ދުނިޔޭގެ އެންމެ ބޮޑު، އޮންލައިން އިސްލާމީ ވެށި

ޢަބްދުލްމުޢީދު ޙަސަން

އިންޓަރނެޓްގައި އިލެކްޓްރޯނިކް މުޖުތަމަޢުތައް ޤާއިމްކުރަން ފެށީ ވަރަށް ފަހުންނެވެ. ނަމަވެސް، ހިކިފަނުގައި އަލިފާން ރޯވާހާ ހަލުއިކަމާއެކު، އެކަން ވައިގައި ހިފައިފިއެވެ. ނަތީޖާއަކަށްވީ، މަޑުން ނުތިބެ މުސްލިމުން ވެސް މިމައިދާނަށް ވަދެ، އިންޓަރނެޓްގައި، ވަރޗުއަލް އިސްލާމީ ވެށްޓެއް ޤާއިމްކުރުމެވެ.

މިފަދަ ވެށިތަކަކީ، ދުނިޔޭގެ ފެންވަރުގައި، ދީންތަކުގެ އަހުލުވެރިންނަށް ހުޅުވާލެވިފައިވާ ބިޔަ މައިދާންތަކެކެވެ. އެއްބަޔަކު އަނެއް ބަޔަކަށް ތަޢާރަފުވެ އުޅުމަށް، މިފަދަ ވެށިތަކުގެ ބޭނުން ހިފިދާނެއެވެ.

އިންޓަރނެޓްގައި ޤާއިމްކުރެވުނު، ވަރޗުއަލް އިސްލާމީ ވެށްޓަކީ، ސެކަންޑް ލައިފް ކަހަލަ ވެށްޓެކެވެ. މި ވެށްޓަށް ކިޔަނީ، Muxlim Pal (މުސްލިމް ފަރުދު) އެވެ. މި ވެށީގެ ކޮންމެ އަހުލުވެރިއަކު، އޭނާ ތަމްސީލު ކުރާނެ، ކާޓޫނު މީހެއް އިޚުތިޔާރުކުރާނެއެވެ. ދެން އޭނާއަށް، މުޅި ދުނިޔޭގެ އެތަން މިތަނަށް ގޮސް، އިސްލާމީ ސަގާފަތު، އެހެން މީހުންނަށް ފޯރުކޮށްދެވިދާނެއެވެ.

ރައްޓެހިންނަށް ދޭނެ ހަދިޔާ ބަދިޔާ ގަނެވޭނެ މަގު ވެސް މި ވެށީގައި ވަނީ ތަނަވަސްވެފައެވެ. މިސާލަކަށް ސައިފަތް ޕެކެޓެކެވެ. އެ ގަންނާނީ، އިންޓަރނެޓްގައި ބޭނުންކުރާ ތަފާތު ފައިސާގެ ތެރެއިން ފައިސާއަކުންނެވެ. އަދި ނަމާދު ވަގުތު ޖެހުމުން، ނަމާދުކުރާ ކޮޓަރިއަކަށް ވަދެ ނަމާދު ކުރެވިދާނެއެވެ. އަންހެނެއްނަމަ، ދޮޅި އަޅައިގެން ނަމާދުކުރެވިދާނެއެވެ.

ވަރޗުއަލް އިސްލާމީ ވެށީގެ މުއައްސިސަކީ، މުޙައްމަދުލް ފަޠާޠްރީ އެވެ. އޭނާ ވިދާޅުވެފައިވެއެވެ. "އަޅުގަނޑުމެން މި ޤާއިމްކުރީ ދީނީ ވެށްޓެއް ނޫނެވެ. އެކަމަކު، މިއީ، އިސްލާމީ ދިރިއުޅުމުގެ ވައްޓަފާޅީގެ މައްޗަށް ބިނާވެފައިވާ ވެށްޓެކެވެ."

ފަޠާޠްރީ ވިދާޅުވާ ގޮތުގައި، މިއީ، މުސްލިމުންނާއި މުސްލިމުން ނޫން މީހުންގެ ކުރިމަތީގައި ހުޅުވާލެވިފައިވާ ވެށްޓެކެވެ. މި ވެށީގެ އަހުލުވެރިންގެ ތެރެއިން ކޮންމެ މީހަކަށް ޚާއްޞަ ކޮޓަރިއެއް ވެއެވެ. އެ ކޮޓަރި، އޭނާ ބޭނުން ގޮތަކަށް ޒީނަތްތެރި ކުރެވިދާނެއެވެ. އަދި ބާޒާރުކުރާނެ ތަންތަނާއި ބޮޑު މައިދާނެއް ވެއެވެ.

މި ވެށީގައި ހިލޭ ރަޖިސްޓަރީ ކޮށްދެއެވެ. އަދި ރަޖިސްޓަރީކުރާ ކޮންމެ މީހަކު ހެދުން ގަތުމަށްޓަކައި، ޚިޔާލީ މަދު ފައިސާކޮޅެއް ދެއެވެ. އެއަށްފަހު، އިތުރު ފައިސާ ބޭނުންނަމަ، އަސްލު ފައިސާ ދީފައި އިތުރު ޚިޔާލީ ފައިސާ ގަނެވިދާނެއެވެ.

ވަރޗުއަލް އިސްލާމީ ވެށްޓަށް ޒިޔާރަތް ކުރެއްވުމަށްޓަކައި މިތަނަށް އެއްފަހަރު ކްލިކްކޮށްލައްވާށެވެ.