ހިތްކިޔާ ކަހަލަ ގޮތެއް ހުރޭ )1(
ޙުސައިން އަސްލަމު
މަރިޔަމް ގޭތެރޭގައި ވަރަށް އަވަދިނެތި އުޅެމުން ދިޔައެވެ. ގޭތެރެ ފޮޅައި ސާފުކުރުމުގައެވެ. މަރިޔަމްގެ ފިރިމީހާ ވަލީދު ގޮޑިއެއްމައްޗަށް އަރައިގެން ފަންކާ ސާފުކުރަންހުއްޓެވެ. މަރިޔަމް އުޅޭ ގޮތުން ވަލީދު ހުންނަނީ ހެވިފައެވެ.އެދެމަފިރިން އުޅެމުންދިޔަ ގޮތުން ހީވަނީ މީހަކު އެގެއަށް ޒިޔާރަތް ކުރަން އުޅެނީ ހެންނެވެ. ދެމަފިރިންވެސް ވަރަށް އަވަދިނެތި ގޭތެރެ ސާފުކުރުމުގައި އުޅެމުން ދިޔައެވެ.
"މަންދީ.. އެކަމަކުދޯ. ފަޔަށް ހިނި އަރަނީތަ؟ ހީވަނީ ދެފައިގައި އެއްޗެއް ތާށިވެގެން އުޅޭހެން. މައިތިރިވެގެންވެސް ތިކަންތަ ކުރެވިދާނެޔޭ.." ސިޓިންރޫމުގައި ހުރި ކަބަޑު ފޮހެން ހުރެފައި ވަލީދާއި ދިމާއަށް މަރިޔަމް ބުންޏެވެ.
"ކަމެއް ކުރެވެންނާއި މިހާރު ތިކަންވެސް ކޮށް ނިމޭއިރުވެއްޖައިސް. އަހަރެން ފާހަނާކޮށްލައިގެން އައިސް ތިހިރަ ކަބަޑު ސާފުކޮށް ނިނަމާލާފައި އައިސް މި ކަބަޑު ސާފުކޮށް ނިމުނުއިރުވެސް ކަލޭ ތިހުރީ ތި ފަންކާގަޑުގައި ފިރުމާލަ ފިރުމާލާ. ތީ ރީތި އަންހެންކުއްޖަކީތަ؟ ތިއަށްވުރެ ރަނގަޅުވާނެ މަގޭ އަތުގައި ބޮސްދޭން އޮތަސް.." މަރިޔަމް މަލާމާތުގެ ރާގަކަށް ވަލީދާއި ވާހަކަ ދެއްކިއެވެ.
"އައްދޭ. ތިއީ މުސްކުޅިއެއްނު. ޒުވާންކުއްޖެއް ނަމަ ރަނގަޅު ތިއަތުގައި ބޮސްދޭން." ވަލީދު ހިނިގަޑެއް ޖަހާލާފައި މަރިޔަމާއި ދިމާއަށް ފަންކާ ފޮހެން ގެންގުޅުނު ފޮތިގަނޑު އެއްލިއެވެ.
"މިހާރު މިނިމުނީ. މަންދި ތިހެން ހުއްޓާ އަހަރެން އަދި އެއްކަމެއް ކުރާނަން.." ވަލީދު ގޮޑިން ފައިބަމުން ވާހަކަ ދެއްކިއެވެ. އެވަގުތު ކޮޓަރީގެ ދޮރުހޅުވާލާފައި ނިކުތީ އެމީހުންގެ ހަގު ދަރިފުޅު ފަލަކެވެ.
"މަންމާ. ކޮޓަރި ސާފުކޮށް ނިމުނީ. އަދި ފާޚާނާއަށް ބޮތްކެއް ބޭނުންވާނެ. އެތަނުގައި ހަރުކޮށްފައި ހުރި ބޮކި ހުރީ އަނދާފައި." ފަލަކު ހެމުން ހެމުން އައިސް ވާހަކަ ދެއްކިއެވެ.
"ބައްޕަ މިރޭ އެކަން ކޮށްލާނަން. ދަރިފުޅު ދޭ ފެންވަރާލަން. މިހާރު އިރުއޮއްސެންވަނީ. މިރޭ ދޮންބެ އަންނަ ތަނަށް އެއަރޕޯޓަށް ދާންވާނެ.." ވަލީދު އެތަނުގައިހުރި ގޮނޑިއެއްގައި އިށީނނަމުން ބުންޏެވެ.
