ކަރުނައިގެ މުތީ (8)
ތަރުޖަމާ ކުރީ: މުޙަންމަދު ޝާހިދު ޙަލީމު (2002)
(10 ފެބްރުވަރީ 2011، ބުރާސްފައްޗާ ގުޅޭ)
ޝެހެންޝާހަށް އެމަނިކުފާނުގެ ދަރިކަލުންނާ ވަކިންނެއް ނޫޅުއްވޭނެއެވެ. އެމަނިކުފާނު ދެކެ ޝެހެންޝާހު ފުރާނަފުޅަށް ވުރެން ވެސް ބޮޑަށް ލޯބިފުޅުވެއެވެ. އެމަނިކުފާނު، މަރުޙޫމާގެ ހަނދުމަފުޅު ތާޒާކޮށްދެއެވެ. ޝެހެންޝާހް ޝަކުވާއިން ފުރިފައި ވާ ރާގެއްގައި ވިދާޅުވިއެވެ.
"ދަރިފުޅާ ދަރިފުޅު ބައްޕަގެ ބަލިފަޔާ ކުޅެނީ ތަ؟ ދަރިފުޅާ ވަކިން އެއް ދުވަހު ވެސް ބައްޕައަކަށް ނޫޅެވޭނެކަން ދަރިފުޅަށް އެނގޭނެ."
"ބައްޕާފުޅާ! އަދަބުކުޑަކަމަކަށް ނުވަންޏާ ވާހަކައެއް ދަންނަވައިފާނަން. ބައްޕާފުޅު ބޭނުންފުޅުވަނީ އަޅުގަނޑެއް ނޫން. އަޅުގަނޑުގެ ލޯ. މި ލޮލަކީ އަޅުގަނޑަށް މަންމާފުޅުގެ ވާރުތައިން ލިބުނު އެއްޗެއް. އަޅުގަނޑަކީ ބައްޕާފުޅުގެ ދަރިއެއް. ބައްޕާފުޅަށް ޓަކައި އަޅުގަނޑުގެ ފުރާނަ ވެސް ޤުރްބާންކޮށްފާނަން. އެކަމަކު އަޅުގަނޑު މި ތަނުން ދާނަން ކަން ޔަގީން. އެކަމަކު ދިއުމުގެ ކުރިން، ބައްޕާފުޅު ލޯބިފުޅުވާ މި ދެ ލޯ ނަގާފަ ބައްޕާފުޅުގެ ފައިންޕުޅު ދޮށުގަ ބާއްވާނަން. އެއީ ބައްޕާފުޅުގެ އެއްވެސް ބަލިފައިންޕުޅެއް އަޅުގަނޑުގެ އަތުގަ ނުބާއްވާން."
އެ ވާހަކަފުޅު އިވިވަޑައިގަތުމާއެކު ޝެހެންޝާހުގެ ހިތްޕުޅު ތެޅިގަތެވެ. ޝެހެޒާދާގެ ލޯފުޅު ނަގާ ވާހަކަ އެ ބުނީ ދުސްމިނެއް ނަމަ، އެމަނިކުފާނު ހަމަ އެ ވަގުތު އެމީހެއްގެ ކަނދުރާއިން ބޯ އުދުއްސައިލެއްވީހެވެ. އެ ދެ ލޯފުޅަކީ ލޯގަނޑެކެވެ. އެ ލޯގަނޑުން ފެނިވަޑައިގަންނަވަނީ މުމްތާޒު މަޙަލުގެ ސޫރަފުޅެވެ. އެ ލޯފުޅުން ޖަމްޝީދުގެ ތަށިކޮޅުން ފެންނަހެން، ރީތި މާޒީގެ ފޮޓޯތައް ދައްކައިދެއެވެ. އަދި ތާޖްމަޙަލް ފުރިހަމަވާނެ ކަމުގެ ޔަގީންކަން ލިއްބައިދެއެވެ. އެމަނިކުފާނު ދެރަފުޅުވެއްޖެ ކަހަލަ ރާގަކަށް ވިދާޅުވިއެވެ.
"ތިޔަ ކަހަލަ ސުންޕާ ލަފުޒުތައް ދުލުން ބޭރުނުކުރޭ. ތިޔަ ދެ ލޮލަކީ ދަރިފުޅުގެ މަންމަގެ ރީތި ހަދިޔާއެއް. އެއީ ލޮބުވެތި އެއްޗެއް ކަމަށް ހަދާ. އެއަށް ރައްކާތެރިވޭ. ޝުޖާޢާއި މުރާދުގެ ބަޣާވާތް ފުނޑުފުނޑުކޮށްލުމަށް، ދަރިފުޅުގެ ތިޔަ ކުޑަކުދީން ފަދަ ގޮތްދޫނުކުރުން، ބައްޕައަށް ގަބޫލު ކުރެވިދާނެ. އެކަމަކު ތިޔަ ދެ ލޮލަކަށް ގެއްލުމެއް ނުދެވޭނެ. ދަރިފުޅު އެދޭ ގޮތެއް ބުނެބަލަ."
"ބައްޕާފުޅާ! އަޅުގަނޑު ބޭނުންވަނީ ބާޣީ ޝެހެޒާދާއިން ބަލިކުރުމަށް ބޮޑު ލަޝްކަރެއް ފޮނުވަން. އެކަމަކު އަޅުގަނޑުމެންގެ އެންމެ ކުޅަދާނަ ސިފައިންނާ ކޮމާންޑަރުން އޯރަންގް ޒޭބާ އެކުގަ ބޭޖާ ޕޫރުގެ ހަނގުރާމައިގަ ވަގުތު ނަގާލާތާ މިހާރު އެތައް މަހެއް ވެއްޖެ. ބައްޕާފުޅު އޯރަންގް ޒޭބަށް އެ ލަޝްކަރު އަނބުރާ ފޮނުވުމަށް އަންގަވާ ދެއްވާ. އޭރުން އެ ލަޝްކަރު އަޅުގަނޑުގެ ދަރިފުޅު ސުލައިމާން ޝިކޯހުގެ ކޮމާންޑަރުކަމުގެ ދަށުގަ އެ ބޭފުޅުންގެ ބަޣާވާތް ފުނޑުފުނޑުކޮށް ލުމަށް ފޮނުވާނީ."
އޯރަންގް ޒޭބުގެ ކޮމާންޑަރުކަމުގެ ދަށުގައި އޮތް ލަޝްކަރެއް އެމަނިކުފާނުގެ ކިބައިން ވަކިކޮށް އެހެން ހަނގުރާމައަކަށް ފޮނުއްވުމަށް، އެ ވިދާޅުވި ވިދާޅުވުމަކީ ގަބޫލުކުރެވޭ ކަހަލަ ވިދާޅުވުމެއް ނޫނެވެ. އެކަމަކު ޝެހެންޝާހު ދަރިކަލުންގެ ގޮތްދޫނުކުރެއްވުމުގެ ކުރިމަތީގައި އިސްޖެއްސެވިއެވެ. އަދި އޯރަންގް ޒޭބަށް ލަޝްކަރު އަނބުރާ ފޮނުއްވުމަށް އަމުރުފުޅު ފޮނުއްވިއެވެ.
ޝެހެޒާދާ އޯރަންގް ޒޭބް ހުންނެވީ ބޭޖާ ޕޫރްގެ ކިއްލާ ހިސޯރު ކުރައްވައިގެންނެވެ. އެ ކިއްލާ ފަތަހަވެދާނެކަމުގެ އަސަރުތައް އޭރު ދަނީ ފެންނަމުންނެވެ. އެ ދަނޑިވަޅު ޝާހީ އަމުރުފުޅު އައީ ލަޝްކަރު އަނބުރާ ފޮނުއްވުމަށެވެ. އޯރަންގް ޒޭބަށް މަޖުބޫރުވެވަޑައިގަތީ ބޭޖާ ޕޫރުގެ އިސްކަންދަރު ޢާދިލް ޝާހުގެ ޞުލްޙައިގެ ހުށަހެޅުއްވުން ގަބޫލުފުޅުކުރައްވާށެވެ. ރަސްކަމުގެ އަމުރުފުޅުގެ ފުރަގަހުން ދާރާ ޝިކޯހު، އޯރަންގް ޒޭބުގެ ފަތަޙަ ނާކާމިޔާބަށް ބަދަލުކުރައްވަނީކަން އެމަނިކުފާނަށް އެނގިވަޑައިގަތެވެ. ދެން އެމަނިކުފާނު، ދާރާ ޝިކޯހާ ދެކޮޅަށް ތައްޔާރުވެވަޑައިގަތުމަށް، ޝެހެޒާދާ މުރާދު އެމަނިކުފާނާ އެއްބައި ކުރުއްވިއެވެ. އެ ދެ އަޚުން އެ ދެ ބޭފުޅުންގެ ދެ ލަޝްކަރާ އެކު ވަޑައިގެން ނަރްބަދާ ކޯރުގެ އައްސޭރީގައި ބައްދަލުކުރައްވައި ގުޅިވަޑައިގަތެވެ. އެހައި ތަނަށް ދިޔަ އިރު، އެ ބޭފުޅުންނާ ހަނގުރާމަ ކުރެއްވުމަށް ޖަސްވަންތު ސިންގް ޝާހީ ލަޝްކަރުގެ ކޮމާންޑަރަކަށް ވެގެން ކޯރުގެ އަނެއް އައްސޭރިއަށް އައެވެ.
މި ކަންތައްގަނޑުން ބައްޕާފުޅު ދުރުގައި ބެހެއްޓެވުމަށް ދާރާ ޝިކޯހު ބައްޕާފުޅަށް ވިދާޅުވިއެވެ.
"ބައްޕާފުޅާ! މި ވަގުތު ވައިފެން ބަދަލުކޮށްލެއްވުން ބައްޕާފުޅަށް ވަރަށް މުހިންމު. އަޅުގަނޑަށް ފެންނަނީ ބައްޕާފުޅު އާގަރާއަށް ވަޑައިގެން އެ ތާނގައި އަރާމުކުރައްވަން. ތާޖް މަޙަލް ވެސް މިހާރު ނިމުމުގެ މަރްޙަލާއަށް ހިނގައްޖެ. އެ ގަނޑުވަރު ދެކެވަޑައިގަންނަވަން ބޭނުންފުޅު ވާހަކަ ބައްޕާފުޅު ކިތަންމެ ފަހަރަކު ވިދާޅުވެއްޖައީމު. ބައްޕާފުޅު އަމުރުފުޅުދެއްވައިފި ނަމަ އަޅުގަނޑު ބައްޕާފުޅުގެ ދަތުރުގެ އިންތިޒާމު ކުރަންތޯ."
