ކާކު އެދެނީ؟
އަހަރެމެން ކުރެ ކާކު އެދެނީ އަނެކުނަށް ވުރެ ރަނގަޅުވާން
ފަހަރުގައި ވެވުނަސް ކުށެއް އެ ކުށުން އިޢާދަވެ ބަދަލުވާން
ނުނިޔަތާ ނީހައިގެ އަސަރެއް ފެނިލިޔަސް އޭނާ ކިބައިން،
ތުނި އޮމާން ހިތަކާއެކީ ގޮސް އިސްވެ ލޯބިން ޞުލްޙަވާން
އަހަރެމެން ކުރެ ކާކު އެދެނީ އަނެކުނަށް ވުރެ ރަނގަޅުވާން
ފަހަރުގައި ވެވުނަސް ކުށެއް އެ ކުށުން އިޢާދަވެ ބަދަލުވާން
ނުނިޔަތާ ނީހައިގެ އަސަރެއް ފެނިލިޔަސް އޭނާ ކިބައިން،
ތުނި އޮމާން ހިތަކާއެކީ ގޮސް އިސްވެ ލޯބިން ޞުލްޙަވާން
ޚުލްޤަކީ ގަހަނާއެކޭ ނަފްސެއް އެއިން ޒީނަތްކުރާ
ޚުލްޤަކީ އެޚަޒާނަޔޭ ހެޔޮ ޢަމަލު މީޒާން ބަރުކުރާ
ޚުލްޤަކީ ޖާހިލުކަމުގެ ބަނަކަން ޙަޔާތުން ފޭކުރާ
ޚުލްޤަކީ ދަންމަރެކެ ރޯކުރެވޭ ޙަޔާތަށް އަލިކުރާ
ޚުލްޤަކީ މަގެކޭ ނިފާޤުގެ ސިފަތަކުން ދުރުހެލިކުރާ
ޚުލްޤަކީ ބާރެއް އެއިން ހިތްތައް މުޅިން ޠާޙިރުކުރާ
އެންމެ މަތިވެރި އެންމެ މާތް ދީނޭ މިއީ އިސްލާމްދީން
އެންމެނަށް ހަމަހަމަކަމޭ ހޯދައިދިނީ އިސްލާމްދީން
އަޚުކަމެއް ޤާއިމްކުރެވި މާތް އުންމަތުގެ އަހުލުންތެރޭ
ފަޚުރުވެރިވެރި އުންމަތް އެކަތިގަނޑަކަށް ހެދީ އިސްލާމްދީން
އަނދިރިކަން ޝިރުކާއި ޖާހިލުކަން ހިތުން ފުހެވޭ ގޮތުން
މަދަދު ދެއްވާ މާތް ފޮތެއް އޮތް ދީނަކީ އިސްލާމްދީން
ހެޔޮނުބައި ވަކިކޮށް މިތާ ދުނިޔޭގެ އުނދަގޫ ދަތުރުގާ
ހެޔޮމަގަށް ތަޢުފީޤު ދެއްވާ ދީނަކީ އިސްލާމްދީން
މަސްތުވެ ވަބާގައި ޖެހެވިގެން، މަގުއޮޅި ދެދުނިޔޭން ގެއްލިގެން،
އަސްތާ! މަގޭ ނިކަމެތިވެގެން، މިދަނީ އެޅުނު ކަތި ފިޔަވަޅުން
ހެއްލެވި ޒަމާނުގެ ދަޅަތަކަށް، ލެނބި ހިތް އެމަސްތީ ލައްޒަތަށް
ގެއްލުނު ޢަބުރު ފުން ކަނޑުތެރަށް، އެދުވަހު އެޅުނު ކަތި ފިޔަވަަޅުން
އޭރުގަ މަގޭ ގާތް އެކުވެރިން، ދިންހާ ނަޞޭޙަތް އަނބި ދަރީން
އޭރުގަ އެއަޑު ނާހާ ރުޅީން، ދެވުނީ އެޅުނު ކަތި ފިޔަވަޅުން
