަ އިރުކޮޅެއްގެ ފަހުން ޖަމާލު ދަރިފުޅު އުރައިލައިގެން ބޮޑުކޮޓަރިއަށް ވަދެއްޖެއެވެ.
މިއަދު ޖަމާލުގެ ސިފަ ލައްކަ ރަނގަޅެވެ. ތުނބުޅި ހުރީ ބާލައިފައެވެ. ހެދުން ވެސް ސާފުތާހިރެވެ. އެކަމަކު ވަރަށް ބަލި، ރީނދޫ ފާޑު ޖަހައެވެ. އާޔާ ސައި ގެންނާން ބަދިގެއާ ދިމާއަށް ދުވެފައި ހިނގައްޖެއެވެ. އެ ދެ މީހުން ބޮޑުކޮޓަރިތެރޭގައި އެކަނި ވެއްޖެއެވެ. ޖަމާލު އޭނާއާ ދިމާއަށް ބަލާ ކަމެއް ނުވަތަ ނޫން ކަމެއް ދެނެވޮޑިގެންވާނީ މަތްރަސްކަލާނގެއެވެ. ފަރީ ކަޅިއުފުލައި ވެސް ނުލައެވެ. ފޮތަކަށް ކަޅި ހުއްޓައިލައިގެން އިށީނދެގެން އިނެވެ. ދެބަފައިން ވަރަށް ގިނަ ވާހަކަ ދައްކަމުން ގެންދެއެވެ. ދެން މޯނާ އެތައް ބައިވަރު ކުޅޭ އެއްޗެއްސެއް ނަގަނަގައިފައި ފަރީއަށް ދައްކާން ފަށައިފިއެވެ.
"މަންމާ ބައްލަވަ! ބައްޕަ އަޅުގަނޑަށް ވަރަށް ގިނަ އެއްޗެހި ގެނެސްދެއްވައިފި." ދަރިފުޅުގެ އުފަލަށް ޓަކައި ފަރީ އެ ހުރިހައި އެއްޗެއް ބެލިއެވެ. އެކަމަކު އޭނާ ބުނާން އޭނާގެ ހިތް އެދުނެވެ. މޮޔަ ކުއްޖާއެވެ! ކުޅޭ އެއްޗެހި ލިބުނީމާ ދަރިފުޅު ވެސް ހެއްލުނީއެވެ!
ދެން ތިން އަހަރު ބައި ވީ މޯނާއަށް އެ ވީ ކިހިނެއް ކަމެއް ނޭނގެއެވެ. ކުއްލިއަކަށް ބުނެފިއެވެ.
"ބައްޕާ! މަންމައަށް ގެނެސްދެއްވީ ކޮން އެއްޗެއްތޯ؟" ޖަމާލު ހިމޭންވެއްޖެއެވެ.
"ގެނެސްދެއްވިންތޯ؟ -- ނުގެންނަވަން؟" ޖަމާލު ހަމައެކަނި ބޯހަލުވައިލީއެވެ.
"ނުގެންނެވީ ކީއްވެގެން؟ ތިޔައީ ހަޑި ބައްޕައެއް!" މިހެން ބުނެފައި މޯނާ އަޑުންއަޑުނަގައި ރޯންފަށައިފިއެވެ. "ދުރުވޭ. އަޅުގަނޑަކީ ބައްޕަގެ ކުއްޖެއް ނޫން؛ މަންމަގެ ކުއްޖެއް!" އޭނާ ބޮޑާދައްކަދައްކައިފައި ރޯން ފަށައިފިއެވެ.
"ބައްޕައަށް މިއަދު މާފުކޮށްދީ... މާދަމާ ދަރިފުޅުގެ މަންމައަށް ބައިވަރު އެއްޗެހި ގެނެސްދޭނަން."
އެކަމަކު މޯނާ އޭނާގެ ބަސް ދުލެއް ނުކުރިއެވެ. އޭނާގެ ހުރިހައި ކުޅޭ އެއްޗެހި ނަގައިފައި ދުރަށް އުކައިލައިފިއެވެ. ދެން ބާރަށް ރޯންފަށައިފިއެވެ. ފަރީއާއި ޖަމާލާ ދެ މީހުން ވެގެން ފަހަރަކު މީހަކު ދަރިފުޅު މަސަލަސް ކުރެވޭތޯ ބަލާން ފަށައިފިއެވެ. އެކަމަކު އެ ދުވަހު އޭނާ ބޮޑާދައްކައި އެ ރެޅިފޮޅުނު ގޮތަށް، އެ ހައި ބޮޑަށް އޭގެ ކުރިން ދުވަހަކު ވެސް ބޮޑާ ދައްކައިފައެއް ނެތެވެ. އެ ދެ މީހުންނަށް އެއްގޮތަކަށް ވެސް އޭނާއެއް ނުހިފޭއްޓުނެވެ. އޭނާ މި ގޮތަށް އެ ފާޅުކުރަނީ އޭނާގެ ވިސްނުމުގައި ވާ ކޮން އެއްޗެއް ކަމެއް ނޭނގެއެވެ.