ކޮންމެވެސް ގޮތަކުން ތާޖް މަޙަލް ފެނިވަޑައިގަތުމަކީ ޚުދު ޝެހެންޝާހުގެ ވެސް އުންމީދުފުޅެވެ. އެހެންކަމުން އެމަނިކުފާނު ވަޑައިގަތުމަށް ރުހިވަޑައިގަތެވެ. އެމަނިކުފާނު ދަތުރުކުރެއްވުމަށް ދާރާ ޝިކޯހު ހަމަޖެއްސެވީ ކަނޑުގެ މަގެވެ. އެއީ އެހެން އެއްވެސް މީހަކަށް ރަސްގެފާނުގެ ދަތުރުގެ ޚަބަރު އެނގުނަ ނުދިނުމަށެވެ. އެމަނިކުފާނު ޝާހީ ދޯނިކޮޅުގައި ފަރުދާ ދެންމެވިއެވެ.
ޝާހް ޖަހާން ސުވާލު ކުރެއްވި އެވެ. "ފަރުދާގެ ބޭނުމަކީ ކޮބާ؟ ބައްޕަ ގަނޑުވަރުގެ ހަތަރު ފާރުން ބޭރަށް މި ނުކުތީ ވަރަށް ގިނަ ދުވަސް ކޮށްފަ. އެހެންވީމާ ދާނީ ގުދުރަތީ މަންޒަރުތައް ބަލަމުން."
"ބައްޕާފުޅާ! ބައްޕާފުޅަށް ދުރު ފުސްކަން ބައްޕާފުޅު ހަނދުމަފުޅެއް ނެތް. ބައްޕާފުޅަކަށް ޤުދްރަތީ މަންޒަރުތަކެއް ފެނިވަޑައެއް ނުގަންނަވާނެ. އަޅުގަނޑު ފަރުދާދެމީ ރައްޔިތުންނަށް ބައްޕާފުޅު ފެނުނަ ނުދޭން ވެގެން. އެހެންނޫނީ ބައްޕާފުޅަށް ކުރުނީސް ކޮށް އަދަބުއަދާކުރަން މީހުންގަނޑު އެއްވާނެ. ތިޔަހާ އާލާސްކަންފުޅާ އުޅުއްވަމުން ބައްޕާފުޅަކަށް އިށީނދެވަޑައެއް ނުގެންނެވޭނެ. ތިޔަ ޙާލުކޮޅުގާ އެއްވެސް މީހަކާ ބައްދަލުކުރެއްވުމަކީ ރަނގަޅު ކަމެއް ނޫން. ބައްޕާފުޅު މި ދަތުރު ނުހަނު އަރާމުފުޅުގަ ނިންމަވާނެ ކަމަށް ﷲގެ ކިބަފުޅުން އުއްމީދު ކުރެވޭ."
އެމަނިކުފާނު، އެމަނިކުފާނުގެ ލޯބިފުޅުވާ ދަރިކަލުންގެ އެދިވަޑައިގަތުމާ އެއްގޮތަށް ދޯނިކޮޅުން ދަތުރު ކުރެއްވިއެވެ. ދަރިކަލުން އެންމެ ފުރަތަމަ އެމަނިކުފާނު އާލާސްކަންފުޅުގެ ބަހަނާގައި ގަނޑުވަރު ތެރޭގައި ގެންގުޅުއްވީ ބަންދުކުރައްވައިގެން ކަމާއި، މިހާރު ދުނިޔޭގެ މީސްތަކުންގެ ލޯތަކަށް ސިއްރުން އެމަނިކުފާނު ދޯނިކޮޅެއްގައި ދިއްލީން އާގަރާއަށް ބަދަލުކުރައްވަނީ ކަމެއް އެއްގޮތަކަށް ވެސް އެމަނިކުފާނަކަށް އިޙްސާސެއް ނުކުރެއްވެއެވެ. ދާރާ ޝިކޯހް ބައްޕާފުޅަށް ވިސްނައިދެއްވައިފައި ވަނީ އާލާސްކަންފުޅާ އުޅުއްވަމުން މީހުންނާ ބައްދަލުކުރެއްވުމަކީ ރަނގަޅު ކަމެއް ނޫން ކަމުގައެވެ. އެމަނިކުފާނުގެ މި ވިސްނައިދެއްވުން ބައްޕާފުޅު ލައްވައި ގަބޫލުފުޅުކުރުއްވުމަށް ބައެއް ފަހަރަށް އެމަނިކުފާނުގެ ލޯފުޅު ހަތިޔާރަކަށް ހައްދަވަމުން ގެންދެވިއެވެ. އަނެއްބައި ފަހަރު ތާޖް މަޙަލް ފުރިހަމަވާ ކަމުގެ ހުވަފެންފުޅު ދައްކަވަމުން ގެންދެވިއެވެ.
ޝާހް ޖަހާން ތާޖް މަޙަލް ދެކެވަޑައިގަތުމަށް އާގަރާއަށް ވަޑައިގަތެވެ. އެކަމަކު ދުރުން އެ ގަނޑުވަރު ފެނިވަޑައިގަންނަވަނީ ހިޔަންޏެއް ހެންނެވެ. އެ ގަނޑުވަރު ބިމުގެ މޭގައި ކޮޅަށް އެ ހުރީ ކޮން ސިފައަކަށް ކަމެއް އެނގިވަޑައިގަންނަވާ ވަރެއް ނުވެއެވެ. އެމަނިކުފާނު ގަސްތުކުރެއްވީ ރޭގަނޑު ސާދަ ވިލޭރޭގެ ހަނދު އުދަވުމުން ހަނދުވަރުގައި އެ ގަނޑުވަރު ދެކެވަޑައިގަތުމަށެވެ. އެކަމަކު ޝާހީ ގަނޑުވަރަށް ހަމަ ވަޑައިގަތުމާ އެކު އާލާސްކަންފުޅު އިތުރަށް ބޮޑުވިއެވެ. ފުރަތަމަ ހުރީ ކުޑަކަމު އަވަހާރަގަނޑުވަރަށް ވަޑައިނުގެންނެވޭކަމުގެ ވޭންފުޅެވެ. މިހާރު ފޫޅުފުޅުގެ ތިރިން ދުޅަ ވެސް ވީއެވެ. އެނދުދާންކޮޅުން ތެދުވެވަޑައިގަތުމަކީ ނުކުރެއްވޭނޭ ކަމަކަށް ވިއެވެ. އެ މަނިކުފާނު ތާޖް މަޙަލް ދެކެވަޑައިގަތުމަށް ފާލިކީކޮޅުގައި އިންނަވައިގެން ވަޑައިގަތުމަށް ވެސް ހަކީމުން ހުއްދައެއް ނޭރުވިއެވެ. ޙަޤީޤަތުގައި ދާރާ ޝިކޯހް ހަކީމުންނަށް އަންގަވައިފައި ވަނީ ރަސްގެފާނު އަވަހާރަފުޅު ލައްޕަވާ ކޮޓަރިކޮޅުން ބޭރަށް ވެސް ވަޑައިގަތަ ނުދިނުމަށެވެ.
ބައެއް މީހުން، މީހުން ހައްޔަރުކުރަނީ ދުސްމިނުކަމުންނެވެ. ދަރިކަލުން އެމަނިކުފާނު ހައްޔަރުކުރައްވައިފައި އެ ވަނީ ލޯބިންނެވެ. އެމަނިކުފާނު ޝާހީ ގަނޑުވަރުގެ ކޮޓަރިކޮޅެއްގައި އޮންނެވިއެވެ. ބޭރުގެ އެއްވެސް ޚަބަރެއް އެމަނިކުފާނާ ހަމައަށް ގެނައުމަކީ އެއްވެސް މީހަކަށް ކުޅަދާނަ ކަމެއް ނޫނެވެ. މިހާރު އެމަނިކުފާނުގެ ހަމައެކަނި މަސައްކަތްޕުޅަކީ މުމްތާޒު މަޙަލުގެ އަރިހުގައި ވޭތިކުރެއްވުނު ހިތްފަސޭހަ ވަގުތުތައް ހަނދުމަފުޅުކުރެއްވުމެވެ. އަދި ތާޖް މަޙަލް އެންމެ ފަހަރަކު ވިޔަސް ދެކެވަޑައި ގަތުމުގެ އުންމީދުގައި ދިރި ހުންނެވުމާއި ނޭވާފުޅާ ގުޅުއްވަމުން ގެންދެވުމެވެ.
މި އާލާސްކަންފުޅުގެ ދުވަސްތަކުގައި އެމަނިކުފާނުގެ ދަރިކަނބަލުން ޖަހާން އާރާ އެމަނިކުފާނަށް ޚިދުމަތް ކޮށް ދެއްވަމުން ގެންދަވައެވެ. ފުރަތަމަ އެކަމަނާ ވެސް ވެރިކަމުގައި އުފެދިފައިވާ ގަޑުބަޑުތަކުގެ ވާހަކަތަކެއް ބައްޕާފުޅުގެ އަރިހުގައި ވިދާޅެއް ނުވެއެވެ. އެކަމަކު ނޭފަތުކުރިއަށް ވުރެން މައްޗަށް ފެންއަރައި، ވެރިކަމުގެ ދަހިވެތިކަމުގައި އެއް އަޚަކު އަނެއް އަޚެއްގެ ފުރާނަފުޅުގެ ދުސްމިނަކަށް ވެވަޑައިގަތް ތަން އެކަމަނާއަށް ފެނިވަޑައިގަތުމުން ތާޒާ ޚަބަރުތައް ބައްޕާފުޅުގެ އަރިހުގައި ވިދާޅުވާން ފެއްޓެވިއެވެ. އާލާސްކަންފުޅާ އުޅުއްވާ ޝެހެންޝާހް އަޑުއައްސަވަމުން ގެންދެވިއެވެ.
