އާދަމް ޢަބްދުއްރަޙުމާން (އުތީމު)
ފިލައި ދިޔައީ ފިކުރު ޒިހުނާ ބިލާހުގެ އެޅުވިގެން ގަހަނާ
ކިލާކޮށް ރައްކަލީ ދަހަނާ ވިލާ ކަނޑުގައި ނުލާ ފީނާ
ރުކުންތަކުގައި ހިފާ ބައްޔަށް ސުކުންތައް ބަދަލުކޮށް ފިއްޔަށް
ހުކުމްތައް ލިޔެވިދާ ދެއްޔަށް ވަނީ ހާކިމްގެ އަތް ބާނާ
ފަގީރުން މަހުޖަނުން ތޮޅުވައި ހަގީގަތް ސިއްރުކޮށް ފޮރުވައި
ފަގީހުން މީގެ ތަށި ލޮޅުވައި، ދަނީ ތޮޅެމުންނެ މާތް ދީނާ
އަންވަރު އިބްރާހީމް
ތިމާމެންގެ ދުނިޔޭގެ ހިތް ހުއްޓެނީ ޖަމާޢުގެ އެހީ ނުލިބިގެން މަރުވަނީ
ހިމާޔަތް ނުލިބިގެން ސަލާން އެ ޖަހަނީ ތިމާވެށި ރޮމުން ގިސްލަމުންނޭ ދަނީ
މަލާ އޭގެ ތާޒާކަމާ ގުދުރަތުން ޠަލާވާގެ ރަހަތައް ލިބުނު ނިޢުމަތުން
ނުލާ ނޫޅެވޭ ފެހިކަމާ ވަކިވެގެން ވެލާވެލި ރޮމުން ގިސްލަމުންނޭ ދަނީ
މަހާ މަސް ދިރުންތައް ގެދޮރު ގެއްލިގެން އުޅޭހާލު ޝަކުވާތަކޭ އެކުރަނީ
އަހާ އޭގެޝަކުވާ ކޮޅުންލީހިނދުން ކަނޑޭ ބޮޑު ރޮމުން ގިސްލަމުންގެންދަނީ
އަންވަރު އިބްރާހީމް
އެ އަލިގަދަ ނޫރު އިސްލާމީ ހެމުން ފެތުރިއްޖެ މައްކާގައި
އެ އަގުހުރި ފަތަޙަ ރަން އަކުރުން ފަވައިފިޔެ އުންމަތުގެ ހިތުގައި
ކުދާގެ މަގަށް އިތުރު ޝަރަފެއް ލިބެވި ތާރީޚު ވެސް ނުދެކޭ
ނުދާން ވަރުދެއްކި ހުރި ބިޔަ ތަދު ފިލައިފިޔެ އުންމަތުގެ ބޮލުގައި
ޝަހާދަތު މާތްވި ކަލިމައިގައި އެވާ ޢިއްޒަތް އުފުލިގެން ގޮސް
ޖަހާލަތު އިސްޖަހައިފި ރޮމުން ބަލިވެ އުންމަތުގެ ސިކުނޑީގައި
ޢަބްދުލްޢަޒީޒު ޖަމާލު އަބޫބަކުރު
ދުނިޔެ ވެސް ލަދުގަންނަނީ ހެޔޮ ބަސް ބުނާތީ އަޑުއަހަން
ކުނިގަނޑެއް ކަމުގައި ތިމާ ވާތީ، ކަމެއް ރަނގަޅަށް ކުރަން
ދިރިއުޅޭ މީހުން މިތާ ޣާފިލުވެގެން މޮޔަވެސް ވުމުން
ހިރިނުލައި ހަމަ އޮންނަނީހޭ ވާ ގޮތެއް ތިޔަހެން ބަލަން؟
ކަޝްފު ވެސް ވީމާ މިތާ ލަދުވެތިކަމުގެ ފަރުދާ މުޅީން
އަސްލުގައި ލަދުގަންނަ ގޮތް ވީހޭ ދެލޯ ހުޅުވައި ބަލަން؟
އަންވަރު އިބްރާހީމް
ނަސްލުގައި ޖަހަމުން މިދާ ވިންދުގެ ދެލީން ލިޔަމުންދަނީ