އެ ދެ މީހުން އޭނާ މަސަލަސްކުރާން އުޅުނު ނަމަވެސް އެކަކު އަނެކަކާ ވާހަކައެއް ނުދައްކައެވެ. ކުޑަ އިރުކޮޅެއްގެ ފަހުން ދަރިފުޅު އެ ކަމާ ބެހޭ ގޮތުން ސުވާލުކޮށްފި ނަމަ ވާނީ ކިހިނެއް ހެއްޔެވެ؟
ކޮން އިރެއްގެ މޮޅިއަކުން ކަމެއް ނޭނގެއެވެ. ފަރީގެ ލޮލުން ކަރުނައަތުވެއްޖެއެވެ. އެހައި ތަނުން އާޔާ ސައި ހިފައިގެން އަތުވެއްޖެއެވެ. ފަރީގެ ގައިގައި ފުރާނަ އެޅިއްޖެއެވެ. އޭނާ ދަރިފުޅު މަސަލަސްކުރާން އާޔާ ގާތުގައި ބުނެފައި އޭނާގެ ކޮޓަރިއަށް ހިނގައްޖެއެވެ. ހިތްހަމަޖެހެންދެން ރުއިމަށެވެ. ހިތުގައި ވާ އުދާސްތައް ބޭރުކޮށްލުމަށެވެ. އެކަމަކު އެއް ކަމަކާ ދޭތެރޭ އޭނާ އެއްގޮތަކަށް ވެސް ޚިޔާލެއް ނުކުރެއެވެ. އޭނާގެ ލޮލުން އޮހޮރޭ ކަރުނަތައް ޖަމާލު ވެސް ދުށްޓެވެ. -- ޖަމާލު ދިޔައީ ކޮން އިރަކު ކަމެއް، ދަރިފުޅު ހުއްޓައިލީ ކޮން ގޮތަކުން ކަމެއް އޭނާ ނުދެނަހުއްޓެވެ. ފަރީ ކޮޓަރިން ބޭރަށް ނުކުތީ ހަވީރު ހައެއް ޖެހިއިރެވެ. ޑަކުޓަރު ޖާދޫ ވެސް ވީ ތިން ދުވަހުގެ ދަތުރެއް ގައި އެހެން ރަށަކަށް ގޮހެވެ. އޭނާ ހިތުގެ ބުރަދަން ލުއިކޮށްލާނީ ވެސް ކާކުގެ ގާތަށް ގޮސްގެން ހެއްޔެވެ؟ އެހެންކަމުން ރޭގަނޑު ހަތަރުދަމު އޭނާ ކަރުނައިގެ މައްޗަށް ފުއްދައިލީ އެވެ. -- ބައެއް ފަހަރަށް ހަނދާންތަކުގެ މާ އެއކުރިއެވެ. އަނެއްބައި ފަހަރަށް އެ ހަނދާންތަކުގައި ހުޅުރޯކުރިއެވެ.
* * *
ރޭގަނޑު އެ އައި ތޫފާނުގައި ބޯކޮށް ވާރޭ ވެހުނެވެ. ހެނދުނު އޮތީ އުޑުމަތި ސާފުކޮށެވެ. ފަރީ އަނެއްކާ ވެސް ވަގުތާ އެއްބައި ވީ ކަހަލައެވެ. އެ ކަހަލަ ހިތްދަތި ހިތާމަވެރި ހިސާބު ހިސާބު ދިރިއުޅުމުގައި އެކި ފަހަރުމަތިން އަންނާނެ ކަމަށާއި އެ ކަމަށް ހުންނާން ވާނީ ތައްޔާރުވެގެންނޭ ހިތަށް އަރުވައިފައެވެ. ޖެހިގެން އައި ދުވަހު ނުހަނު ހަމަޖެހިގެން އޭނާ ކޮޓަރި ޒީނަތްތެރި ކުރިއެވެ. އޭނާގެ ކޮޓަރި ހުންނަނީ ބޮޑުކޮޓަރިއާ ގުޅިފައެވެ. ހުރިހައި ފޮތްތައް ތަރުތީބުކުރިއެވެ. ކޮންމެ ދުވަހަކު ބޭނުންކުރާ ހެދުންތައް ފަށްޖަހައިފައި ކޮނޑުތަކުގައި އެޅުވިއެވެ. މި މަސައްކަތުގައި އުޅެނިކޮށް އެގާރަޖަހައިފިއެވެ. އެއަށް ފަހު ފެންވަރައި ބޯއޮމާންކޮށްގެން، އަމިއްލައަށް ބަސްއަހާ ކުއްޖަކަށް ވެގެން، ފޮތްތައް ހުރި މޭޒު ކައިރީގައި ހުރި ގޮނޑިއެއްގައި އިށީނދެއްޖެއެވެ. ކުޑައިރުކޮޅެއްގެ ކުރިން އޭނާ ވީ މޯނާ ތައްޔާރުކުރުވައިފައި އާޔާއާ އެކު ބޭރަށް ފޮނުވައިފައެވެ. މިހާރު ގަސްދުކޮށްގެން އެ އުޅެނީ ގަވާއިދުން ކިޔެވުމުގެ މަސައްކަތް ފަށާށެވެ. އެ ގޮތަކީ މާދަމާ ޑަކުޓަރު ޖާދޫ އަންނާނެއެވެ. މި ތިން ދުވަހުގެ ރިޕޯޓު އޭނާއަށް ދޭން ޖެހޭނެއެވެ.