"ޝުޖާޢު ޝާހީ ލަޝްކަރުގެ އަތުން ބަލިފުޅުވެގެން ފިއްލަވައިފި. އޯރަންގް ޒޭބާ މުރާދު ގުޅިވަޑައިގަންނަވައިގެން ޝާހީ ލަޝްކަރާ ހަނގުރާމަ ކުރައްވަނީ."
ދެން ޚަބަރު ލިބިވަޑައިގަތީ އޯރަންގް ޒޭބާއި މުރާދު ޝެހެންޝާހުގެ ފައިވާންފުޅު ދެކެވަޑައިގަތުމަށް ވަޑައިގަންނަވަން ބޭނުންފުޅުވި ވާހަކައާއި އެކަމަކު ދާރާ ޝިކޯހުގެ އަމުރުފުޅަށް ޖަސްވަންތު ސިންގް އެ ބޭފުޅުންގެ މަގު ބައްދަވައިފައިވާ ޚަބަރެވެ. އޯރަންގް ޒޭބާއި ޝެހެންޝާހާ ދެމެދުގައި ސިޓީ ބަދަލުކުރެވޭނެ ގޮތް ޖަހާން އާރާ ހެއްދެވިއެވެ. އެއީ އެކި ބޭފުޅުންގެ ހިތްޕުޅުގައިވާ ކުށް ހީފުޅުތައް ދުރުކޮށް އަޚުންގެ މެދުގައި ސުލްހަވެރިކަން ޤާއިމުކުރެއްވުމުގެ ބޭނުންފުޅުގައެވެ.
ޝެހެންޝާހް ޖަވާބުގައި އޯރަންގް ޒޭބަށް ލިއުއްވި ސިޓީގައި އެމަނިކުފާނު އޯރަންގް ޒޭބާއި މުރާދު ދެކެ ހައްދެއް ނެތް މިންވަރަށް ލޯބިފުޅުވާ ކަމުގެ ޔަގީންކަން ދެއްވިއެވެ. އެކަމަކު ދޮށީ ދަރިކަލުން ދާރާ ޝިކޯހަކީ ވަލީ ޢަހުދު ކަމުގައި ކަނޑައެޅުއްވިއެވެ. އެ ކަމަކީ ފެށުނީއްސުރެން ހުރިހައި ބޭފުޅުން ވެސް ރުހިވަޑައިނުގަންނަވާ ކަމެކެވެ. ދާރާ ޝިކޯހް ކަހަލަ ގޮތްދޫނުކުރައްވާ، ބޮޑާފުޅު، ވިސްނިވަޑައި ނުގަންނަވާ އަޚެއްގެ އިސްކަން އެ ބޭފުޅުން ގަބޫލެއް ނުކުރައްވައެވެ. އެންމެފަހުން ނަތީޖާއަކަށް ވީ ސުލްހައިގެ މަގުގެ ފަސްގަނޑު އެއްވަރުވުމުގެ ބަދަލުގައި އަޚުންގެ މެދުގައި ހަނގުރާމަ ދިގުލައިގެން ދިއުމެވެ. އޯރަންގް ޒޭބަކީ ވިސްނުންފުޅު ތޫނު ހިތްވަރުފުޅު ގަދަ ބޭފުޅެކެވެ. ވައިގެ މިސްރާބު ދެނެވަޑައިގެން ހަމަލާދެއްވައެވެ. ކުރު މުއްދަތެއްގެ ތެރޭގައި ދާރާ ޝިކޯހް ވެސް ބަލިފުޅުވެގެން ފިލައިވަޑައިގެންފިއެވެ. އޯރަންގް ޒޭބުގެ ލަޝްކަރު ކިއްލާ ހިސޯރު ކުރިއެވެ.
ކިއްލާގައި ބަންދުވެފައި ތިބި ޝެހެންޝާހުގެ ލަޝްކަރު އެތައް ދުވަހެއް ވަންދެން ހަނގުރާމަ ކުރިއެވެ. އެކަމަކު ފެނަށް ޖެހުމުގެ ސަބަބުން އެންމެ ފަހުން އެ މީހުނަށް ޖެހުނީ ކިއްލާގެ ދޮރޯށި ހުޅުވާށެވެ. އޯރަންގް ޒޭބުގެ ދަރިކަލުން ޝެހެޒާދާ މުޙަންމަދު އަޢުޡަމް ކިއްލާގެ ތެރެއަށް ވެދެވަޑައިގެން ކާފާފުޅު ޝާހް ޖަހާނުގެ ހުރިހައި ނޯކަރުން ހައްޔަރުކުރެއްވިއެވެ. އަދި ހުއްދަ ނެތި އެއްވެސް މީހަކު ކާފާފުޅާ ބައްދަލު ނުކުރުމަށް އަމުރުނެރުއްވިއެވެ. ފަރީއްކޮޅުގެ ވަގުތުތަކުގައި ޖަހާން އާރާ ބައްޕާފުޅުގެ އަރިހަށް ވަޑައިގެން ފަރީއްކޮޅުއަރުވައިފައި ވަޑައިގަތުމުގެ ޚާއްޞަ ހުއްދައެއް އެކަމަނާއަށް ދެއްވިއެވެ.
ބާދުޝާހް ވަނީ ދިރިހުންނަވައި އަވަހާރަވެފައެވެ. ދިރުން ހުރި ގަބުރެއް ފަދައިން އެމަނިކުފާނު އެނދުދާންކޮޅު މަތީގައި އޮންނެވި އެވެ. އަދި ތަކުރާރުކޮށް ވިދާޅުވަމުން ގެންދަވައެވެ.
"އަހަރެންގެ ދަރިފުޅު (ދާރާ ޝިކޯހް) ކޮބައިތަ؟ ތާޖު މަޙަލް ނިމިއްޖެތަ؟ އަހަރެން ގޮވައިގެން އެ ތަނަށް ހިނގާ!"
ޝެހެންޝާހަށް ޖަވާބުއެރުވުމަށް ބައެއް ފަހަރު ޖަހާން އާރާ ހުންނަވައެވެ. އަނެއްބައި ފަހަރު އެމަނިކުފާނުގެ ކާފަދަރިކަލުން މުޙައްމަދު އަޢުޡަމް ހުންނަވައެވެ. އަދި އަނެއްބައި ފަހަރަށް އޯރަންގް ޒޭބުގެ އަޑުފުޅު އިވިވަޑައި ގަނެއެވެ. ލޯފުޅުގެ އަނދިރިކަން ބޮޑުކަމުން ކުރިފުޅުމަތީގައި ހުންނަ މީހާގެ މޫނު ވެސް ސާފުކޮށް ފެނިވަޑައެއް ނުގަނެއެވެ. އެމަނިކުފާނަށް ފެނިވަޑައިގަންނަވަނީ ވަރަށް ކައިރިންނެވެ. ނޫނީ އަޑުން އެއީ ކާކުކަން ފާހަގަކުރައްވަނީއެވެ.
ބައެއް ފަހަރު ޖަހާން އާރާ ޖަވާބު އަރުވަ އެވެ. "ލޯބިވާ ބޭބޭފުޅު ދާރާ ޝިކޯހް މިހާރު އަލުން ލަޝްކަރު އެއް ކުރައްވަނީ. ބޭބޭފުޅު ވަރަށް އަވަހަށް ފާތިހެއްގެ ގޮތުގައި ބައްޕާފުޅުގެ އަރިހަށް ވަޑައިގަންނަވާނެ."
ބައެއް ފަހަރު މުޙައްމަދު އަޢުޡަމުގެ އަޑުފުޅު އިވިވަޑައިގަނެއެވެ. "ކާފާފުޅާ! ކާފާފުޅު އެންމެ ތާޖް މަޙަލެއް ބިނާކުރައްވަން ވެގެން އެތައް ލައްކަ ރުފިޔާއެއްގެ އަލިމަހާއި ޖަވާހިރު ނަންގަވާލައްވައިފީމު. އެންމެ ގަނޑުވަރެއް އަޅުއްވަން ވެގެން ރައްޔިތުންނަށް ބޮޑެތި ޓެކުހުގެ ބަރު އުފުއްލަން ޖައްސަވާފަ ވާތާ ވިހި އަހަރު ވެއްޖެ. ފަގީރުންގެ ލެއިން ކާފާފުޅުގެ ލޯބީގެ ތާޖްމަޙަލް އަޅުއްވަން ކާފާފުޅަށް އޮތީ ކޮން ޙައްޤެއްތޯ؟"
ގައިދު ޚާނާގެ އެކަނިވެރިކަމުގައި ޝާހް ޖަހާންގެ ބަލިކަށި އަޑުފުޅު އިވިގެން ދެއެވެ. "ކާފަގެ ދަރިފުޅާ! މިއަދާ ހަމައަށް މި ބިމުގަ ޢިމާރާތްކުރެވުނު ހުރިހާ ގަނޑުވަރަކާ މިސްކިތެއްގެ ބަރު އުފުއްލީ ރައްޔިތުން. ޝާހީ މިސްކިތްތަކުގެ ޓެކުސް، ދެ ދުނިޔޭގެ ސަވާބު ލިބިގަތުމުގެ ބޭނުމުގަ މީހުން އުފަލުން އަދާކުރުމަކީ އަދި އެހެން ކަމެއް. ކާފަ އެންމެ ތާޖް މަޙަލެއް މި ބިނާކުރަނީ ކިތައް މިސްކިތް ބިނާކޮށްފަ. މި ތާޖު މަޙަލް ލޯބީގެ ފިލާވަޅު ދޭ. ލޯތްބާ ނުލައި އެއް އިންސާނަކަށް އަނެއް އިންސާނަކާ ހަމައަކަށް ނުދެވޭނެ. އިންސާނަކާ ހަމައަށް ނުދެވޭ އިރު ކަލާނގެއާ ހަމައަށް ދެވޭނީ ކިހިނެއް؟ ޙަޤީޤަތުގަ ކަލަކީ ލޯބި. ކަލާނގެ ދެނެގަނެވޭނީ ލޯބިން. މި ތާޖް މަޙަލުގަ ލިޔާ ޤުރްއާނުގެ އާޔަތްތައް ދަރިފުޅަކީ ކަލާނގެ ދެނެގަންނަން އެނގޭ ކުއްޖަކަށް ހަދާނެ.