"މަސްވެރިންނޭ" ބުނެލުމުން، ހިވޭ އެއީ ހުސް ފިރެހެނުން
"މަސްވެރިންނީ" އަސްލުގައި ،ހީވާގި މިއުޅޭ އަންހެނުން
ކޮންމެ ރެއަކުމެ ފަޖުރުތަރި އެރުމާއެކީ ހަމަ އާދައިން
ކޮއްތުތަށި ތައްޔާރުކޮށް ފަގެނެސްދެނީ ދެނީ ބަލަ އަންހެނުން
ގޮސް ތިބޭނޭ ގޮޑުދޮށަށް، އޮޑިގޮސް އޮބާލާންދެން ބަލަން
އޮއްސުނަސް އިރު އޮޑި ލަފާތޯ އަތިރިއަށް ދޭ އަންހެނުން
ހައްސަބައިގެން ދިދަޖަހާ، އޮޑިތައް ނެރުން ވަނުމާއެކީ
އަސްތަ! ފަރިވަޅުތައް ހިފައިގެން އަންނަނީވެސް އަންހެނުން
މާފުށްކައިގެން މިތުރުން ދަތްތައް ހުދު ހަޑިކޮށްގެން
އެރޭ ނިދަން ދެމިތުރުނޭ ގެޔަށް ދިޔާ އަދިރިވުމުން
ގެއަށް ނިދާން ނުދާންވެގެން އަނގަ ގަދަ މިތުރޭ އެދިޔާ
ގެއަށްވުރެން ފިނިވާނޭ ކިޔާ އަތިރި ހޮޅުއަށްޓާށް
އިސާހިތަކު އޮށޯތްތަނާ އަނގަ ގަދަ މިތުރަށް ނިދުނޯ
އެހިނދު މިތުރު ގުގުރިދަމަން ފެށީ އަޑުގެ ނެތްތަނަށޯ
ކުއްލިއަކަށް މާގަދަ އަޑު ފަށްގަޑެކޭ އިވެންފެށީ
ތަންގަނޑު މުޅި އަލިވެގެނޭ އަލިފާން ކަނި ބުރަން ފެށީ
ނަޞްރުﷲ ޚަލީލް، ނޮޅިވަރަން
ރާގު: ޔޭ މެރީ މަންޒިލް ބަތާ....
ދޭހުގާ ލިބުމެއް ނެތަސް އޭނާ ހަނދާނޭ އާވަނީ
ރޭހުގާ ބާކީވިޔަސްވެސް ދުރު ހަނދާނާ ނުވެވެނީ
މިގޮތުގާ ހުންނަންވުމުން ކުރެވޭ ފިކުރު ކަރުނައިތެރޭ
މިގޮތުގާ ވިރިހިތް ދިޔަސް ޔާރާ ހަނދާނޭ ދެމިވަނީ
އެތަށް ޤަރުނެއްގެ ޖާހިލުކަން ، ދަނީ ވަކި ހިއްޕަމުން ބާރަށް
ގެތަށް ރޯކޮށް ބިމަށް ތިރިކޮށްލަނީ ،ހެދުމަށްފަހުން އަޅިއަށް
ފަހެއް ނުޖެހޭ ޤަތުލު ކުރުމަށް، ކުށެއްނެތް ތުއްތު ޅަދަރިންތައް
ލަހެއް ނުމެކޮށް ބަޑީގެ ވަޒަން، ޖަހާ ހަދަނީ އަޚުންގެ މެޔަށް
ލޮލުގެ ކަޅިވިދި ދެލޯބޮޑުވޭ ، ބިރުން ފުރިފައިވުމުން ހިތްތައް
ލޮލަށް ހަމަނިދިފިޔެއް ނުޖެހޭ، އިވޭ ގަދަފަދަ ބަޑީގެ އަޑަށް
ފަތް ތަކުތެރޭވާ ވިހަ ފަތެއް، ބޭނުން ކުރަން ނުމެވާ ފަތެއް