ހުރިހައި ފޮތެއް ބަލަބަލއިފައި އެންމެ ފަހުން އޭނާއަށް ރަނގަޅުވި ފޮތެއް ނަގައިފިއެވެ. އުނދަގޫ ތަންތަން ފާހަގަކުރުމަށް ރަތް ފަންސުރެއް ނަގައިފިއެވެ. އަދި ފޮޅުވަތްތަކުގެ ތެރެއަށް ގެއްލިއްޖެއެވެ. މިހާރު އޭނާއަށް ވެފައި އެ އިންނަނީ ކީއް ކަމެއް ނޭނގެއެވެ. އޭނާ މަސައްކަތެއް ފަށައިފިއްޔާ ވަށައގެން ހިނގާ އެއްވެސް ކަމެއްގެ ޚަބަރު ނޭނގޭ ވަރަށް އޭނާ އެ ކަމެއްގެ ތެރެއަށް ގެއްލެއެވެ. ނޫނީ އޭނާ ޚުދު އޭނާގެ ވުޖޫދު ހަނދާންނައްތައިލުމަށް އެ ކަމެއް އޭނާގެ މައްޗަށް ވެރިކުރުވަނީއެވެ. ކުއްލިއަކަށް އޭނާއަށް ކޮޓަރީގައި ފުރޭތައެއް އުޅޭ ކަހަލަ އިޙްސާސެއް ކުރެވިއްޖެއެވެ. ބިރުން ކަޅި އުފުލައިލައިފައި ބަލައިލުމުން އޭނާއަށް ވީ ކުއްލިއަކަށް ފުރޭތައެއް ފެނުމުން ހަމަ ވާނޭ ގޮތެވެ.
ދޮރުމަތީގައި ޖަމާލު ހުއްޓެވެ.
ހުރި ގޮތަށް ހުރި އާދޭހަކަށް ވެގެންނެވެ.
ފަރީއަށް ލިބުނު ހައިރާންކަމުގެ މައްޗަށް ބާރުފޯރުވުމާއެކު، ކުއްލިއަކަށް އޭނާ ގާތަށް ރުޅިއަތުވެއްޖެއެވެ. މިއީ ވެސް މީހުން ގޭގެއަށް ވަދެ އުޅޭ ގޮތް ހެއްޔެވެ. ރަނގަބީލު ޖެހުމެއް ނެތެވެ. އަޑެއް އިއްވައިލުމެއް ނެތެވެ. ބިރުން ގޮސް މީހަކު މަރުވިޔަސް ވަރިހަމައެވެ. އަނެއްކާ މި ހިތްވަރުގަދަ ކަލޭގެފާނު، އެއްވެސް ޖެހިލުމެއް ނެތި އައި ގޮތަށް އަހަރެންގެ ކޮޓަރިއަށް މި އައީ ކޮން ކަހަލަ ހައިސިއްޔަތަކުން ހެއްޔެވެ. ފަރީގެ މޫނުމަތީގައި ލިޔެވެމުން ފޮހެވެމުން ދިޔަ ހުރިހައި ލިޔުމެއް ޖަމާލު ކިއީ ކަން ނޭނގެއެވެ. އެހެންކަމުން ވަރަށް މަޑުމައިތިރިކަމާ އެކު ބުންޏެވެ.
"އަޅުގަނޑު ވަރަށް ގިނައިރު ވަންދެން ރަނގަބީލު ޖެހިން. އެއްވެސް މީހަކު ނުނުކުތް. އެކަމަކު ބޭރު ދޮރު ހުޅުވާފަ ހުރީމަ އެތެރެއަށް ވަނީ. އެތެރެއަށް ވަދެފަ ވެސް އާޔާއަށް ގޮވިން. އެއްވެސް ޖަވާބެއް ނުލިބުނީމަ މަޖުބޫރުން ކަލާގެ ކޮޓަރިއަށް ވަންނަން ޖެހުނީ."
