ކަލާފެނުމުން...
ޝަމްސުލް ފަލާޙް
01 - ބޭނުންވަނީ މުޅިހިތް އަބަދު ތިޔަ މަލުގެވާ ފޮނި ލައްޛަތަށް
ބޭނުންވަނީ އަބަދާ އަބަދު މިހިތަށް ލިބުން އާ ވިންދަކަށް
02 - ފުރަތަމަ ނަޒަރު ފެނިލީ ގޮތުން ހިތްތެޅިގަތޭ މާ ބާރަކަށް
ފުރަތަމަ ފަހަރު ކަމުގައި ވިޔަސް ހިތް ކުދިވިޔޭ މާ ފާޑަކަށް
03 - ތިޔައީމަގޭ އުއްމީދެކޭ މި ޙަޔާތުގައި ލިބުމަށް އެދޭ
ތިޔަ ޖާޒުބީ އިސްތަށިގަނޑޭ ކުރުވީ އަސަރު މާ ޒާތަކަށް
04 - ތިޔަ ލޯއެދޭ ސިގްނަލް ތަކުން ކުރަނީ އަސަރު މުޅި ހަށިގަނޑަށް
ތިޔަމާ އެކީ ހިބަ ކޮށްލުމަށް ބޭނުންވެޔޭ މާ އަވަހަކަށް
05 - ހަނދުގައި އެވާ ފަރި ރީތިކަން ނުމެ ވާނެޔޭ ތިޔަ މާވަރެއް
ކަނދުރާ ތިހާ ފުރިހަމަ ކަމުން ހެރުނޭ މިހިތް ފޮނި ކަށްޓަކަށް
06 - ތަރިތައް ވިދާ ބަބުޅާލިއަސް އަލިކަން ތިހާ ގަދަ އެއްނުވޭ
މަރިޔާދު ކަން ގެނުވައި ދެޔޭ ފެނުމުންކަލާ އަދު ހިތްތަކަށް
07 - ތިޔަ އިސްކޮޅާ ތިޔަ ރޫފަޔާ ތިޔަ ހަމުގެވާ އެ އޮމާންކަމާ
ތިޔަ ޖާދުވީ އެސްފިޔަތަކޭ ކުރުވީ މިހިތް ހަމަ މަސްތަކަށް
08 - ތިޔަ މާމަށަށް އަބަދަށް ލިބެން ކުރަނީ ދުޢާ މާތް ހަޟުރަތަށް
ފިޔައެއްވިޔަސް ހަމަ ބޭނުމޭ ތިޔަ މާވުމުން އަދު ދިރުމަކަށް
ނޯޓް: އަޅުގަނޑަކީ ޝާޢިރެއް ނޫނެވެ. ޅެން ހެދޭތޯ މަސައްކަތްކުރާ، ޅެންވެރިކަމަށް ޝައުޤުވެރިކަންހުންނަ މީހެކެވެ.