މި ޅެން ފުރަތަމަ ކިޔަންވާނީ މަގޭ މުނިމުނި ދަރީންގެ ދަރީން!!

އާދަމް ނަޞީރު އިބްރާހީމް (2012)

މި ޅެން ފުރަތަމަ ކިޔަންވާނީ މަގޭ މުނިމުނި ދަރީންގެ ދަރީން
      މޮޅިން  ހިތް ދަތިވެ ގިސްލާނީ މި ޖީލުގެ  ތިޔަ ދަރީންގެ  ދަރީން
           --------000---------000--------
     
ކުދިންނޭ   ކާފަމެން  ބޮޑުވީ  ގޮބޮޅިޔާ  ގިތި ފަޅޯ ކައިގެން
   ރޮދިން ރޮދިހިލި، ކިލާވެ ހަފުސްވެފައިވާ  ސޯޓުބުރި ލައިގެން
       މަދިރި، ތަންމަކުނު، ސެއްޅި ހަފާވަރުން، ރޭ ނިދި ނުނިދި ތިބެގެން
          މި ޅެން ފުރަތަމަ  ކިޔަންވާނީ  މަގޭ  މުނިމުނި  ދަރީންގެ ދަރީން

މަދަރުސާއެއް  ލޮލުން ނުދެކެން، އަށެއް ނުވަ، ދިހަ އަހަރު ވީއިރު،
    އެދުރުގެގަނޑެއް  ހުރީ   ފީ ދަނޑިފަނުގެ،    ދިހަ ބާރަ ފޫޓެއްވަރު،
         އެ ދުރުބޭ  ދަންނަނީ  ކިރިޔާ  ލިޔުން ކިޔުމާ  ހިސާބު  އަކުރު،
               މި ޅެން ފުރަތަމަ  ކިޔަންވާނީ  މަގޭ  މުނިމުނި  ދަރީންގެ ދަރީން
             
ގެއެއް މަދު ލެޕްރަސީ، ޓީބީ ގެ ސަބަބުން ގިސްލުމެއް ނީވޭ،
     މަޔެއް ނެތް ޅަފަތުގައި ދަރިފުޅަކު މަރުވެ، އެ ވޭނުގައި ނުރޮވޭ
        ހެޔެއް ނެތް ''ވިގަނި'' ނޫން ފަރުވާޔަކަށް، އެ މަގެއް ނުވެސް ހުޅުވޭ
               މި ޅެން ފުރަތަމަ   ކިޔަންވާނީ  މަގޭ   މުނިމުނި  ދަރީންގެ ދަރީން

ދިމާ ވެލި ފެންނަ ފަށުގައި އޮންނަ ރަށަކަށް ދާން ވިޔަސް، ލެފިލާ!
    ދަމާ ދަންމާނު، ހަންޖާ،  ފަލިޖަހައި  މުޅި ދެ އަތުގައި   ފޮޅުލާ،
       ހަމާ ލޯ ބޯ  އަވިން ފިއްސާ،   ލޮނާ ފަސް ހަގަޑި އިރު  މެކިލާ       
              މި ޅެން ފުރަތަމަ   ކިޔަންވާނީ  މަގޭ   މުނިމުނި  ދަރީންގެ ދަރީން

މިހާ ދަތިހާލުގައި  ހިތިވޭނުގައި ހައިހޫނުގައި  ތިބި އިރު،
     ޖިހާދުގައޭ ތިބީ ދީނާއި ޤައުމައިގެން މެ  އައްޑަންއިރު
         ނިހާޔަތުގައި ވެޔޭ އަމްނާ ސަލާމަތްތެރިކަމުގެ ވިދުވަރު
               މި ޅެން ފުރަތަމަ   ކިޔަންވާނީ  މަގޭ   މުނިމުނި  ދަރީންގެ ދަރީން
            
ތެދޭ، ހަނދުވަރުގެ މޫސުމުގައި އެ ނޫނީ ކަޅު އަނދިރިކަމުގައި
     އެ ދޭ ފޮނި ފޮނި އަރާމު ނިދީގެ އުފަލާއެކު އަމާންކަމުގައި  
        ނިދީމޭ އެނދު އަށީގައި އަތިރިމައްޗާ ބޮޑެތި  މަގުމަގުގައި
               މި ޅެން ފުރަތަމަ   ކިޔަންވާނީ  މަގޭ   މުނިމުނި   ދަރީންގެ ދަރީން