އަޅުގަނޑު -- ކަލާގެ ކޮޓަރި -- ؟ މާތްކަލާކޯއެވެ. ކޮންފަދަ ދުރުކަމެއް ހެއްޔެވެ؟ ފަރީއަށް ތެޅިގަނެވުނެވެ. އޭނާގެ އެ ހަރުކަށިކަން ކޮބައިހެއްޔެވެ؟ މިއީ ކޮން ފަދަ ދުރުހިލޭ ކަމެއް ހެއްޔެވެ؟ -- ކޮންމެއަކަސް ޖަމާލުގެ މަޑުމައިތިރި ވާހަކަދެއްކުމުން ފަރީ ފިސްފިސް ވެއްޖެއެވެ. އެކަމަކު އެ ތަނުގައި އެ އިން ގޮތަށް އިނދެފައި ބުންޏެވެ.
"ހީވަނީ އާޔާ ވީ ދަރިފުޅު ގޮވައިގެން ގޮސް ޖެހިގެން ހުރި ގޭގައި ހެން. -- ބޮދުކޮޓަރީގައި އިށީންނަވާ. އަޅުގަނޑު އޭނާ ގެނުވާނަން." ޖަމާލު ކިޔަމަންތެރި ކުޑަކުއްޖެއް ހެން ބޭރަށް ނުކުތުމަށް އެނބުރިލިއެވެ. އެކަމަކު އެއްޗެއް ވިސްނައިލައިފައި ހުއްޓިއްޖެއެވެ. އޭނާ ފަރުވާތެރިކަމާ އެކު ފަރީގެ މޫނަށް ބަލައިލިއެވެ. ދެން އެ ތާނގައި އެ ހުރި ގޮތަށް ހުރެފައި ބުންޏެވެ. "މިއަދު މި އައީ މޯނާ ދެކޭކަށް ނޫން."
"ދެނޯ ...؟" ފަރީ އަޅައިލުމެއް ނެތި، ނިތްކުރިއަށް ރޫއަރުވައިލިއެވެ.
ޖަމާލު ބުންޏެވެ. "މިއަދު -- އަޅުގަނޑު މި އައީ ކަލާއާ ބައްދަލުކުރަން."
"އަޅުގަނޑާއޭ!" ހައިރާން ވީ ވަރުން ފަރީ ކޮޅަށް ތެދުވެއްޖެއެވެ.
ދެން އޭނާއަށް ފެނުނީ ވިދުވަރެއް ހައި ހަލުއިކަމާ އެކު ޖަމާލު ދުވެފައި އައި ތަނެވެ. އޭނާ އައި ގޮތަށް އައިސް ކޮޅަށް ހުރި ފަރީގެ ދެ ފައިގައި އޮޅުލައިގެންފިއެވެ. އަދި ކުޑަކުއްޖެއް ހެން ގިސްލަގިސްލައިފައި ރޯން ފަށައިފިއެވެ. މި ވެގެން އުޅެނީ ކީއް ކަމެއް ފަރީގެ ވިސްނުމަކަށް ނައެވެ. އޭނާގެ މުޅި ހަށިގަނޑު ތުރުތުރުއަޅާ ކަން އޭނާއަށް އިޙްސާސްކުރެވުނެވެ. އޭނާ ކޮޅަށް ހުރެއްޖެ ނަމަ ވެއްޓިދާނެތީ ގޮނޑީގައި އިށީނދެއްޖެއެވެ.
ޖަމާލު ކުޑަކުއްޖެއް ހެން އޭނާގެ ދެ ފައިގައި ބައްދައިގެން އިނދެ ރޮމުން ގެންދިޔައެވެ. ޖަމާލު އޭނާގެ ދެ ފައިގައި ބައްދައިފައި ހުރިލެއް ބާރު ކަމުން ފަރީ މަސައްކަތް ކުރި ނަމަވެސް ފޮޅުވައެއް ނުލެވުނީހެވެ. އެންމެ ފަހުން ޖަމާލު ކަރުނައިން ފޯވެފައި ވާ، އޭނާގެ މޫނު، މައްޗަށް އުފުލައިލައިފައި ބުންޏެވެ.
"ފަރީ! ތިޔަހާ ހަރުކަށި ވާން މަސައްކަތް ނުކުރޭ. މާތްރަސްކަލާނގެ ރަސްކަންފުޅަށް ޓަކާ ތިޔަހާ ބީރައްޓެހި ނުވޭ. މިހާރު އަހަރެމެންގެ ގުޅުމެއް ނެތް ކަން އެއީ ކަށަވަރު ކަމެއް. އެކަމަކު ރަނގަޅު ރަހުމަތްތެރީން ހެން އަހަރެމެންނަކަށް ބައްދަލެއް ނުކުރެވޭނެތަ؟"
(ނުނިމޭ)