ވަލީދު އެހެން ބުނުމުން ފަލަކު ޖެހިގެން ހުރިކޮޓަރިއަށްގޮސް ވަނެވެ. މަރިޔަމް ކަބަޑު ސާފުކޮށް ނިންމާލުމަށްފަހު ބުންޏެވެ.
"ވަލީދު. ވަރުބަލިވެއްޖެދޯ. ފިނި ބުއިމެއް ގެނެސްދޭންތަ؟" މަރިޔަމްއެހެން ބުނުމުން ވަލީދު ބޯޖަހައިލިއެވެ. މަރިޔމް ކާކޮޓަރިއާއި ދިމާއަށް ހިނގައިގަތީ ވަލީދަށް، ފިނި ބޯ އެއްޗެއް ބަލައިދިއުމަށެވެ.
"ބައްޕާ އަދިވެސް އިންނެވީތޯ؟ ދޮންބެ ބަލައިދުރުވަނީ ކޮން އިރަކުންތޯ؟" ފަލަކު ފެންވަރައި ނިމިގެން ކޮޓަރިން ނުކުމެގެން ވަލީދާ ވަރަށް އޯގާތެރިކޮށް ވާހަކަ ދެއްކިއެވެ.
"ނޫން ދަރިފުޅާ. ވަރުބަލިވެފައި ހުރި ވަރުން އިނދެވުނީ. ދެން އިރުކޮޅަކުން މިދަނީ ފެންވަރާލަން. ދަރިފުޅުވެސް ދެން ދޭ އެއްޗެއް ބޯލަން. މަންމަ ވެއްޖެ އެފަރާތު.." ވަލީދު އެހެން ބުނުމުން ފަލަކު ކާކޮޓަރިއާއި ދިމާއަށް ހިނގައިގަތެވެ.
ގޭދޮރުމަތީގައި ވަލީދާ ފަލަކު މަރިޔަމް ނައިސްގެން ލަސްވެފައި ތިއްބެވެ. ފަލަކު އޭނަގެ އަތުގައި އަޅާފައި އޮތް ގަޑިއަށް ބަލައިލިއެވެ. ހީވަނީ އެއަރޕޯޓަށް ދާން ލަސްވަނީ ހެންނެވެ.
"ބައްޕާ. މަންމަހާދަ ލަސްވެއްޖެޔޭ. އަޅުގަނޑު އަންނާނަން މަންމަ ކޮބައިތޯ ބަލާލާފައި. މަޑުކޮށްލައްވައްޗޭ.." ފަލަކު އޭނަގެ ބައްޕައާއި ވާހަކަދައްކާ ގޮތަށް މާތް ކޮށްވާހަކަ ދެއްކިއެވެ.
"މަންމައަކީ ވަރެއްގެ މީހެއް. މުސްކުޅި ވީމަވެސް އުނގުޅާނެ އެއްޗެހި މަދުވަނީހެން. އެހަށް ދާންވީ މަންމަ ރީތިވާނެ އެތިކޮޅެއް ގަންނަން.." ވަލީދު މަރިޔަމަށް މަލާމާތްކޮށްލިއެވެ.
"ދަރިފުޅުވެސް އާދޭ. މަންމައާއި ދިމާކޮށްލަންދާން. އޭރުން އަވަސްކުރާނީ. އެހެން ނޫނީ ހުރެދާނެ ލޯގަނޑުކުރިމަތީގައި ފުނާއަޅާލަ އަޅާލަ.." ވަލީދު އެހެން ބުނުމުން ފަލަކު ހިނިގަނޑެއް ޖަހައިލިއެވެ.
"ބައްޕާ. އެކަމަކު މިހާރު ފުލައިޓް ޖައްސާނެ. ނޭނގެ މިހާރު ދޮންބެ ނާންނާނެ ކަމެއްވެސް.." ފަލަކު ގޭ ދޮރާށި ހުޅުވާލަމުން ބުންޏެވެ.
"ދެން ކީއްކުރާނީ. ޅަ ކިރުދޫންޏަކާއި އިނދެގެން ބައްޕަ މިއުޅެނީ. ހިނގާބަލަ މަންމަ ކުރާކަމެއް ބަލާލަންދާން.." ވަލީދު އެހެން ބުނުމުން ފަލަކު ގޭތެރެއަށް ވަނެވެ. ފަލަކުގެ ފަހަތުން ވަލީދުވސް ގޭތެރެއަށް ވަނެވެ.
