ހާލު ލޯބީގެ ކިޔައިދެމޭ....!
އާދަމް ނަޞީރު އިބްރާހީމް/ތޮއްޑޫ (2004)
ޢާލަމަށް ބުނެދެންހެ ޢިޝްޤުގެ ތަޖުރިބާގެ ފިލާވަޅެއް؟
1- ކަރު ކަނޑައި ބުރިކޮށްލުމަށް ފަހު ވެސް ދެތިން ވިންދެއް ޖަހާ
މަރުވެފައިވާ މައްޔިތެއްމީ، އެކު ނުވެވި އަދި ހުރި ފަހާ
* * * * * * * * * *
2- އިރު ކަނޑާ ކުއްތަންވެލައި، ބޯލައިފި ކަނޑު އެއްކޯވަރުން،
މުރަކަޔާ އެތަކެއް ދިރުން، މާލައިފިޔޭ، ހުރިހާ މަހާ
3- ޙުރުމަތާ ކުލުނާއި އިޙްސާނުން ފުރައި ތުން ބަނދެލި ހިތް،
ބުރުއަޅާފައި އައިސް ޖަހައިގެންފިޔެ ވަގަކު އެ ނުވެސް މޮހާ
4- ސުވަރުގޭގައި ހެދުނު ފިނިފެންމަލުގެ ފަރި ގުލްޒާރުތައް،
އުވަވަޅެއްގެ ތެރަށް ޖަހައިފި މަށަންދަތިން އަޅުވާ ކަހާ
5- ފިރުމަމުން ހިނިތުންވަމުން އައި ފެހި ރަބީޢުން ދިރުވިބިން،
ނިރުތަކަށް ދަންދެން، މަރައި އެއްކޮށްފި ހަނަފަސް ހިރަފުހާ
6- އުދުހެމުން ޖައްވުގެ ތެރޭ ދާ ފެންވިލާތައް ވެސް ހެމުން،
ދުޖުލަތާ އަދި ނީލަށޭ ހުރިހާ ފެނެއް އެލަނީ ބަހާ
7- ރަތުރަނުގެ ކޮށްޓަކުތެރޭ ގަނޑުވަރަކު ބޮޑުވި ގުރާފުޅެއް،
އަތުލި ޞައްޔާދަކު ރޮލަށް އެ ހަފައިފި ރަޙްމެއް ނެތް ކިހާ
8- ޢާޝިޤީ މައިދާނުގާ މަޖުނޫނު ހުއްޓާ ކުޅިބަލަން،
ފާސިޤަކު އޭނާގެ ވިއްކާލައިފި، ގޮސް ލަގަނާ އަހާ
9- ކާއިނާތަށް ރޫޙު ގެނުވާ ތަރިތަކާއި ހަނދަށް ބުނަން،
ޚާއިނުންނާ ޒާލިމުން ދަންނާށެ....ސިފަޔާ، ކުލަ ވަހާ
10- ޢާލަމަށް ބުނެދެންހެ ޢިޝްޤުގެ ތަޖުރިބާގެ ފިލާވަޅެއް
ހާލި ދޫކޮށް ދޫނި ދާނެޔެ އެސޮރުމެން ނިމުމުން ވިހާ
------------------------
28 ސެޕްޓެމްބަރު 2004
މި ލިޔުން؛
ލިޔުން: އާދަމް ނަޞީރު އިބްރާހީމް (އެޑިޓަރު)
އަލުންބެލުން: އާދަމް ނަޞީރު އިބްރާހީމް
ޝާއިޢުކުރުން: އާދަމް ނަޞީރު އިބްރާހީމް