ޑރ. މުޞްޠަފާ މަޙުމޫދު

ޢަބްދުލްމުޢީދު ޙަސަން


ޑރ. މުޞްޠަފާ މަޙުމޫދު ދުނިޔޭގެ އަލިކަން ދެކެވަޑައިގަތީ މިޞްރުގެ އަލްމުނޫފިއްޔާގައި، މީލާދީ ސަނަތުން 1921 ވަނަ އަހަރު އެވެ. ޔުނިވަރސިޓީގައި ތަޢުލީމު ޙާޞިލުކުރެއްވި ދާއިރާއަކީ މެޑިސިން އެވެ. އޭނާއަކީ މެޑިކަލް ޑަކުޓަރެކެވެ. އޭގެ އިތުރުން، އޭނާއަކީ، މުފައްކިރެކެވެ. ލިޔުންތެރިއެކެވެ. ފިލޯސަފަރެކެވެ. ލިޔުންތެރިކަމާއި ތަޙުޤީޤުކުރުމުގެ މަސައްކަތް އޭނާ ފަށްޓަވާފައިވަނީ، 1960 ގައެވެ.

ޑރ. މުޞްޠަފާ މަޙުމޫދު ކާވަނި ބައްލަވައިގަތީ، 1961 ވަނަ އަހަރުގަ އެވެ. ދެބޭފުޅުން ލިބިވަޑައިގަތް ފަހުން، 1973 ގައި އެ ކާވަނި ރޫޅުނެވެ. ލިބިވަޑައިގަތް ދެ ބޭފުޅުންނަކީ، އަމަލު އާއި އަދުހަމް އެވެ. ދެން 1983 ގައި އެހެން ބޭކަނބަލަކާ ކާވަނި ބައްލަވައިގަތެވެ. ނަމަވެސް 1987 ގައި މި ކާވަނި ވަނީ ރޫޅިފައެވެ. އެއަށްފަހު، އޭނާގެ ހުރިހައި ވަގުތެއް ހިބަކުރައްވާފައިވަނީ އިސްލާމްދީނަށް ޚިދުމަތްކުރެއްވުމަށެވެ.

ޑރ. މުޞްޠަފާ މަޙުމޫދު، މިދުނިޔެއާ ވަކިވެވަޑައިގަތީ ވަރަށް ބޮޑު ޢިލްމީ ތަރިކައެއް ދޫކުރައްވާފައެވެ. އޭގެ ތެރޭގައި އޭނާ އެކުލަވައިލެއްވި 89 ފޮތް ހިމެނެއެވެ. އޭގެތެރޭގައި، ދީނީ، ފަލްސަފީ، އިޖުތިމާޢީ، ސިޔާސީ އަދި ވާހަކަ ފޮތްތައް ހިމެނެއެވެ. އޭގެ އިތުރުން އޭނާގެ ޢިލްމީ ޚަޒާނާއިން ގެނެސްދެއްވާ "އަލްޢިލްމު ވަލްއީމާން" ނަމަކަށް ކިޔާ މަޝްހޫރު ޓީވީ ޕްރޮގްރާމް ވެސް ފާހަގަކޮށްލަން ޖެހެއެވެ. އެ ޕްރްގްރާމުގެ 400 އެޕިސޯޑު އޭނާ ގެނެސްދެއްވާފައި ވެއެވެ.

ޑރ. މުޞްޠަފާ މަޙުމޫދު ކުރެއްވި އަގުބޮޑު ޚިދުމަތްތަކުގެ ތެރެއިން ފާހަގަކޮށްލަން ޖެހޭ އެއްކަމަކީ، 1979 ވަނަ އަހަރު ޤާހިރާގައި އޭނާ ބިނާކުރެއްވި މިސްކިތެވެ. އެއީ، ފަޤީރުންނަށް ބޭސް ފަރުވާކުރާ ތިން މަރުކަޒާއެކު ބިނާކުރައްވާފައިވާ މިސްކިތެކެވެ.