އާހް، އަހަރެންގެ ދާރާ ޝިކޯހް ކޮބައިތަ؟ އޭނާ ދުވަހަކު ވެސް ތާޖް މަޙަލާ މެދު ފާޑެއް ނުކިޔާ. އޭނާއަކީ އަހަރެންގެ ކިޔަމަންތެރި ދަރިއެއް. އޭނާ ދުވަހަކު ވެސް އަހަރެން މި ގޮތަކަށް ހައްޔަރެއް ނުކުރޭ...!"
ވަގުތު ފާއިތުވާ ވަރެއް އެނގިވަޑައެއް ނުގަނެއެވެ. ދުވަސް ވޭތިވާ ވަރެއް އެނގިވަޑައެއް ނުގަނެއެވެ. ބައެއް ފަހަރު އޯރަންގް ޒޭބުގެ އަޑުފުޅު އިވިވަޑައިގަނެއެވެ. "ބައްޕާފުޅާ! ބައްޕާފުޅުގެ އެ ދަރިކަލުން ވެސް ބައްޕާފުޅު ގެންގުޅެފާ ވަނީ ގައިދީ އަކަށް ހަދައިގެން. އެކަމަކު ބައްޕާފުޅަށް އެކަން އިޙްސާސްވެވަޑައި ނުގަންނަވާކަން އެއީ ކިހާ ހިތާމަ ހުރި ކަމެއްތޯ؟ ލޯތްބަކީ ފައިގަ ޖަހާފަ އޮންނަ ހިލިހިލާ ވެސް ނުފެންނަހާ ކަނު އެއްޗެއްތޯ؟"
އެކަނިވެރި ގައިދުގައި ޝާހްޖަހާންގެ ބަލިކަށި އަޑުފުޅު ގިސްލާން ފަށައެވެ. "ދަރިފުޅާ! އިންސާނުން ލޯބީގެ ހިލިހިލާ ޖަހަނީ އަމިއްލައަށް. އެ ހިލިހިލާ ފެނޭތޯ ނުފެނޭތޯ ސުވާލު ވެސް ނޫފެދޭ. ދަރިފުޅު ވެސް ދަރިފުޅުގެ ލޯބީގަ ބައްޕަ ގައިދުކުރާނޭ ނަމަ ކިހާ ރަނގަޅު."
ޖަވާބެއް ނެތެވެ. ހިމޭންކަމެވެ. ދިގު ހިމޭންކަމެވެ. އެތައް ދުވަހަކަށްފަހު ޝާހް ޖަހާނަށް ނުލަފާ މީހެއްގެ މޫނު ފެނިވަޑައިގަތެވެ. އެ މޫނު ދަނީ ކަޅުކުލައަށެވެ. މޫނުގައި ހުރީ ރޫޖެހިފައެވެ. ބޮލާއި، ތުނބުޅިއާއި، ބުމަ ހުރީ ނުރަވެފައެވެ. އޭނާ ޝާހް ޖަހާނުގެ ވަރަށް އަރިހަށް އައެވެ. އެއީ އެނގިވަޑައި ގަންނަވާނޭ ގޮތުގެ މަތީންނެވެ.
ޝާހް ޖަހާން ސުވާލުކުރެއްވިއެވެ. "ތިޔައީ ކާކު؟"
އޭނާ ޖަވާބުއެރުވިއެވެ. "އަޅުގަނޑުގެ ދުރުކުރެވިފައިވާ ޝެހެންޝާހް! އަޅުގަނޑަކީ ކާކު ކަން ދެނެވަޑައިގަންނަވާ! އަޅުގަނޑުގެ ނަމަކީ ޝަރީފުލް މަލިކު. މަނިކުފާނު ޝެހެޒާދާއަކަށް ހުންނެވި ދުވަސްވަރު މަލިކާ ނޫރު ޖަހާނާއި ޝެހެޒާދާ ޝެހެރިޔާރު އަޅުގަނޑާ ދޫލް ޕޫރު ބެލެހެއްޓުން ހަވާލުކުރެއްވި. އަޅުގަނޑަކީ އެމަނިކުފާނުގެ ވަފާތެރި ނޯކަރެއް. އެކަމަކު މަނިކުފާނުގެ ނޯކަރު މަނިކުފާނުގެ އަމުރުފުޅަށް އެ ބިމަށް ވެރިވެގަތް. އޭނާ އަޅުގަނޑާ ހަނގުރާމަކުރި. އަދި އަޅުގަނޑުގެ ލޮލަށް ދުންޏެއް ޖަހައި އަޅުގަނޑަކީ އަބަދުގެ އަބަދަށް އެއް ލޯ ކަނު މީހަކަށް ހެދި. އޭރުއްސުރެން އަޅުގަނޑުގެ ހިތުގައި ބަދަލުހިފުމުގެ އަލިފާންގަނޑު ދަނީ އަނދަމުން."
"ކަލޭ ބޭނުން ވަނީ ކޮން ކަމެއް؟ މި ތަނަށް ތި އައީ ކީއްކުރަން؟"
"އަޅުގަނޑު މި ތަނަށް ގެނައީ ތަޤްދީރު. ޡިއްލު ސުބްޙާނީ ޝެހެންޝާހް އޯރަންގް ޒޭބު އަޅުގަނޑު ފޮނުއްވީ މަނިކުފާނަށް ޚިދުމަތް އަރުވަން. އަޅުގަނޑުގެ ހިތުގައި އޮތް އެއްޗެއް އެމަނިކުފާނަކަށް އެނގިވަޑައެއް ނުގަންނަވާ. އަޅުގަނޑުގެ ހިތުގައި އޮތީ ކޮންމެ އެއްޗަކަށް ވިޔަސް މަނިކުފާނުގެ އެންމެ ފަހު ވަގުތު، އަޅުގަނޑުގެ މެޔަށް ފިނިވާނޭ ކަހަލަ ޚިދުމަތް އަރުވާނަން. އަމުރުފުޅު ކުރައްވާ؛ މާތް ސާހިބާ! އަޅުގަނޑު ކިޔަމަންވާނަން."
"ކަލޭގެ މަޤްޞަދު ރަނގަޅު ނޫންކަން ކަލޭ ތި ވާހަކަދައްކާ ރާގުން އެނގޭ!"
"މަނިކުފާނު އަޅުގަނޑުގެ މަޤްޞަދަށް ނުބައްލަވާ. އަޅުގަނޑުގެ ޚިދުމަތަށް ބައްލަވާ!"
"ތީ ތިހާ ޚިދުމަތްތެރިއެއް ނަމަ ޝެހެޒާދީ ޖަހާން އާރާ މި ތަނަށް ގެނެސްދީ!"
"އަޅުގަނޑަށް ތި ކަމެއް ނުކުރެވޭނެ. މިހާރުގެ ޝެހެންޝާހުގެ އަމުރުފުޅަށް ޝެހެޒާދީ ސާހިބާ ވެސް ވަނީ ބަންދު ކުރެވިފަ. އެއީ އެކަމަނާ ޝެހެޒާދާ ދާރާ ޝިކޯހުގެ ޚަބަރު މަނިކުފާނަށް ގެނެސްދެއްވާތީ!"
"އާހް. އަހަންނާ އަހަރެންގެ ދަރިފުޅާ ވެސް ވަކިކުރީތަ؟ ތީ ކޮން ފަދަ އަނިޔާއެއް؟"
"ހުރިހާ ޒަމާނެއްގަ ވެސް އަންނަނީ އެ ކަހަލަ އަނިޔާ ކުރެވެމުން. މަނިކުފާނު ވެސް ރަސްކަމަށް އިސްވެވަޑައިގެންފަ މަލިކާ ނޫރު ޖަހާން ބަންދުކުރެއްވީމު."
"ކަލޭ މި ތަނަށް ތި އައީ އަހަންނަށް މަލާމާތްކުރަންތަ؟ މި ތަނުން ދާން އުޅޭ. އަހަރެން މި އަމުރު ކުރަނީ އޯރަންގް ޒޭބު އަހަރެންގެ ގާތަށް އަންނަން އޭނާ އަށް އަންގަން!"
"ޝެހެންޝާހެވަގުތު ޡިއްލު ސުބްޙާނީ އޯރަންގް ޒޭބު މި ވަގުތު އުޅުއްވަނީ މި ތަނާ ވަރަށް ދުރު ގަ، މަނިކުފާނުގެ ދަރިކަލުން ދާރާ ޝިކޯހް ހައްޔަރުކުރެއްވުމުގެ ފިކުރުފުޅުގަ. އެމަނިކުފާނަށް މަނިކުފާނުގެ އަރިހަކަށް ވަޑައެއްނުގެންނެވޭނެ. ކޮންމެވެސް އެހެން އަމުރުފުޅެއް ކުރައްވާ؛ ސާހިބާ! މަނިކުފާނު ވަރަށް ބޮޑަށް ތާޖް މަޙަލް ދެކެވަޑައިގަންނަވާ ހިތްޕުޅުވާ ކަމަށް ބުނާ އަޑު އިވޭ. މިހާ ތަނަށް މަނިކުފާނުގެ އެ އެދުންފުޅު ފުރިހަމަނުވެ އޮތް ކަމީ ކިހާ ހިތާމަ ހުރި ކަމެއްތޯ؟ މަނިކުފާނު އަރާމުފުޅު ކުރައްވަން ތިޔަ އޮންނެވި ތާނގެ، މި ފާރުގެ އަނެއް ފަރާތުގަ އެހެރީ ތާޖް މަޙަލް. މި ފާރުގަ ކުޑަދޮރެއް، ނޫނީ އާނގައެއް ހުރި ނަމަ މަނިކުފާނަށް ދުރުން އެ ތަން ފެނިވަޑައިގަންނަވާނެ. މަނިކުފާނު އަމުރުފުޅުކުރައްވައިފިއްޔާ މި ތާނ އޮށޯވެވަޑައިގެން އޮންނަވައިގެން ތާޖް މަޙަލް ބެއްލެވޭނޭ އިންތިޒާމެއް އަޅުގަނޑު ހަމަޖައްސަދީފާނަން."