ވިސްނުމާ ފިކުރާ ޚިޔާލުގެ ދޯދި ރަން އަލި ފަތުރަނީ
ކޮންމެ ދުވަހަކު ކޮންމެ ވަގުތަކު ކޮންމެ ހާލެއްގައި ވެގެން
ކުންނުތައް އެކި ކަންކަމުން ފެންނާނެހެން ކުރަހައިލަނީ
ދެންމެ ހިނގި، ހިނގަމުން އެ ދާހާ ހާދިސާތައް ކަންކޮޅުން
އެންމެ ތާޒާކަންމަތީ ނެރެ ހާމަކޮށް، ތިލަކޮށްލަނީ
ޢަބްދުލްޢަޒީޒު ޖަމާލު އަބޫބަކުރު (މާވަށު އަޒީ)
ޖޯޝާއެކު އިއްވާށަ ދުލުން
ލޯތްބާ ކުލުނާއެކު އުފަލުން
صلى الله علـى محـــمد
صلى الله عليــه وسلــم
ލޯހުޅުވޭ ހިނދު ހެނދުނާ
ފޯރިދެމުން ޖިސްމަށް ނަފުސާ
ޖޯޝުން ލޯބިން ކިޔަމާ
صلى الله علـــى محــــمد
صلى الله عليــــه وسلــــم
އަންވަރު އިބްރާހީމް
ދުވާލަކު 75 ހާސް މީހުންގެ ހިތްހަމަ ޖެހުމަކަށްވި އެމެރިކާގެ މެޖިކް ކިންގޑޮމް ތީމް ޕާކް ބަންދުކުރީ ހެއްޔެވެ؟
ހަފުތާއަކު 343 ހާސް މީހުންގެ ހިތްފަހިކަމަކަށްވި ޖަޕާނުގެ ޓޯކިޔޯ ޑިޒްނީ ލޭންޑު ހުސްވީ ހެއްޔެވެ؟
މަހަކު 960 ހާސް މީހުންގެ ފޫހިކަން ފިލުވައިދިން ޗައިނާގެ ޝަންހާއީ ޑިޒްނީ ލޭންޑް ފަޅުވީ ހެއްޔެވެ؟
ޢަބުދުލްޢަޒީޒު ޖަމާލު އަބޫބަކުރު (މާވަށު އަޒީ)
ކުރާއިރު އަޅުކަމެއް ރަނގަޅަށް ކުރަން ބޭނުން ވަނީވިއްޔާ
ފުރާނައަށާއި ނަފުސަށް ހަމަޖެހުން ބޭނުން ވަނީވިއްޔާ
ޘަވާބާ ދަރުމައަށް އެދިގެން ކުރާ އިރު އަޅުކަމެއް، ޚަލްޤުން
ދަވާއެއް ހިތުގެ ބަލިބައްޔަށް ތިމާ ބޭނުން ވަނީވިއްޔާ
ދިމާވާ ކޮންމެ ތަކުލީފެއް ތިމާއަށް ލުއިވުމަށް އެދެމުން
ޙިމާޔަތް ދެ ދުނިޔޭން ނަފުސަށް ތިމާ ބޭނުންވަނީވިއްޔާ
އާދަމް ޢަބްދުއްރަޙުމާން (އުތީމު)
ނޭނގި ތިއްބައިތޯ އައިސް ގިނަވީ ބަޔަކު ތިންދުހުތެރޭ
ގޭގެއާ ހޮޓަލާ ކެފޭ ވިޔަފާރިއާ މުޅި ރަށު ތެރޭ
ސިއްރުސިއްރުންތޯ އައީ ކަނޑުގައި ފަތައިފައި ތޮށިމަތީން
ހިތް ރުހޭ އުފަލާއެކީ ކުޅިވަރު ކުޅެން މަޖަލުގެ ތެރޭ
ފޯމުތައް މަދުތޯ ފުރުން ދިހަ ސޮއި އަޅައި ތައްގަނޑު ޖަހައި
ހޯދުމަށް އޮތް ހުއްދައެއް ލިބިދާނެ އޮތް މިންގަނޑު ތެރޭ
އަންވަރު އިބްރާހީމް (1441ހ.)