ގެއަށްވަދެ ދެމައިންވެގެން ގޮސް މަރިޔަމް އުޅޭކޮޓަރީގެ ދޮރު މަޑުމަޑުން ހުޅުވައިލިއެވެ. އެވަގުތު ފަލަކު ހެމުން ހެމުން ފަހަތަށް ޖެހުނެވެ. ވަލީދު ބޯ ހޫރާލާފައި މަރިޔަމަށް ބަލަންހުއްޓެވެ.
މަރިޔަމް ލަވަޖަހާލައިގެން ލޯގަނޑުކުރިމަތީގައި ނަށާލަ ނަށާލާ ހުއްޓެވެ. ތުންފަތުގައި ލިޕްސްޓިކްޖައްސާލުމަށްފަހު ތުންފަތްވެސް ރީތި ކުރަމުން ދިޔައެވެ. ވަލީދު ކޮޓަރިއަށް ވަންކަމެއްވެސް މަރިޔަމަކަސް ނޭނގުނެވެ. ކޮޓަރިއަށް ވަނުމަށްފަހު ލަވަ ނިއްވާލިއެވެ. މަރިޔަމް ސިހިފައި އެދިމާއަށް ބަލައިލިއެވެ.
"ވަލީދޫ. ތިކުރީއްކީއްތަ؟ ޝަކީރާގެ އެ ލަވަ ހާދަ ރީއްޗޭ. އަހަރެން ވަރަށް ޝަކީރާއަށް ވާންބޭނުން.." މަރިޔަމް ނުރުހިފައި ކަހަލަ ގޮތަކަށް ވާހަކަ ދެއްކިއެވެ.
"ޝަކީރާއޭ. ބަލަ މުސްކުޅިވެގެން އަނގައިގެ ދަތްކޮޅުވެރި ޕޮޕްސް ލައްވަނީ. އެކަމަކު ބުނެފިއެއްނު ޝަކީރާއަށްވާށޭ. ކަލޭ ތިއްތިވާކަށް ވަގުތެއް ނެތް. އެސޮރު ބަލާއެއަރޕޯޓަށް ދާގަޑިވެސް ޖެހިއްޖެ. ދެން ކީކޭ ބުނާނީ. މިވަރު ޅަ ކުއްޖެއް ދެން ލިބޭނެ.." ވަލީދު މަރިޔަމް އުޅޭގޮތުން އަބަދުވެސް ދިމާކުރެއެވެ.
"ތެދެކޭދޯ. ބަލަ އެސޮރަށްވެސް އަހަރެން ފެނުނީމާ މަންމަ އަދިވެސް ހާދަ މޮޑިއުލްލޭ ބުނާއަޑު އަހާލަންވެސް އަހަރެން ބޭނުމޭ.." މަރިޔަމް އިނގިރޭސި ތަންކޮޅެއްލައިގެން ވާހަކަ ދެއްކިއެވެ. އިނގިރޭސިން ވާހަކަ ދައްކަން ނޭނގުނަސް މަރިޔަމް ވާހަކަ ދައްކާއިރު އިނގިރޭސި ބަސް ބައެއްފަހަރު ބޭނުން ކޮށްލާނެއެވެ. ވަލީދު ހިނިގަނޑެއް ޖަހައިލިއެވެ.
"މަންމާ. މޮޑިއުލެއް ނޫން. މޮޑެލް.." ފަލަކު ހެމުން ހެމުން ކޮޓަރިއަށް ވަނެވެ.
"ދެން ހެވޭ. ހިނގާދާން.." މަރިޔަމް ރީތިވެ ނިންމާލުމަށްފަހު ކޮޓަރިން ނުކުތެވެ. ކޮޓަރިން ނުކުމެފައިވެސް ލައިގެން ހުރި ހެދުން ރީތިތޯ ބަލަންފެށިއެވެ.
"އެކަމަކު ދޯ. މިހާރު އަށްގަޑި ބައިވީ. ނޭނގެ މިހާރު އެސޮރު މާލެވެސް ނާންނަކަމެއް. މިވަރުގެ މީހެއް ގޮވައިގެން ތަނަކަށް ދެވޭތަ؟" ވަލީދު ވާހަކަ ދެއްކީ ހިތް ހަމަނުޖެހިގެން ހުރެއެވެ.
އެންމެންނަށް ދޮރާއި ދިމާއަށް ބަލައިލެވުނެވެ. އޭރު ދޮރުހުޅުވާލާފައި އެތެރެއަށް ވަނީ އެމީހުންގެ ދޮށީދަރިފުޅެވެ. މަރިޔަމް އެސޮރާއި ދިމާއަށް ވަރަށް ރީއްޗަށް ބަލަން ހުރެފައި ހިނިތުންވެލިއެވެ.
