''ބެސްޓްފްރެންޑް''
އާދަމް ނަޞީރު އިބްރާހީމް (2010)
ތިބާޔާ، ބައްދަލުވީތީ، ހިތަށް އުފާވެރިކަން ލިބިއްޖެ އެވެ.
މި އަހަރަކީ އަހަންނަށް އެންމެ އަތްމަތި ދަތި އަހަރެވެ.
ވިޔަފާރި ބަނގުރޫޓުވެއްޖެ އެވެ.
ފޯރުންތެރިކަން ގެއްލިއްޖެ އެވެ.
ދަރަނިވެރިވެއްޖެ އެވެ.
ތިބާޔާ، ހަތަރު ކަޅި ހަމަވީތީ، ނަފުސަށް ހަމަޖެހުން ލިބިއްޖެ އެވެ.
މި މަހަކީ އަހަންނަށް އެންމެ ބަދުނަސީބު މަހެވެ.
އާއިލާ ރޫޅިއްޖެ އެވެ.
ދަރީންކޮޅު ވިއްސި ވިހާލި ވެއްޖެ އެވެ.
އެކަނިވެރިއަކަށް ވެއްޖެ އެވެ.
ތިބާޔާ، ސަލާންކޮށްލެވުނީތީ، މެޔަށް ފިނިކަން ލިބިއްޖެ އެވެ.
މި ހަފުތާއަކީ، އަހަންނަށް އެންމެ އުދާސްކަންދިން ހަފުތާ އެވެ.
ވަޒީފާ ގެއްލިއްޖެ އެވެ.
ސަލާންޖަހަން ޖެހިއްޖެ އެވެ.
ދާންވީތަނެއް ކުރަންވީ ކަމެއް އޮޅިއްޖެ އެވެ.
ތިބާ، ހިނިތުންވެލީތީ، ޟަމީރަށް ފާގަތިކަން ލިބިއްޖެ އެވެ.
މި އަދަކީ އަހަންނަށް އެންމެ ނުތަނަވަސްކަން ދިން ދުވަހެވެ.
ބައްޕަ ހަސްފަތާލުގައި ބާއްވައިފި އެވެ.
އަތްފައިގެ ވާގި ނެތިގެންނެވެ.
ފަރުވާއާ މެދު އިތުބާރެއް ނެތެވެ.
ރަޙްމަތްތެރިޔާ އެވެ.
އެކަމަކު.......
ތިބާގެ މި ބައްދަލުވުމުން، ހިތުގެ އުންމީދު އުތުރި އަރައްޖެ އެވެ.
މި ހިނދުކޮޅަކީ، އަހަންނަށް ހަތަރު އުދަރެސް ފެނުޖެހުނު ވަގުތެވެ.
މަންމަ ނިޔާ ވެއްޖެ އެވެ.
ވަޅުލެވޭނެ ފަދަ ވެސް ނެތެވެ.
މި ފިރުކެނީ، ސަހަރާއާ ދިމާ އަށެވެ.
''ބެސްޓްފްރެންޑް''؛
''އެހެންދޯ! ހާދަ ދެރައޭދޯ!، ކޮބާ ނެތްތަ ކޮފީއެއް ޖަހާލެވޭކަށް؟''
(ނިމުނީ)