(10 ފެބްރުވަރީ 2011، ބުރާސްފައްޗާ ގުޅޭ)
ޝެހެންޝާހަށް އެމަނިކުފާނުގެ ދަރިކަލުންނާ ވަކިންނެއް ނޫޅުއްވޭނެއެވެ. އެމަނިކުފާނު ދެކެ ޝެހެންޝާހު ފުރާނަފުޅަށް ވުރެން ވެސް ބޮޑަށް ލޯބިފުޅުވެއެވެ. އެމަނިކުފާނު، މަރުޙޫމާގެ ހަނދުމަފުޅު ތާޒާކޮށްދެއެވެ. ޝެހެންޝާހް ޝަކުވާއިން ފުރިފައި ވާ ރާގެއްގައި ވިދާޅުވިއެވެ."ދަރިފުޅާ ދަރިފުޅު ބައްޕަގެ ބަލިފަޔާ ކުޅެނީ ތަ؟ ދަރިފުޅާ ވަކިން އެއް ދުވަހު ވެސް ބައްޕައަކަށް ނޫޅެވޭނެކަން ދަރިފުޅަށް އެނގޭނެ."
"ބައްޕާފުޅާ! އަދަބުކުޑަކަމަކަށް ނުވަންޏާ ވާހަކައެއް ދަންނަވައިފާނަން. ބައްޕާފުޅު ބޭނުންފުޅުވަނީ އަޅުގަނޑެއް ނޫން. އަޅުގަނޑުގެ ލޯ. މި ލޮލަކީ އަޅުގަނޑަށް މަންމާފުޅުގެ ވާރުތައިން ލިބުނު އެއްޗެއް. އަޅުގަނޑަކީ ބައްޕާފުޅުގެ ދަރިއެއް. ބައްޕާފުޅަށް ޓަކައި އަޅުގަނޑުގެ ފުރާނަ ވެސް ޤުރްބާންކޮށްފާނަން. އެކަމަކު އަޅުގަނޑު މި ތަނުން ދާނަން ކަން ޔަގީން. އެކަމަކު ދިއުމުގެ ކުރިން، ބައްޕާފުޅު ލޯބިފުޅުވާ މި ދެ ލޯ ނަގާފަ ބައްޕާފުޅުގެ ފައިންޕުޅު ދޮށުގަ ބާއްވާނަން. އެއީ ބައްޕާފުޅުގެ އެއްވެސް ބަލިފައިންޕުޅެއް އަޅުގަނޑުގެ އަތުގަ ނުބާއްވާން."
އެ ވާހަކަފުޅު އިވިވަޑައިގަތުމާއެކު ޝެހެންޝާހުގެ ހިތްޕުޅު ތެޅިގަތެވެ. ޝެހެޒާދާގެ ލޯފުޅު ނަގާ ވާހަކަ އެ ބުނީ ދުސްމިނެއް ނަމަ، އެމަނިކުފާނު ހަމަ އެ ވަގުތު އެމީހެއްގެ ކަނދުރާއިން ބޯ އުދުއްސައިލެއްވީހެވެ. އެ ދެ ލޯފުޅަކީ ލޯގަނޑެކެވެ. އެ ލޯގަނޑުން ފެނިވަޑައިގަންނަވަނީ މުމްތާޒު މަޙަލުގެ ސޫރަފުޅެވެ. އެ ލޯފުޅުން ޖަމްޝީދުގެ ތަށިކޮޅުން ފެންނަހެން، ރީތި މާޒީގެ ފޮޓޯތައް ދައްކައިދެއެވެ. އަދި ތާޖްމަޙަލް ފުރިހަމަވާނެ ކަމުގެ ޔަގީންކަން ލިއްބައިދެއެވެ. އެމަނިކުފާނު ދެރަފުޅުވެއްޖެ ކަހަލަ ރާގަކަށް ވިދާޅުވިއެވެ.
"ތިޔަ ކަހަލަ ސުންޕާ ލަފުޒުތައް ދުލުން ބޭރުނުކުރޭ. ތިޔަ ދެ ލޮލަކީ ދަރިފުޅުގެ މަންމަގެ ރީތި ހަދިޔާއެއް. އެއީ ލޮބުވެތި އެއްޗެއް ކަމަށް ހަދާ. އެއަށް ރައްކާތެރިވޭ. ޝުޖާޢާއި މުރާދުގެ ބަޣާވާތް ފުނޑުފުނޑުކޮށްލުމަށް، ދަރިފުޅުގެ ތިޔަ ކުޑަކުދީން ފަދަ ގޮތްދޫނުކުރުން، ބައްޕައަށް ގަބޫލު ކުރެވިދާނެ. އެކަމަކު ތިޔަ ދެ ލޮލަކަށް ގެއްލުމެއް ނުދެވޭނެ. ދަރިފުޅު އެދޭ ގޮތެއް ބުނެބަލަ."
"ބައްޕާފުޅާ! އަޅުގަނޑު ބޭނުންވަނީ ބާޣީ ޝެހެޒާދާއިން ބަލިކުރުމަށް ބޮޑު ލަޝްކަރެއް ފޮނުވަން. އެކަމަކު އަޅުގަނޑުމެންގެ އެންމެ ކުޅަދާނަ ސިފައިންނާ ކޮމާންޑަރުން އޯރަންގް ޒޭބާ އެކުގަ ބޭޖާ ޕޫރުގެ ހަނގުރާމައިގަ ވަގުތު ނަގާލާތާ މިހާރު އެތައް މަހެއް ވެއްޖެ. ބައްޕާފުޅު އޯރަންގް ޒޭބަށް އެ ލަޝްކަރު އަނބުރާ ފޮނުވުމަށް އަންގަވާ ދެއްވާ. އޭރުން އެ ލަޝްކަރު އަޅުގަނޑުގެ ދަރިފުޅު ސުލައިމާން ޝިކޯހުގެ ކޮމާންޑަރުކަމުގެ ދަށުގަ އެ ބޭފުޅުންގެ ބަޣާވާތް ފުނޑުފުނޑުކޮށް ލުމަށް ފޮނުވާނީ."
އޯރަންގް ޒޭބުގެ ކޮމާންޑަރުކަމުގެ ދަށުގައި އޮތް ލަޝްކަރެއް އެމަނިކުފާނުގެ ކިބައިން ވަކިކޮށް އެހެން ހަނގުރާމައަކަށް ފޮނުއްވުމަށް، އެ ވިދާޅުވި ވިދާޅުވުމަކީ ގަބޫލުކުރެވޭ ކަހަލަ ވިދާޅުވުމެއް ނޫނެވެ. އެކަމަކު ޝެހެންޝާހު ދަރިކަލުންގެ ގޮތްދޫނުކުރެއްވުމުގެ ކުރިމަތީގައި އިސްޖެއްސެވިއެވެ. އަދި އޯރަންގް ޒޭބަށް ލަޝްކަރު އަނބުރާ ފޮނުއްވުމަށް އަމުރުފުޅު ފޮނުއްވިއެވެ.
ޝެހެޒާދާ އޯރަންގް ޒޭބް ހުންނެވީ ބޭޖާ ޕޫރްގެ ކިއްލާ ހިސޯރު ކުރައްވައިގެންނެވެ. އެ ކިއްލާ ފަތަހަވެދާނެކަމުގެ އަސަރުތައް އޭރު ދަނީ ފެންނަމުންނެވެ. އެ ދަނޑިވަޅު ޝާހީ އަމުރުފުޅު އައީ ލަޝްކަރު އަނބުރާ ފޮނުއްވުމަށެވެ. އޯރަންގް ޒޭބަށް މަޖުބޫރުވެވަޑައިގަތީ ބޭޖާ ޕޫރުގެ އިސްކަންދަރު ޢާދިލް ޝާހުގެ ޞުލްޙައިގެ ހުށަހެޅުއްވުން ގަބޫލުފުޅުކުރައްވާށެވެ. ރަސްކަމުގެ އަމުރުފުޅުގެ ފުރަގަހުން ދާރާ ޝިކޯހު، އޯރަންގް ޒޭބުގެ ފަތަޙަ ނާކާމިޔާބަށް ބަދަލުކުރައްވަނީކަން އެމަނިކުފާނަށް އެނގިވަޑައިގަތެވެ. ދެން އެމަނިކުފާނު، ދާރާ ޝިކޯހާ ދެކޮޅަށް ތައްޔާރުވެވަޑައިގަތުމަށް، ޝެހެޒާދާ މުރާދު އެމަނިކުފާނާ އެއްބައި ކުރުއްވިއެވެ. އެ ދެ އަޚުން އެ ދެ ބޭފުޅުންގެ ދެ ލަޝްކަރާ އެކު ވަޑައިގެން ނަރްބަދާ ކޯރުގެ އައްސޭރީގައި ބައްދަލުކުރައްވައި ގުޅިވަޑައިގަތެވެ. އެހައި ތަނަށް ދިޔަ އިރު، އެ ބޭފުޅުންނާ ހަނގުރާމަ ކުރެއްވުމަށް ޖަސްވަންތު ސިންގް ޝާހީ ލަޝްކަރުގެ ކޮމާންޑަރަކަށް ވެގެން ކޯރުގެ އަނެއް އައްސޭރިއަށް އައެވެ.
މި ކަންތައްގަނޑުން ބައްޕާފުޅު ދުރުގައި ބެހެއްޓެވުމަށް ދާރާ ޝިކޯހު ބައްޕާފުޅަށް ވިދާޅުވިއެވެ.
"ބައްޕާފުޅާ! މި ވަގުތު ވައިފެން ބަދަލުކޮށްލެއްވުން ބައްޕާފުޅަށް ވަރަށް މުހިންމު. އަޅުގަނޑަށް ފެންނަނީ ބައްޕާފުޅު އާގަރާއަށް ވަޑައިގެން އެ ތާނގައި އަރާމުކުރައްވަން. ތާޖް މަޙަލް ވެސް މިހާރު ނިމުމުގެ މަރްޙަލާއަށް ހިނގައްޖެ. އެ ގަނޑުވަރު ދެކެވަޑައިގަންނަވަން ބޭނުންފުޅު ވާހަކަ ބައްޕާފުޅު ކިތަންމެ ފަހަރަކު ވިދާޅުވެއްޖައީމު. ބައްޕާފުޅު އަމުރުފުޅުދެއްވައިފި ނަމަ އަޅުގަނޑު ބައްޕާފުޅުގެ ދަތުރުގެ އިންތިޒާމު ކުރަންތޯ."