"މަންމާ.." އޭނަ މަންމައަށް ގޮވައިލުމަށްފަހު ފޮށި ހިފައިގެން އެތެރެއަށް ވަނެވެ. މަރިޔަމް ހެމުން ހެމުން އެސޮރާއި ދިމާއަށް ހިނގައިގަތެވެ.
"ދަރިފުޅާ ހާޝިމް. އަދި މަންމަމެން މިއުޅެނީ ދަރިފުޅު ބަލާދާންވެގެން. ވަރަށް ބޮޑަށް ސޯރީ.." މަރިޔަމް އައިސް ހާޝިމްގެ ގައިގައި އޮޅުލައިގަތެވެ.
ވަލީދާއި ފަލަކު އުފަލުން ހާޝިމު ގާތަށް އައިސް ހުއްޓުނެވެ. މަރިޔަމް ހާޝިމް އަތުގައި ހިފައިގެން އެތެރެއަށް ވަނެވެ.
"މަންމާ. ކޮން ސޯރީއެއް. ސޮރީ އޭ ބުނެބަލަ. އަދިވެސް މަންމަ ހާދަ ޔަންގޭ." ހާޝީމް މަރިޔަމްގެ ބޮލުގައި ފިރުމާލަމުން ބުންޏެވެ.
"ދަރިފުޅާ. މަންމަ ރީތިކަމުން ބައްޕަ ވަރަށް ދިމާކުރޭ. އެކަމަކު މަންމަ އަށްވުރެ ރީތި މީހެއް ބައްޕައަށް ލިބޭނެހެން ހީވޭތަ؟ އަބަދުވެސް ކިޔާނީ މަންމައަކީ ބޮޑު މުސްކުޅިއެކޭ. މަންމައަށް އެނގޭ މަންމައަކީ މޮޑިއުލެއްކަން. ދަރިފުޅުވެސް އެކަން ގަބޫލުކުރަމެއްނުދޯ.." މަރިޔަމް ދެއްކި ވާހަކައިން ހާޝިމަށްވެސް ހެވުނެވެ. މަރިޔމް އަބަދުވެސް އޭނަގެ ރީތިވާހަކަ ދައްކަން އުޅެއެވެ.
"މަންމާ. މަންމަ ތިއީ ޝަކީރާއެއްނު ދޯ.." ހާޝިމް އެހެން ބުނުމުންމަރިޔަމް ތުއިގޮތަކަށް ހނިތުންވެލިއެވެ. ވަލީދު ހޭންފެށިއެވެ.
"ޔަގީނެއްނު..." މަރިޔަމް ބުންޏެވެ.
"މަންދީ. ދެން ފޮނި ނުދައްކާ ހިނގާ ހާޝިމަށް ކާއެއްޗެއްދޭން. އެސޮރު އެހުރީ ވަރަށް ވަރުބަލިވެފައި. ދަރިފުޅު ދޭ ފެންވަރާލަން. " ވަލީދު އެހެން ބުނުމުން ހާޝިމް ވަނީ ކޮޓަރިއަށެވެ. ފަލަކުވެސް ބަދިގެ ފަރާތަށް މަރިޔަމާއެކީގައި ދިޔައެވެ.
މަރިޔަމް ކާން ހަދާފައި ސޯފާގައި ޒީޓީ ވީ ބަލަން އިނެވެ. ފަލަކުވެސް ޖެހިގެން ޑްރާމާ ބަލަން އިނެވެ. ވަލީދު ކޮޓަރިން ނުކުމެގެން އައިސް ސޯފާގައި އިށީނެވެ.
"މަންދީ. އަދިވެސް ހާޝިމް ފެންވަރާއިގެން ނާންނަނީތަ؟" ވަލީދު އެއްޗެކޭ ކިޔާހެންވެސް މަރިޔަމަށް ހީވެސް ނުވާކަހަލައެވެ. ޑްރާމާއަށް ގެއްލިފައި އިނީއެވެ.
"މަންމާ. ސިންދޫރާ މިފަހަރު ސަލާމަތްވާނެހެން ހީވޭތަ؟" ފަލަކުވެސް ޑްރާމާ ބަލަން އިނދެފައި ބުންޏެވެ. ފަލަކު ދެއްކި ވާހަކަވެސް މަރިޔަމަކަށް ނީވުނެވެ. މަރިޔަމް އިނީ ޑްރާމާއަށް ގެއްލި ހުސްވެފައެވެ.
(ނުނިމޭ)