ކަންކަން އިހު ކުރި ގޮތުގައި ނުކުރާން އަންގައިދޭތީ ފުރަބަންދެއްގައި
ކަންކަން ކުރުމުގެ މަތިވެރި ގޮތުގައި ވިންދޭ ޖަހަނީ ގުނަވަންތަކުގައި
ގޭގައި އާކޮށް ކުލަލާން ނޭދެން ދައްކަން ނަލަކަން ވަގުތީ ގިރިޓީން
ތަގުވާ ހުވަނދޭ ލާނީ މި މަހުން ނަފުސާއި ހިތާ މުޅި ހަށިގަނޑުގައި
މާހެފުމެއް ވެސް ނުހަފަން މިފަހަރު މާޖައްސައިގެން އެކިއެކި ވައްތަރު
ދާހެން ނެތިގެން ހަފަމުން ދާނީ ނީހައިގެ ހަސަދަ ވީ މޭގަނޑުގައި
އަންވަރު އިބްރާހީމް
ކިޔެވި އިނގިރޭސި އިސްކޮށްގެން ދިވެހި ދޫ ފިހި އެއިން ވިރިގެން
ދިވެހި ގޮތްތައް ފިލައި މި ދަނީ ބަހަށް ކަރަތަކުގެ ގޮތް ވަދެގެން
ގަހެއް ނުފަޅާ މި ފަސްގަނޑަކުން، މަހެއް ނުފެނޭ މި މަސްކަނޑަކުން
ފަހެއް ނުފެނޭ މި ތުނޑިތަކަކުން ޓްރީ ފިޝް އަދި ސޮއިލް ވަދެގެން
ނެތޭ ތަރިއެއް ދިވެހި މި އުޑަކު ނެތޭ ދިއްލޭ ހަނދެއް މި ފަލަކު
ނެތޭ އަލިފާން އިރެއް ކައުނަކު، ސްޓާރ، މޫނާއި ސަން، ވަދެގެން
ޢަބްދުލްޢަޒީޒު ޖަމާލު އަބޫބަކުރު (މާވަށް)
އައިހިނދުން ރަމަޟާން ކަރީމަށް އުފަލުގައި ބައްދަލުކުރޭ
ހައި ނުކޮށް އަޅުކަން ކުރުން ނަފުސަށް ތިމާ ލާޒިމުކުރޭ
ކޮންމެ ދުވަހަކު ފަޖުރުނުލަނީސް ހާރުކައިގެން ރޯދައަށް-
ހުންނައިރު، ޞަދަޤާތްދިނުން ވިސްނާ! ތިމާ މިސްކީނުނަށް
އޮންނަ ފުރިހަމަ ގޮތްމަތީން ރޭގަނޑުގެ އަޅުކަން ގިނަކުރޭ!
އަންވަރު އިބްރާހީމް (2020)
ފަތުރުވެރިކަން މިއަދު ގިސްލައި ރޮމުންދޭ ފުން ހިތާމައިގައި
ދަތުރުގައި ކޮވިޑް ދިން "ހަދިޔާ"ގެ ވޭނާ އޭގެ ޢިބްރަތުގައި
ފަޅާ އަލި ނޫ ވިލާ ތިލަތައް ސުކޫތަށް ހުއްޓިލައި މި ހިނދަށް
އަޅާ ކަރުނައިން ނުހިކި ދިޔަވަރު ބަދަލުވެދެޔޭ ޠަބީޢަތުގައި
ގަލާ މުރަކައިގެ ބުސްތާނަށް ލިބުނު ހައިރާންކަމާއެކުގައި
ވެލައި ފަރި މަސްމަހާމެހި ނެށި ނެށުން ހުއްޓައިފި ހަނދުމައިގައި
އާދަމް ޢަބްދުއްރަޙުމާން (އުތީމު)
ނަންތަކުން ރީތި ޒީނަތް މި އުއްމަތް ކުރޭ
ކަންތަކުން ވާނެ ފައިދާ ޢަމަލު ގިނަކުރޭ
ތިމަތިމާމެންގެ މަޞްލަޙަތުގައި ބަގުޑިލައި
ދިމަދިމާއިން ދަމައި ހޯދުމަށް ފާރަލައި
ނިމަތަކުން ތިޔަ ނަގާ އަތްތަކަށް ބާރުލައި
ހިމެނުމުން މިލްކުތައް ސާފު ޠާހިރުކުރޭ
އަންވަރު އިބްރާހީމް (2020)
ދަރުސް ޙިކުމަތުގެ ޢިބްރަތްތައް މި ދޭހުން ބުނެ ނުދޭ ހެއްޔޭ؟