ކޮންމެވެސް ގޮތަކުން ތާޖް މަޙަލް ފެނިވަޑައިގަތުމަކީ ޚުދު ޝެހެންޝާހުގެ ވެސް އުންމީދުފުޅެވެ. އެހެންކަމުން އެމަނިކުފާނު ވަޑައިގަތުމަށް ރުހިވަޑައިގަތެވެ. އެމަނިކުފާނު ދަތުރުކުރެއްވުމަށް ދާރާ ޝިކޯހު ހަމަޖެއްސެވީ ކަނޑުގެ މަގެވެ. އެއީ އެހެން އެއްވެސް މީހަކަށް ރަސްގެފާނުގެ ދަތުރުގެ ޚަބަރު އެނގުނަ ނުދިނުމަށެވެ. އެމަނިކުފާނު ޝާހީ ދޯނިކޮޅުގައި ފަރުދާ ދެންމެވިއެވެ.
ޝާހް ޖަހާން ސުވާލު ކުރެއްވި އެވެ. "ފަރުދާގެ ބޭނުމަކީ ކޮބާ؟ ބައްޕަ ގަނޑުވަރުގެ ހަތަރު ފާރުން ބޭރަށް މި ނުކުތީ ވަރަށް ގިނަ ދުވަސް ކޮށްފަ. އެހެންވީމާ ދާނީ ގުދުރަތީ މަންޒަރުތައް ބަލަމުން."
"ބައްޕާފުޅާ! ބައްޕާފުޅަށް ދުރު ފުސްކަން ބައްޕާފުޅު ހަނދުމަފުޅެއް ނެތް. ބައްޕާފުޅަކަށް ޤުދްރަތީ މަންޒަރުތަކެއް ފެނިވަޑައެއް ނުގަންނަވާނެ. އަޅުގަނޑު ފަރުދާދެމީ ރައްޔިތުންނަށް ބައްޕާފުޅު ފެނުނަ ނުދޭން ވެގެން. އެހެންނޫނީ ބައްޕާފުޅަށް ކުރުނީސް ކޮށް އަދަބުއަދާކުރަން މީހުންގަނޑު އެއްވާނެ. ތިޔަހާ އާލާސްކަންފުޅާ އުޅުއްވަމުން ބައްޕާފުޅަކަށް އިށީނދެވަޑައެއް ނުގެންނެވޭނެ. ތިޔަ ޙާލުކޮޅުގާ އެއްވެސް މީހަކާ ބައްދަލުކުރެއްވުމަކީ ރަނގަޅު ކަމެއް ނޫން. ބައްޕާފުޅު މި ދަތުރު ނުހަނު އަރާމުފުޅުގަ ނިންމަވާނެ ކަމަށް ﷲގެ ކިބަފުޅުން އުއްމީދު ކުރެވޭ."
އެމަނިކުފާނު، އެމަނިކުފާނުގެ ލޯބިފުޅުވާ ދަރިކަލުންގެ އެދިވަޑައިގަތުމާ އެއްގޮތަށް ދޯނިކޮޅުން ދަތުރު ކުރެއްވިއެވެ. ދަރިކަލުން އެންމެ ފުރަތަމަ އެމަނިކުފާނު އާލާސްކަންފުޅުގެ ބަހަނާގައި ގަނޑުވަރު ތެރޭގައި ގެންގުޅުއްވީ ބަންދުކުރައްވައިގެން ކަމާއި، މިހާރު ދުނިޔޭގެ މީސްތަކުންގެ ލޯތަކަށް ސިއްރުން އެމަނިކުފާނު ދޯނިކޮޅެއްގައި ދިއްލީން އާގަރާއަށް ބަދަލުކުރައްވަނީ ކަމެއް އެއްގޮތަކަށް ވެސް އެމަނިކުފާނަކަށް އިޙްސާސެއް ނުކުރެއްވެއެވެ. ދާރާ ޝިކޯހް ބައްޕާފުޅަށް ވިސްނައިދެއްވައިފައި ވަނީ އާލާސްކަންފުޅާ އުޅުއްވަމުން މީހުންނާ ބައްދަލުކުރެއްވުމަކީ ރަނގަޅު ކަމެއް ނޫން ކަމުގައެވެ. އެމަނިކުފާނުގެ މި ވިސްނައިދެއްވުން ބައްޕާފުޅު ލައްވައި ގަބޫލުފުޅުކުރުއްވުމަށް ބައެއް ފަހަރަށް އެމަނިކުފާނުގެ ލޯފުޅު ހަތިޔާރަކަށް ހައްދަވަމުން ގެންދެވިއެވެ. އަނެއްބައި ފަހަރު ތާޖް މަޙަލް ފުރިހަމަވާ ކަމުގެ ހުވަފެންފުޅު ދައްކަވަމުން ގެންދެވިއެވެ.
ޝާހް ޖަހާން ތާޖް މަޙަލް ދެކެވަޑައިގަތުމަށް އާގަރާއަށް ވަޑައިގަތެވެ. އެކަމަކު ދުރުން އެ ގަނޑުވަރު ފެނިވަޑައިގަންނަވަނީ ހިޔަންޏެއް ހެންނެވެ. އެ ގަނޑުވަރު ބިމުގެ މޭގައި ކޮޅަށް އެ ހުރީ ކޮން ސިފައަކަށް ކަމެއް އެނގިވަޑައިގަންނަވާ ވަރެއް ނުވެއެވެ. އެމަނިކުފާނު ގަސްތުކުރެއްވީ ރޭގަނޑު ސާދަ ވިލޭރޭގެ ހަނދު އުދަވުމުން ހަނދުވަރުގައި އެ ގަނޑުވަރު ދެކެވަޑައިގަތުމަށެވެ. އެކަމަކު ޝާހީ ގަނޑުވަރަށް ހަމަ ވަޑައިގަތުމާ އެކު އާލާސްކަންފުޅު އިތުރަށް ބޮޑުވިއެވެ. ފުރަތަމަ ހުރީ ކުޑަކަމު އަވަހާރަގަނޑުވަރަށް ވަޑައިނުގެންނެވޭކަމުގެ ވޭންފުޅެވެ. މިހާރު ފޫޅުފުޅުގެ ތިރިން ދުޅަ ވެސް ވީއެވެ. އެނދުދާންކޮޅުން ތެދުވެވަޑައިގަތުމަކީ ނުކުރެއްވޭނޭ ކަމަކަށް ވިއެވެ. އެ މަނިކުފާނު ތާޖް މަޙަލް ދެކެވަޑައިގަތުމަށް ފާލިކީކޮޅުގައި އިންނަވައިގެން ވަޑައިގަތުމަށް ވެސް ހަކީމުން ހުއްދައެއް ނޭރުވިއެވެ. ޙަޤީޤަތުގައި ދާރާ ޝިކޯހް ހަކީމުންނަށް އަންގަވައިފައި ވަނީ ރަސްގެފާނު އަވަހާރަފުޅު ލައްޕަވާ ކޮޓަރިކޮޅުން ބޭރަށް ވެސް ވަޑައިގަތަ ނުދިނުމަށެވެ.
ބައެއް މީހުން، މީހުން ހައްޔަރުކުރަނީ ދުސްމިނުކަމުންނެވެ. ދަރިކަލުން އެމަނިކުފާނު ހައްޔަރުކުރައްވައިފައި އެ ވަނީ ލޯބިންނެވެ. އެމަނިކުފާނު ޝާހީ ގަނޑުވަރުގެ ކޮޓަރިކޮޅެއްގައި އޮންނެވިއެވެ. ބޭރުގެ އެއްވެސް ޚަބަރެއް އެމަނިކުފާނާ ހަމައަށް ގެނައުމަކީ އެއްވެސް މީހަކަށް ކުޅަދާނަ ކަމެއް ނޫނެވެ. މިހާރު އެމަނިކުފާނުގެ ހަމައެކަނި މަސައްކަތްޕުޅަކީ މުމްތާޒު މަޙަލުގެ އަރިހުގައި ވޭތިކުރެއްވުނު ހިތްފަސޭހަ ވަގުތުތައް ހަނދުމަފުޅުކުރެއްވުމެވެ. އަދި ތާޖް މަޙަލް އެންމެ ފަހަރަކު ވިޔަސް ދެކެވަޑައި ގަތުމުގެ އުންމީދުގައި ދިރި ހުންނެވުމާއި ނޭވާފުޅާ ގުޅުއްވަމުން ގެންދެވުމެވެ.
މި އާލާސްކަންފުޅުގެ ދުވަސްތަކުގައި އެމަނިކުފާނުގެ ދަރިކަނބަލުން ޖަހާން އާރާ އެމަނިކުފާނަށް ޚިދުމަތް ކޮށް ދެއްވަމުން ގެންދަވައެވެ. ފުރަތަމަ އެކަމަނާ ވެސް ވެރިކަމުގައި އުފެދިފައިވާ ގަޑުބަޑުތަކުގެ ވާހަކަތަކެއް ބައްޕާފުޅުގެ އަރިހުގައި ވިދާޅެއް ނުވެއެވެ. އެކަމަކު ނޭފަތުކުރިއަށް ވުރެން މައްޗަށް ފެންއަރައި، ވެރިކަމުގެ ދަހިވެތިކަމުގައި އެއް އަޚަކު އަނެއް އަޚެއްގެ ފުރާނަފުޅުގެ ދުސްމިނަކަށް ވެވަޑައިގަތް ތަން އެކަމަނާއަށް ފެނިވަޑައިގަތުމުން ތާޒާ ޚަބަރުތައް ބައްޕާފުޅުގެ އަރިހުގައި ވިދާޅުވާން ފެއްޓެވިއެވެ. އާލާސްކަންފުޅާ އުޅުއްވާ ޝެހެންޝާހް އަޑުއައްސަވަމުން ގެންދެވިއެވެ.