ދަތްތަކުގެ އަލި ކަނޑުވާ ފަތެއް، ތުންފަތްވެ ކަޅު ހަޑިވާ ފަތެއް
ސުއްޓާގެ ގޮތުގައި ވާ ފަތެއް، ސިނގިރޭޓްގާ ހިމެނޭ ފަތެއް
ހުއްޓާލުމަށް އުނދަގޫ ފަތެއް، ދުފުމުގެ ތެރޭ ކެވިދާ ފަތެއް
ހަށިއެތެރެ ފާރުކުރާ ފަތެއް، ލޭ ހޮޅި އެތަށް ބައްދާ ފަތެއް
މަސްތުގައި ތިއްބާ މިތާ، މަރު އައިސް ގޮވާލާނޭ އިނގޭ
އަސްތަ އަސްތާ އެހިނދުގާ، ތަޢުބާ ކުށަށް ނުވެވޭ އިނގޭ
ނަސްލަކުން މޮޅު އައިސްވިޔަސް، ކުރެވޭ ކަމެއް ހަމަ ނޯވެޔޭ
ބަސްބުނާ ހިނދުކޮޅުތެރޭ، ދުނިޔޭން ތިބާ ނިމިދޭ އިނގޭ
ރަސްކަލެއް ކަމުގާ ވިއަސް، ބާރެއް އެހިނދު ލިބުމެއް ނުވޭ
އުންމީދު އެތަކެއް ކުރެވުނޭ، އެކުގާ އުޅެން ބުނުމުން މަލާ
އުންމީދު ފުޑުފުޑުވީ މަގޭ، ދޫކޮށް އެދުހު ދިޔުމުން މަލާ
ގަހުގައި ތިމާ ފޮޅިފާވިއަސް، ފިޔަ މޯޅިވުން އަދިވޭ މިލާ
ގަހުގައި ތިހެން އުމުރަށް އިނުން، ނުވެއޭ ތަބީޢަތުގާ މަލާ
ޖެހެމުންއެދާ ވައި ރޯޅިތައް، ގަދަވާނެކަން ވިސްނާ ބަލާ
ޖެހުމުން ތަނޑީގާ ރޯޅިތައް، ފިޔަ ރޫޅިގެން ދާނޭ މަލާ
ތިމާވެއްޓަށް ނަޒަރު ހިންގާ، ޖެހޭ އެކަމާ ފިކުރުކޮށްލަން
ތިމާވެސް ހަމަ އުޅެންޖެހެނީ، ވެށީގާކަން ޖެހޭ ދަންނަން
ގަލާ ވެއްޔާ ނެގީ އެކުގާ، ބިނާކުރުމަށް ޢިމާރަތްތައް
ގަލާ ވެއްޔާ ފަޅުން ނުނަގާ، އިތުރު ގޮތްތައް ޖެހޭ ހޯދަން
ދަންނަވަންތޯއޭ ތެދަށް، ދުލަކީ ލިބުނު ހަތިޔާރެކޭ
ކަންމިހެން އޮތްއިރު އޮތީ، ރައްކާތެރިވެ ތިބުމޭ ތެދޭ
ބަޑިތަކުންނާ ކަނޑިތަކުން، ނޫނަސް ޤަތުލު ކުރެވޭނެޔޭ
އަޑިނުބައި ހިތަކުން ނެރޭ، ވިހަގަދަ ބަހެއް ބުނުމުން ތެދޭ
އަޚުލާޤު ހެޔޮ އަށަގަންނަމާ! އަޅުކަންތަކަށް އިސްކަންދެމާ!
ވަގުތަށް މަސައްކަތް ނިންމަމާ! ވަރުގަދަ ޢަޒުމުގައި ކިޔަވަމާ!
ނިދުމުގެކުރިން ދަތް އުނގުޅަމާ! ނިދަމުން"ޝަހާދު" ކިޔާލަމާ!
ކިޔުމުގެ ގޮތުން ފޮތްހުޅުވަމާ! ފަޖުރުގެ ދެރަކްޢަތް ކޮށްލަމާ!