ދުވަސް ވަގުތާ ޒަމާނުގެ ދޫ ބުނާ ވާހަކަ އެނގޭ ހެއްޔޭ؟
އެތައް މޭލެއް ދުރަށް ގޮސް ތިބި އެތައް ހިތަކަށް އަސަރުކޮށް ފިހި
ހިތަށް ކެތް ނުވެވި ގައުމު މަތިން ހަނދާންކޮށްދީފި ނޫން ހެއްޔޭ؟
ދަރިންނާ އާއިލާ އެކުގައި ގުޅުންތައް ބަދަހިވާނޭހެން
ކުރިން ނުލިބޭ ރަނުގެ ފުރުޞަތު ހިލޭ ލިބިދީފި ނޫން ހެއްޔޭ؟
އަންވަރު އިބްރާހީމް (2020)
ދުސްތޫރު ނުދެކޭ ބާރުތައް ލިބި، ދުނިޔެ އަދު ހިންގައިދެނީ
ނަސްލާ ޒަމާން ނުދެކޭ އިހަށް ބަޠަލުންގެ ދަރަޖައިގައި ވަނީ
ތިންބާރު ވާ ހިރިނުލެވިފައި ހާލަތު ގެނެސްދިން ވޭނުގައި
ކަންކަން މި ގައުމުގެ އެންމެހައި ނިންމާ ވެރީން ކަމުގައިވަނީ
ޒާތީ ހަޔާތް ނައްތައި ހަނދާން އެކު މައިންބަފައިންނާ އާއިލާ
ރޯތީ ދުނިޔެ ގިސްލައި މިއަދު އެ އަޑަށް އިޖާބަ ދެމުންދަނީ
ޢަބްދުލްޢަޒީޒު ޖަމާލު އަބޫބަކުރު
ރަޙުމަތާ ބަރަކާތް އޮހޭ މޫސުމް މިއަދު ކުރިމަތިވަނީ
އަހުލުނަށް ގިނަގުނަ ޘަވާބުން ކުރިމަގޭ ރޯޝަންވަނީ
ވަހުމުތައް ދޫކޮށް ޞިރާޠުލްމުސްތަޤީމަށް ގެންދަނީ
ހެޔޮ ޢަމަލުތައް ގިނަކުރުން އޭ އޮތް ތިބާއަށް ފުރުޞަތެއް
ހެޔޮ ކަމާ ގިނަ ދަރުމައިން މަންފާ ލިބޭނޭ މޮޅު ގޮތެއް
ހެޔޮ ބަހެއް ނޫނީ ނުބުނެ ހުރުމޭ އަބަދު ލާޒިމު ވަނީ
އަންވަރު އިބްރާހީމް (2020)
ކޮން ކަމެއްހޭ ކޮށްނުދީ އަހަރެން ހުރީ ތިޔަ ހައްގުގައި
އެންމެ ބޭނުންވީ ވަގުތު އެއްލައި ލަނީހޭ ފާޅުގައި
އެންމެ އަގުހެޔޮ ކުޑަ މުސާރައިން ނުފުދިގެން ގޮތްހުސްވިކަން
ދަންނަނީ ފަހެ ކާކުހޭ މި ތެޅޭ ތެޅުން ގަނަ ހާލުގައި
ރައްކަލެއް ނެތް ހޮހަޅައިން ތޮއްޖެހި އުޅޭ ބިކަ އުޅުމުގައި
ހައްގުތައް މަންމަން ވިޔަސް ކިޔަމަން ނުވަންހޭ ވޭނުގައި
މަރިޔަމް ރަފީޢު (މަރިޔާދު)
އަދު ކޮރޯނާ ނިކަން ބާރަށް ފެތުރި، ދުނިޔެއެ ހުއްޓުމަކަށް މިދަނީ!
މަދު ބަޔެކޭ މި ކަންކަމަށް ނަޒަރު ދެނީ!
އަދު ގައިމޭ އެކީ ނަފުސާ މުޅި ޢާލަމް ހަނާވެ ދަނީ!
މަދުބަޔެކޭ މި ކަންކަމަށް ނަޒަރު ދެނީ!
އާދަމް ނަޞީރު އިބްރާހީމް (11.04.2020)
ހަނަފަސް ހިމޭން ސަހަރާއެކޭ ދިރިއުޅުމަކީ
ފިނިފެންމަލުގެ ބުސްތާނެކޭ މި ޙަޔާތަކީ
ލޯބީގެ ދުނިޔެއަކަށް ތިބާ ގެއްލިއްޖެ ނަމަ،
ލޯބީގެ ޙާނަތެކޭ އެޔަށް ފަހު ވަގުތަކީ
ދަންވަރުގެ ކަޅުކަން ރޭގަނޑާއެކު އާދެޔޭ،
ރަން އަލިކަމެއް ދޭ ފެށުމެކޭ އާ ފަތިހަކީ