މެންދަމެއްގެ އަރާމު
އާދަމް ނަޞީރު އިބްރާހީމް/ތޮއްޑޫ (2009)
1- ފުރަމެންދަމެއްގެ ހިމޭންކަމާ ފިނިކަންވެޔޭ މުޅި ބިންމަތީ
ގުރަޔާ ކޮކާ، ކައުނާ ފަޒާ، ނިދިފައިވެޔޭ މަޑު ތަންމަތީ
2- އަހަރެން އޮތީމޭ ނުނިދިފާ، އަހަރެން އަހަންނަށް ނޭނގިފާ
ފަހަށާއި ކުރިޔަށް ވިސްނިފާ، މި ޙަޔާތު ދޭ ރިހުމުގެ މަތީ
3- ޅަދުވަސް ހިނގައްޖޭ އުދުހިގެން، ހުދު ސާފު ކާފޫރަށް ވެގެން،
ދެ ދުވަސް ކަމަށް އިޙުސާސްވެގެން، ކުރެވޭ މި ކުރު ދަތުރުގެ މަތީ
4- އަހުރެންނަކީ ފަހެކާކުހޭ؟ އަހުރެން އައީ ފަހެ ކީއްވެހޭ؟
ވަހުމެއް ނެތީ ކޮންތާކުހޭ؟ ދުނިޔޭގެ ކަށި ފާލަންމަތީ
5- އައްޔާ އަނދިރިވެސް ނުގުޅެޔޭ، ދެއްޔާ އަނގުރު ވެސް އެ ފަދަޔޭ،
ވެއްޔާ ރަޙިމު ގުޅިފައިމިވީ...! ކިހިނެއްހެ ސިއްރުން ޤުދުރަތީ
6- މަށިފަސްކޮޅެއް ނޫންހޭ މިއީ، ހަށިގަނޑުގެ މީޔޭ އަސްލަކީ،
ކުށުގައި ހެމުން ކުރި ހޯދަނީ، ފުށި ފިނޮޅެކޭ އޮތް ކަނޑުމަތީ
7- މި އެނދާ މި މަޑު ބާލީސްތަކާ، ކަފުނާ ކޮބައިހެ ތަފާތަކީ؟
މި ތަކެތި އަރާމެއް ދޭނެހޭ މި ދެލޯ މެރޭ ހިނދު މަރުމަތީ
8- އިވުނޭ ނިދާއެއް ހިތުތެރަށް، އުޑުތަކުމަތިން އައިސް މޭތެރަށް،
ވެވިދާ ތަޖައްލީ ވަގުތުގައި ހުއްޓޭށެ ގޮސް ''ކުރިފުޅުމަތީ''
9- ވައިރޯޅިއެއްހެން ނިކުމެގެން، އަހަރެން ދިޔައިމޭ ޝައުޤުގާ
ފާފައިގެ ބަރުތައް ކޮނޑުއަޅައި ހިތްދަތިކަމާއެކު މަގުމަތީ
10- ރަޙްމަތުގެ މާތް ދަރުބާރުގާ، ގޮސް ހުއްޓިހުރެ މިޙްރާބުގާ،
އަހުރެންގެ ލޯ ތެމިލީ ވަގުތު!..... ލިބުނޭ އަރާމު ނިހާޔަތީ
------------------
7 ޖުލައި 2009
ނޯޓު: ބައެއް ކިޔުންތެރިން ފާހަގަ ކުރެއްވި ''ކާފޫރު'' ގެ މައްސަލަ މި ހާރު އެވަނީ ހައްލު ކުރެވި ފައެވެ. ވަރަށް އިޚުލާޞްތެރިކަމާއެކު ޝުކުރިއްޔާ އެވެ. (11 ޖުލައި 2009- 17.35)