"ޝުޖާޢު ޝާހީ ލަޝްކަރުގެ އަތުން ބަލިފުޅުވެގެން ފިއްލަވައިފި. އޯރަންގް ޒޭބާ މުރާދު ގުޅިވަޑައިގަންނަވައިގެން ޝާހީ ލަޝްކަރާ ހަނގުރާމަ ކުރައްވަނީ."
ދެން ޚަބަރު ލިބިވަޑައިގަތީ އޯރަންގް ޒޭބާއި މުރާދު ޝެހެންޝާހުގެ ފައިވާންފުޅު ދެކެވަޑައިގަތުމަށް ވަޑައިގަންނަވަން ބޭނުންފުޅުވި ވާހަކައާއި އެކަމަކު ދާރާ ޝިކޯހުގެ އަމުރުފުޅަށް ޖަސްވަންތު ސިންގް އެ ބޭފުޅުންގެ މަގު ބައްދަވައިފައިވާ ޚަބަރެވެ. އޯރަންގް ޒޭބާއި ޝެހެންޝާހާ ދެމެދުގައި ސިޓީ ބަދަލުކުރެވޭނެ ގޮތް ޖަހާން އާރާ ހެއްދެވިއެވެ. އެއީ އެކި ބޭފުޅުންގެ ހިތްޕުޅުގައިވާ ކުށް ހީފުޅުތައް ދުރުކޮށް އަޚުންގެ މެދުގައި ސުލްހަވެރިކަން ޤާއިމުކުރެއްވުމުގެ ބޭނުންފުޅުގައެވެ.
ޝެހެންޝާހް ޖަވާބުގައި އޯރަންގް ޒޭބަށް ލިއުއްވި ސިޓީގައި އެމަނިކުފާނު އޯރަންގް ޒޭބާއި މުރާދު ދެކެ ހައްދެއް ނެތް މިންވަރަށް ލޯބިފުޅުވާ ކަމުގެ ޔަގީންކަން ދެއްވިއެވެ. އެކަމަކު ދޮށީ ދަރިކަލުން ދާރާ ޝިކޯހަކީ ވަލީ ޢަހުދު ކަމުގައި ކަނޑައެޅުއްވިއެވެ. އެ ކަމަކީ ފެށުނީއްސުރެން ހުރިހައި ބޭފުޅުން ވެސް ރުހިވަޑައިނުގަންނަވާ ކަމެކެވެ. ދާރާ ޝިކޯހް ކަހަލަ ގޮތްދޫނުކުރައްވާ، ބޮޑާފުޅު، ވިސްނިވަޑައި ނުގަންނަވާ އަޚެއްގެ އިސްކަން އެ ބޭފުޅުން ގަބޫލެއް ނުކުރައްވައެވެ. އެންމެފަހުން ނަތީޖާއަކަށް ވީ ސުލްހައިގެ މަގުގެ ފަސްގަނޑު އެއްވަރުވުމުގެ ބަދަލުގައި އަޚުންގެ މެދުގައި ހަނގުރާމަ ދިގުލައިގެން ދިއުމެވެ. އޯރަންގް ޒޭބަކީ ވިސްނުންފުޅު ތޫނު ހިތްވަރުފުޅު ގަދަ ބޭފުޅެކެވެ. ވައިގެ މިސްރާބު ދެނެވަޑައިގެން ހަމަލާދެއްވައެވެ. ކުރު މުއްދަތެއްގެ ތެރޭގައި ދާރާ ޝިކޯހް ވެސް ބަލިފުޅުވެގެން ފިލައިވަޑައިގެންފިއެވެ. އޯރަންގް ޒޭބުގެ ލަޝްކަރު ކިއްލާ ހިސޯރު ކުރިއެވެ.
ކިއްލާގައި ބަންދުވެފައި ތިބި ޝެހެންޝާހުގެ ލަޝްކަރު އެތައް ދުވަހެއް ވަންދެން ހަނގުރާމަ ކުރިއެވެ. އެކަމަކު ފެނަށް ޖެހުމުގެ ސަބަބުން އެންމެ ފަހުން އެ މީހުނަށް ޖެހުނީ ކިއްލާގެ ދޮރޯށި ހުޅުވާށެވެ. އޯރަންގް ޒޭބުގެ ދަރިކަލުން ޝެހެޒާދާ މުޙަންމަދު އަޢުޡަމް ކިއްލާގެ ތެރެއަށް ވެދެވަޑައިގެން ކާފާފުޅު ޝާހް ޖަހާނުގެ ހުރިހައި ނޯކަރުން ހައްޔަރުކުރެއްވިއެވެ. އަދި ހުއްދަ ނެތި އެއްވެސް މީހަކު ކާފާފުޅާ ބައްދަލު ނުކުރުމަށް އަމުރުނެރުއްވިއެވެ. ފަރީއްކޮޅުގެ ވަގުތުތަކުގައި ޖަހާން އާރާ ބައްޕާފުޅުގެ އަރިހަށް ވަޑައިގެން ފަރީއްކޮޅުއަރުވައިފައި ވަޑައިގަތުމުގެ ޚާއްޞަ ހުއްދައެއް އެކަމަނާއަށް ދެއްވިއެވެ.
ބާދުޝާހް ވަނީ ދިރިހުންނަވައި އަވަހާރަވެފައެވެ. ދިރުން ހުރި ގަބުރެއް ފަދައިން އެމަނިކުފާނު އެނދުދާންކޮޅު މަތީގައި އޮންނެވި އެވެ. އަދި ތަކުރާރުކޮށް ވިދާޅުވަމުން ގެންދަވައެވެ.
"އަހަރެންގެ ދަރިފުޅު (ދާރާ ޝިކޯހް) ކޮބައިތަ؟ ތާޖު މަޙަލް ނިމިއްޖެތަ؟ އަހަރެން ގޮވައިގެން އެ ތަނަށް ހިނގާ!"
ޝެހެންޝާހަށް ޖަވާބުއެރުވުމަށް ބައެއް ފަހަރު ޖަހާން އާރާ ހުންނަވައެވެ. އަނެއްބައި ފަހަރު އެމަނިކުފާނުގެ ކާފަދަރިކަލުން މުޙައްމަދު އަޢުޡަމް ހުންނަވައެވެ. އަދި އަނެއްބައި ފަހަރަށް އޯރަންގް ޒޭބުގެ އަޑުފުޅު އިވިވަޑައި ގަނެއެވެ. ލޯފުޅުގެ އަނދިރިކަން ބޮޑުކަމުން ކުރިފުޅުމަތީގައި ހުންނަ މީހާގެ މޫނު ވެސް ސާފުކޮށް ފެނިވަޑައެއް ނުގަނެއެވެ. އެމަނިކުފާނަށް ފެނިވަޑައިގަންނަވަނީ ވަރަށް ކައިރިންނެވެ. ނޫނީ އަޑުން އެއީ ކާކުކަން ފާހަގަކުރައްވަނީއެވެ.
ބައެއް ފަހަރު ޖަހާން އާރާ ޖަވާބު އަރުވަ އެވެ. "ލޯބިވާ ބޭބޭފުޅު ދާރާ ޝިކޯހް މިހާރު އަލުން ލަޝްކަރު އެއް ކުރައްވަނީ. ބޭބޭފުޅު ވަރަށް އަވަހަށް ފާތިހެއްގެ ގޮތުގައި ބައްޕާފުޅުގެ އަރިހަށް ވަޑައިގަންނަވާނެ."
ބައެއް ފަހަރު މުޙައްމަދު އަޢުޡަމުގެ އަޑުފުޅު އިވިވަޑައިގަނެއެވެ. "ކާފާފުޅާ! ކާފާފުޅު އެންމެ ތާޖް މަޙަލެއް ބިނާކުރައްވަން ވެގެން އެތައް ލައްކަ ރުފިޔާއެއްގެ އަލިމަހާއި ޖަވާހިރު ނަންގަވާލައްވައިފީމު. އެންމެ ގަނޑުވަރެއް އަޅުއްވަން ވެގެން ރައްޔިތުންނަށް ބޮޑެތި ޓެކުހުގެ ބަރު އުފުއްލަން ޖައްސަވާފަ ވާތާ ވިހި އަހަރު ވެއްޖެ. ފަގީރުންގެ ލެއިން ކާފާފުޅުގެ ލޯބީގެ ތާޖްމަޙަލް އަޅުއްވަން ކާފާފުޅަށް އޮތީ ކޮން ޙައްޤެއްތޯ؟"
ގައިދު ޚާނާގެ އެކަނިވެރިކަމުގައި ޝާހް ޖަހާންގެ ބަލިކަށި އަޑުފުޅު އިވިގެން ދެއެވެ. "ކާފަގެ ދަރިފުޅާ! މިއަދާ ހަމައަށް މި ބިމުގަ ޢިމާރާތްކުރެވުނު ހުރިހާ ގަނޑުވަރަކާ މިސްކިތެއްގެ ބަރު އުފުއްލީ ރައްޔިތުން. ޝާހީ މިސްކިތްތަކުގެ ޓެކުސް، ދެ ދުނިޔޭގެ ސަވާބު ލިބިގަތުމުގެ ބޭނުމުގަ މީހުން އުފަލުން އަދާކުރުމަކީ އަދި އެހެން ކަމެއް. ކާފަ އެންމެ ތާޖް މަޙަލެއް މި ބިނާކުރަނީ ކިތައް މިސްކިތް ބިނާކޮށްފަ. މި ތާޖު މަޙަލް ލޯބީގެ ފިލާވަޅު ދޭ. ލޯތްބާ ނުލައި އެއް އިންސާނަކަށް އަނެއް އިންސާނަކާ ހަމައަކަށް ނުދެވޭނެ. އިންސާނަކާ ހަމައަށް ނުދެވޭ އިރު ކަލާނގެއާ ހަމައަށް ދެވޭނީ ކިހިނެއް؟ ޙަޤީޤަތުގަ ކަލަކީ ލޯބި. ކަލާނގެ ދެނެގަނެވޭނީ ލޯބިން. މި ތާޖް މަޙަލުގަ ލިޔާ ޤުރްއާނުގެ އާޔަތްތައް ދަރިފުޅަކީ ކަލާނގެ ދެނެގަންނަން އެނގޭ ކުއްޖަކަށް ހަދާނެ.