ރަހުމަތްތެރިން ގެއްލިއްޖެޔޭ، ހަތުރުން ތަކެއް ގިނަވެއްޖެޔޭ
އަޚުވަންތަކަން ނެތިވެއްޖެޔޭ، ނަފުރަތުގެ ހުޅު ރޯވެއްޖެޔޭ
ޤައުމުގެ ދަރިން ނުކުމެއްޖެޔޭ، ކަރުމަރު ހިފަން ރޭވިއްޖެޔޭ
މަގުމަތި ލެއިން ފޯވެއްޖެޔޭ، ރަޙުމާ ކުލުނު ފޮހެވިއްޖެޔޭ
ކޮންމެ ނަފްސެއްވެސް ފަނާވެ، ދިޔުން ވެޔޭ ހަމަ މިބިމުގާ
ދޮންވިއަސް އަދި ކަޅުވިއަސް، ފަރަޤެއް ނުވާނޭ މިކަމުގާ
އޮންނަ ގޮތް ޤުރުޢާނުގައި، ދޮގުކޮށް ހަދާފާ މިތަނުގާ
ކޮންމެ ގޮތަކަށް އުޅުނަކަސް، ނުލައޭ އަޅާ މިޒަމާނުގާ
ކޮންމެހެން މޮޅު މީހަކަށް، ނުމެވާނެޔޭ މަޙްޝަރު ބިމަކު
ބޮންތިއަށް ރުކުގާވި، ވާޞިލްވެވުނަކަސް އަދި މިތަނުގާ
ގޯތިން ނުކުމެ އެތައް ބުރު، ޖަހަމޭ މަތިން ތިގޭ ދޮރު
ބޯ ދިއްކުރަން ގަނޭ ބިރު، ލިބިފާ ނުވާތި ހިތްވަރު
ގޯޅިން ކަލާ ހިނގާ އިރު، ހުރެވޭ ބަލަން ދިމާ ދުރު
ރޯޅިންނެ ވައިޖެހޭއިރު، ގެނުވާ ތިވަސް ވި ނާދިރު
މޯޅިން މިހިތް ލެނބޭއިރު، ދެކިލަން މިހިތް އެދޭވަރު
ކޯޅިން ތި މާ ފޮޅޭއިރު، ބިދެލަން ބެލީމެ އިރުވަރު
ތިއޭ ރޫހީ އުފާ މަ އެދޭ، ގަޔާވާ ޔާރަކީ މިހިތުން
ވިއޭ ހެކިއޭރު ހަނދު ތަރިތައް، ހިތާހިތް ލާމެހިފަ ވެވުމުން
ފެނޭ ތިޔަމޫނު މެރުމުންވެސް، ދެލޯ ގައިމޭ މަގޭ އަމުދުން
ހެނޭ ހީވީ ނަށައިގެންހެން ،މިހިތް ދެއަތަށް ކަލާ ފެނުމުން
ލޮލާމޫނާ ތިކަނދުރާގައި، އެވާ އިޝްޤީ އަސަރުތަކަކުން
ރޮލާވީހިތް މަގޭ ގައިމޭ، ޤަތުލު ކޮށްލީ ކަލާގެ އަތުން
ހިއްމަތާ ގަދަ ހިތްވަރުން، މޮޅުކުއްޖަކަށް މަ ވެދާނަމޭ
ހިތްވަރެއް ކޮށްފާ މިތާ، ރަން ވަނަތަކެއް ހޯދާނަމޭ
ވިސްނަމުން މުސްތަޤުބަލަށް، ބިންގާ އަޅާނީ ހަރުދަނާ
ވިސްނުމެއްގެދަށުން ކަމަށް، ޢަމަލާ ބަހުން އަންގާނަމޭ
ތަނެއްނަމަ ކުރިއަރާދާނީ، ޒުވާނުން ހަރުދަނާ ތިބެގެން
ބިނާ ޤައުމިއްޔަތެއް ކުރުމަށް، އެތަށް ޚިދުމަތް ތަކެއް ކޮށްގެން
ނުވާނޭ ތިޔަ ކަމެއް ބުނެފާ، ނުވާކަމުގައި ހަދާ ދައްކާ
ދުވާ ދުވުމާ އެކީ އެކުގާ، ހަވާނަފްސާއި ދުރުވެވިގެން
ޖަމާޢަތް ކުރިއެރުން އެދިގެން، ޒަމާނަށް ލޯ ދެ ހުޅުވައިގެން
ސަމާލުވެގެން މިތާ ވަޠަނީ، ޖިހާދެއް ހިތްވަރުން ކޮށްގެން