ޑރ. މުޞްޠަފާ މަޙުމޫދުގެ ޙަޔާތްޕުޅުގައި ކުރިމަތިވެ ވަޑައިގަތް އެންމެ ބޮޑު އެއް މުޞީބާތަކީ، އޭނާ ލިޔުއްވި ފޮތެއްގެ މައްސަލައިގައި އޭނާގެ މައްޗަށް ކުރެވުނު ޝަރީޢަތެވެ. އެ މައްސަލަ ޝަރީޢަތަށް ގެންދެވީ، ޖާމިޢުލް އަޒުހަރުގެ އެދިވަޑައިގަތުމަކަށް، ސީދާ މިޞްރުގެ ރައީސް ޖަމާލު ޢަބްދުއްނާޞިރެވެ. އެ ފޮތުގެ ނަމަކީ، "ﷲ ވަލްއިންސާން" އެވެ. އޭނާގެ މައްޗަށް ހުށަހެޅުނީ ކުފުރުގެ މައްސަލައެކެވެ. ނަމަވެސް އެފޮތް ހިފެހެއްޓުން ނޫން އެހެން ޙުކުމެއް އޭނާގެ މައްޗަކަށް ނުކުރެއެވެ.

ޑރ. މުޞްޠަފާ މަޙުމޫދަކީ، ތުއްޕުޅު އިރު، ތޫނުފިލި ކުއްޖެއް ކަމުގައި ވިއެވެ.
ގޭގައި މަޢުމަލެއް ހައްދަވައިގެން، އެތަނުގައި ސައިބޯންޏާއި ފަނިފަކުސަ މަރާ ޒަހަރު އުފެއްދެވިއެވެ.
އެއަށްފަހު، ޔުނިވަރސިޓީ މަރްޙަލާގައި ވެސް އޭނާވީ، އެހެން ދަރިވަރުންނަށްވުރެ ތޫނުފިލި ދަރިވަރަކަށެވެ.
ދިރިހުރުމާއި މަރުވުމުގެ ސިއްރު ހޯއްދަވަން މަސައްކަތް ކުރެއްވިއެވެ.
އަދި މަރުވުމަށްފަހު، ކަން އޮތްގޮތާމެދު ނަޒަރު ހިންގެވިއެވެ.
ޙަޔާތުގެ އެކި މަރްޙަލާތަކުގައި، ވާޞިލުވެވަޑައިގެންނެވުނު ނުރަނގަޅު ނަތީޖާތައް، އަމިއްލަފުޅަށް ޤަބޫލުކުރެއްވިއެވެ. މިއީ، އޭނާގެ ހިތްވަރު ގަދަކަމާއި ތެދުވެރި ކަމުގެ އަލިގަދަ ދަލީލެކެވެ.



ޑރ. މުޞްޠަފާ މަޙުމޫދު ލިޔުއްވާފައިވާ ބައެއް ފޮތްތައް:

1. އިސްލާމްދީން އަނދަވަޅެއްގެ ތެރޭގައި
2. ސުވަރުގެއާއި ނަރަކައަށް ކުރި ޒިޔާރަތް
3. ދުނިޔޭގެ ބޮޑުންނާއި އާޚިރަތުގެ ބޮޑުން
4. ސިޔާސީ އިސްލާމް އަދި ކުރިމަތިވަމުން އަންނަ ހަނގުރާމަ
5. ސިއްރުތަކުގެ ދުނިޔެ
6. ދަންޖެހުމުގެ ތުންފަތް މަތީގައި
7. މަރުގެ އަރަތް
8. ޙަޔާތުގެ އަރަތް
9. ޝައްކުން އީމާނަށް އަޅުގަނޑު ކުރި ދަތުރު
10. ކައުބަތުﷲ ގެފުޅަށް ދިއުމަށް މަގެއް
11. މާތް ﷲ (ޢައްޒަ ވަޖައްލަ)
12. ތައުރާތު
13. އެމެރިކާއިން އަނެއް ފަރާތު ގޮނޑުދޮށަށް
14. މަސީޚު ދައްޖާލު
15. ކީރިތި ރަސޫލާ (ޞައްލަ ﷲ ޢަލައިހި ވަސައްލަމަ)
16. ކީރިތި ޤުރުއާނުގެ ސިއްރުތަކުގެ ތެރެއިން
17. ބޮޑު މުއާމަރާ
18. ނަރަކައިގެ މަގު
19. އިސްލާމް ދީނަކީ ކޮބާ؟
20. އިސްރާއީލު، ފެށުމާއި ނިމުން


މަޞްދަރުތައް:
1. އިސްލާމްއޮންލައިން ޑޮޓް ނެޓް
2. އަލްބަޝީރު ނިއުސް