ސެމްސަންގ ގެލެކްސީ ނޯޓް Samsung Galaxy Note

ސެމްސަންގ (ނުވަތަ ސަމްސުންގ) ކުންފުނިން އުފައްދާފައިވާ ސްމާރޓް ފޯނުގެ އަދަދު ވަރަށްގިނައެވެ. ޓެބްލެޓްތަކުގެ ފެންވަރު ވަރަށް ރަނގަޅެވެ. ކަސްޓަމަރުންގެ ރުހުން ލިބިފައިވާ މި އުފެއްދުންތަކުގެ ސިލްސިލާއަށް އިތުރުވި އެއްބޮޅަކީ "ސެމްސަންގ ގެލެކްސީ ނޯޓް" އެވެ. މާރކެޓް ދިރާސާކުރާ ފަރާތްތަކުން ދެކޭގޮތުގައި، މިފޯނަކަށް ސްމާރޓް ފޯނެކޭ ބުނާނެ ޖާގައެއް ނެތެވެ. އަދި މީ ޓެބްލެޓެކޭ ވެސް ބުނާނެ ޖާގައެއްނެތެވެ. އެހެންކަމުން މީ މި  ދެވައްތަރުގެ "ހައިބްރިޑް" އެކޭ ބުނުންމާ ރަނގަޅުވާނެކަމަށް ތަޖުރިބާކާރުން ދެކިލައްވައެވެ.

ސެމްސަންގ ގެ މި އުފެއްދުމަކީ "އެންޑްރޮއިޑް" ޓެކްނޮލޮޖީ ބޭނުން ކޮށްގެން އޮޕަރޭޓްކުރާ ފޯނެކެވެ. ގެންގުޅެލަން ލުއި،މިފޯނުގައި 5.3 އިންޗީގެ ބޮޑު ޑިސްޕްލޭއެއް ހިމެނޭކަމީ މިފޯނަށް ގެނުވާ އިތުރު ހިތްގައިމުކަމެކެވެ. ސައިޒުގެ ގޮތުން ބޮޑު ނަމަވެސް ސްޓޭންޑަޑް ޓެބްލެޓް ތަކަށްވުރެ މި ފޯނު މާ ލުއިވެފަ ގެން ގުޅެލަން ފަސޭހައެވެ.

ފާހަގަކޮށްލެވޭ އަނެއްކަމަކީ މިފޯނުގެ ތުނިކަމެވެ. ނަމަވެސް 8 މެގަޕިކްސެލް ކެމެރާއެއް މި ފޯނުގައި ހިމެނޭއިރު، ފޯނުގެ "ސްޓައިލަސް" ވެސް ފޯނާއި އެޓޭޗްކުރެވިފައިވެއެވެ. ސްޓައިލަސް އާއި އެކު ފޯނެއް ސަމުސެންގުން ނެރުމަކީ ގިނަބަޔަކަށް ހައިރާންކަމެއްވެސް ގެނުވި ކަމެކެވެ. ނަމަވެސް ބޭނުންކުރަން ފަސޭހަވުމާއިއެކު ސްޓައިލަސް ބޭނުންކުރަން ހިތްއެދޭ މީހުނަށް މީ ވަރަށްކަމުދާ ފޯނެކެވެ.

ކުރިން އިޝާރާތް ކުރެވުނުފަދައިން މީ ހަމައެކަނި ފޯނެއް ނޫނެވެ. ޓެބްލެޓެއްގެ ގޮތުގައިވެސް ބޭނުން ކުރެވިދާނެއެވެ. އެހެންކަމުން ގެލެކްސީ އެސް ބޭނުންކުރުމަށް ކޮންމެހެން ސިމް ކާޑެއް ބޭނުމެއްނުވާނެއެވެ. 16 ޖީބީ އާއި 32 ޖީބީ އިންޓާރނަލް މެމޮރީ ހިމެނޭ އިރު އެސް.ޑީ ކާރޑް ބޭނުން ކުރެވުމަކީ ވެސް މި އުފެއްދުމަށް ލިބިގެންދާ އިތުރު ފުރިހަމަ ކަމެކެވެ.


ސެމްސަންގ ގެ މި އުފެއްދުމަކީ 2ޖީ، 3 ޖީ އަދި 4 ޖީ ނެޓްވޯކްގައި ވެސް މަސައްކަތް ކުރުމުގެ ޤާބިލްކަން ލިބިފައިވާ ފޯނެކެވެ. 2011 އޮކްޓޫބަރ މަހު ބާޒާރަށް ނެރުނު މި ފޯނުގެ ބަރުމިނުގައި ހުންނަނީ 178 ގްރާމެވެ. 8 މެގަޕިކްސެލް ކެމެރާއެއް މި ފޯނުގައި ވާއިރު ލެޑް ފްލޭޝްއެއް ހިމަނާފައިވެއެވެ. ފްރަންޓް ކެމެރާ އަކީ 2 މެގަޕިކްސެލް ކެމެރާއެކެވެ.

ގެލެކްސީ ނޯޓް ފޯނަކީ ޓަޗްއިސްކިރީން ފޯނަކަށްވިއަސް މި ފޯނުގައި ޕެން ސްޓައިލަސްވެސް ބޭނުންކުރެވޭނެއެވެ. އެހެންކަމުން މިއީ  ސްމާރޓް ފޯނުތަކުގެ އާ ޖީލުތަކުން ފެނުން ކައިރި ސިފައެކެވެ.

މިއީ އަގު ހެޔޮ ފޯނެއްނޫނެވެ. ފޯނުގެ ފެންވަރު ރަނގަޅުވި ވަރަކަށް އަގުވެސް ބޮޑުވާނެކަމަށް ޤަބޫލުކުރެވެއެވެ. ބައިނަލްއަޤްވާމީ ބާޒާރުގައި 650 ޔޫރޯ އަށް ލިސްޓް ކުރެވިފައިވާއިރު، ރާއްޖޭގެ ފޯނުފިހާރަތަކުގައި ގާތްގަނޑަކަށް -/14،000 ދިވެހި ރުފިޔާއަށް ފޯނު އަގު ލިސްޓްކުރެވިފައިވެއެވެ. އަދި ޖީ.އެސް.ޓީއާއެކު މިއަށްވުރެ އަގުބޮޑުވާނެކަމަށް ލަފާކުރެވެއެވެ.

ފޯނު ގަންނައިރު ފޯނު ވިއްކިކަމުގެ ލިއުމުގައި ފޯނުގެ ސީރިއަލް ނަމްބަރު ޖަހައިފައި އޮތްތޯ ބަލަންވާނެއެވެ. ނެތްނަމަވެސް ސީރިއަލް ނަމްބަރު ހޯދައި ރައްކާކުރަންވާނެއެވެ. ފޯނު ވަގަށްނަގައިފިނަމަ ފޯން ބޭނުންނުކުރެވޭ ގޮތް ހެދުމަށް މި ނަމްބަރު ބޭނުންވާނެއެވެ. *#06# (ސްޓާރ، ހޭޝް، ސުމެއް، ހައެއް، ހޭޝް) މިހެން ޖެހުމުން ނުވަތަ ސެންޑް ބަޓަނަށް ފިތައިލުމުން ފޯނުގެ ސީރިއަލް ނަމްބަރު ފޯނުގެ އިސްކްރީނަށް އަރާނެއެވެ.