އާހް، އަހަރެންގެ ދާރާ ޝިކޯހް ކޮބައިތަ؟ އޭނާ ދުވަހަކު ވެސް ތާޖް މަޙަލާ މެދު ފާޑެއް ނުކިޔާ. އޭނާއަކީ އަހަރެންގެ ކިޔަމަންތެރި ދަރިއެއް. އޭނާ ދުވަހަކު ވެސް އަހަރެން މި ގޮތަކަށް ހައްޔަރެއް ނުކުރޭ...!"
ވަގުތު ފާއިތުވާ ވަރެއް އެނގިވަޑައެއް ނުގަނެއެވެ. ދުވަސް ވޭތިވާ ވަރެއް އެނގިވަޑައެއް ނުގަނެއެވެ. ބައެއް ފަހަރު އޯރަންގް ޒޭބުގެ އަޑުފުޅު އިވިވަޑައިގަނެއެވެ. "ބައްޕާފުޅާ! ބައްޕާފުޅުގެ އެ ދަރިކަލުން ވެސް ބައްޕާފުޅު ގެންގުޅެފާ ވަނީ ގައިދީ އަކަށް ހަދައިގެން. އެކަމަކު ބައްޕާފުޅަށް އެކަން އިޙްސާސްވެވަޑައި ނުގަންނަވާކަން އެއީ ކިހާ ހިތާމަ ހުރި ކަމެއްތޯ؟ ލޯތްބަކީ ފައިގަ ޖަހާފަ އޮންނަ ހިލިހިލާ ވެސް ނުފެންނަހާ ކަނު އެއްޗެއްތޯ؟"
އެކަނިވެރި ގައިދުގައި ޝާހްޖަހާންގެ ބަލިކަށި އަޑުފުޅު ގިސްލާން ފަށައެވެ. "ދަރިފުޅާ! އިންސާނުން ލޯބީގެ ހިލިހިލާ ޖަހަނީ އަމިއްލައަށް. އެ ހިލިހިލާ ފެނޭތޯ ނުފެނޭތޯ ސުވާލު ވެސް ނޫފެދޭ. ދަރިފުޅު ވެސް ދަރިފުޅުގެ ލޯބީގަ ބައްޕަ ގައިދުކުރާނޭ ނަމަ ކިހާ ރަނގަޅު."
ޖަވާބެއް ނެތެވެ. ހިމޭންކަމެވެ. ދިގު ހިމޭންކަމެވެ. އެތައް ދުވަހަކަށްފަހު ޝާހް ޖަހާނަށް ނުލަފާ މީހެއްގެ މޫނު ފެނިވަޑައިގަތެވެ. އެ މޫނު ދަނީ ކަޅުކުލައަށެވެ. މޫނުގައި ހުރީ ރޫޖެހިފައެވެ. ބޮލާއި، ތުނބުޅިއާއި، ބުމަ ހުރީ ނުރަވެފައެވެ. އޭނާ ޝާހް ޖަހާނުގެ ވަރަށް އަރިހަށް އައެވެ. އެއީ އެނގިވަޑައި ގަންނަވާނޭ ގޮތުގެ މަތީންނެވެ.
ޝާހް ޖަހާން ސުވާލުކުރެއްވިއެވެ. "ތިޔައީ ކާކު؟"
އޭނާ ޖަވާބުއެރުވިއެވެ. "އަޅުގަނޑުގެ ދުރުކުރެވިފައިވާ ޝެހެންޝާހް! އަޅުގަނޑަކީ ކާކު ކަން ދެނެވަޑައިގަންނަވާ! އަޅުގަނޑުގެ ނަމަކީ ޝަރީފުލް މަލިކު. މަނިކުފާނު ޝެހެޒާދާއަކަށް ހުންނެވި ދުވަސްވަރު މަލިކާ ނޫރު ޖަހާނާއި ޝެހެޒާދާ ޝެހެރިޔާރު އަޅުގަނޑާ ދޫލް ޕޫރު ބެލެހެއްޓުން ހަވާލުކުރެއްވި. އަޅުގަނޑަކީ އެމަނިކުފާނުގެ ވަފާތެރި ނޯކަރެއް. އެކަމަކު މަނިކުފާނުގެ ނޯކަރު މަނިކުފާނުގެ އަމުރުފުޅަށް އެ ބިމަށް ވެރިވެގަތް. އޭނާ އަޅުގަނޑާ ހަނގުރާމަކުރި. އަދި އަޅުގަނޑުގެ ލޮލަށް ދުންޏެއް ޖަހައި އަޅުގަނޑަކީ އަބަދުގެ އަބަދަށް އެއް ލޯ ކަނު މީހަކަށް ހެދި. އޭރުއްސުރެން އަޅުގަނޑުގެ ހިތުގައި ބަދަލުހިފުމުގެ އަލިފާންގަނޑު ދަނީ އަނދަމުން."
"ކަލޭ ބޭނުން ވަނީ ކޮން ކަމެއް؟ މި ތަނަށް ތި އައީ ކީއްކުރަން؟"
"އަޅުގަނޑު މި ތަނަށް ގެނައީ ތަޤްދީރު. ޡިއްލު ސުބްޙާނީ ޝެހެންޝާހް އޯރަންގް ޒޭބު އަޅުގަނޑު ފޮނުއްވީ މަނިކުފާނަށް ޚިދުމަތް އަރުވަން. އަޅުގަނޑުގެ ހިތުގައި އޮތް އެއްޗެއް އެމަނިކުފާނަކަށް އެނގިވަޑައެއް ނުގަންނަވާ. އަޅުގަނޑުގެ ހިތުގައި އޮތީ ކޮންމެ އެއްޗަކަށް ވިޔަސް މަނިކުފާނުގެ އެންމެ ފަހު ވަގުތު، އަޅުގަނޑުގެ މެޔަށް ފިނިވާނޭ ކަހަލަ ޚިދުމަތް އަރުވާނަން. އަމުރުފުޅު ކުރައްވާ؛ މާތް ސާހިބާ! އަޅުގަނޑު ކިޔަމަންވާނަން."
"ކަލޭގެ މަޤްޞަދު ރަނގަޅު ނޫންކަން ކަލޭ ތި ވާހަކަދައްކާ ރާގުން އެނގޭ!"
"މަނިކުފާނު އަޅުގަނޑުގެ މަޤްޞަދަށް ނުބައްލަވާ. އަޅުގަނޑުގެ ޚިދުމަތަށް ބައްލަވާ!"
"ތީ ތިހާ ޚިދުމަތްތެރިއެއް ނަމަ ޝެހެޒާދީ ޖަހާން އާރާ މި ތަނަށް ގެނެސްދީ!"
"އަޅުގަނޑަށް ތި ކަމެއް ނުކުރެވޭނެ. މިހާރުގެ ޝެހެންޝާހުގެ އަމުރުފުޅަށް ޝެހެޒާދީ ސާހިބާ ވެސް ވަނީ ބަންދު ކުރެވިފަ. އެއީ އެކަމަނާ ޝެހެޒާދާ ދާރާ ޝިކޯހުގެ ޚަބަރު މަނިކުފާނަށް ގެނެސްދެއްވާތީ!"
"އާހް. އަހަންނާ އަހަރެންގެ ދަރިފުޅާ ވެސް ވަކިކުރީތަ؟ ތީ ކޮން ފަދަ އަނިޔާއެއް؟"
"ހުރިހާ ޒަމާނެއްގަ ވެސް އަންނަނީ އެ ކަހަލަ އަނިޔާ ކުރެވެމުން. މަނިކުފާނު ވެސް ރަސްކަމަށް އިސްވެވަޑައިގެންފަ މަލިކާ ނޫރު ޖަހާން ބަންދުކުރެއްވީމު."
"ކަލޭ މި ތަނަށް ތި އައީ އަހަންނަށް މަލާމާތްކުރަންތަ؟ މި ތަނުން ދާން އުޅޭ. އަހަރެން މި އަމުރު ކުރަނީ އޯރަންގް ޒޭބު އަހަރެންގެ ގާތަށް އަންނަން އޭނާ އަށް އަންގަން!"
"ޝެހެންޝާހެވަގުތު ޡިއްލު ސުބްޙާނީ އޯރަންގް ޒޭބު މި ވަގުތު އުޅުއްވަނީ މި ތަނާ ވަރަށް ދުރު ގަ، މަނިކުފާނުގެ ދަރިކަލުން ދާރާ ޝިކޯހް ހައްޔަރުކުރެއްވުމުގެ ފިކުރުފުޅުގަ. އެމަނިކުފާނަށް މަނިކުފާނުގެ އަރިހަކަށް ވަޑައެއްނުގެންނެވޭނެ. ކޮންމެވެސް އެހެން އަމުރުފުޅެއް ކުރައްވާ؛ ސާހިބާ! މަނިކުފާނު ވަރަށް ބޮޑަށް ތާޖް މަޙަލް ދެކެވަޑައިގަންނަވާ ހިތްޕުޅުވާ ކަމަށް ބުނާ އަޑު އިވޭ. މިހާ ތަނަށް މަނިކުފާނުގެ އެ އެދުންފުޅު ފުރިހަމަނުވެ އޮތް ކަމީ ކިހާ ހިތާމަ ހުރި ކަމެއްތޯ؟ މަނިކުފާނު އަރާމުފުޅު ކުރައްވަން ތިޔަ އޮންނެވި ތާނގެ، މި ފާރުގެ އަނެއް ފަރާތުގަ އެހެރީ ތާޖް މަޙަލް. މި ފާރުގަ ކުޑަދޮރެއް، ނޫނީ އާނގައެއް ހުރި ނަމަ މަނިކުފާނަށް ދުރުން އެ ތަން ފެނިވަޑައިގަންނަވާނެ. މަނިކުފާނު އަމުރުފުޅުކުރައްވައިފިއްޔާ މި ތާނ އޮށޯވެވަޑައިގެން އޮންނަވައިގެން ތާޖް މަޙަލް ބެއްލެވޭނޭ އިންތިޒާމެއް އަޅުގަނޑު ހަމަޖައްސަދީފާނަން."
-------------
(ނުނިމޭ)