ބިސްމިއަކީ، ކީރިތި ޤުރުއާނުގެ ފެށުން ކަމުގައިވާ އަލްޙަމްދުގެ ހަތް އާޔަތުގެ ތެރެއިން ފުރަތަމަ އާޔަތެވެ. އެހެންވީމާ، ބިސްމިއަކީ ކީރިތި ޤުރުއާނުގެ ފުރަތަމަ އާޔަތެވެ. ޢަރަބި ބަހުން ބިސްމިއަށް ކިޔަނީ ބަސްމަލާ އެވެ. ބިސްމީގެ މާނައަކީ، "ރަޙުމާނުވަންތަ ރަޙީމުވަންތަ ﷲ ގެ އިސްމުފުޅުން (ފަށަމެވެ)." މުސްލިމުން ކުރާ ކޮންމެ ހެޔޮކަމެއް މިއާޔަތުގެ ބަރަކާތުން ފެށުމަށް، ކީރިތި ރަސޫލާވަނީ، އިރުޝާދު ދެއްވާފައެވެ. ޢަދަދުގެ ގޮތުން މިއާޔަތް ދިރާސާކޮށް ބެލިއިރު، އިޢުޖާޒުގެ ޙަޤީޤަތްތަކެއް ކަޝްފުވިއެވެ. މި މަޒުމޫނުގައި ބަލައިލާނީ އޭގެ ތެރެއިން ބައެއް ޙަޤީޤަތްތަކުގެ މައްޗަށެވެ. މި ޙަޤީޤަތްތަކުގެ މައްޗަށް ނަޒަރުހިންގައި ބަލާއިރު، ކީރިތި ޤުރުއާނާ އެއްފަދަ ފޮތެއް އުފެއްދުމަށް އިންސީންނާއި ޖިންނީންނަށް މާތްﷲ ޖައްސަވާފައިވާ ގޮންޖެއްސެވުމުގެ ބޮޑުކަން ހާމަވެއެވެ.