އާދަމް ނަޞީރު އިބްރާހީމް/ތޮއްޑޫ
''މޫސަބޭގެ ކަޅުރަތްހާ" މި މައުޟޫޢުގެ ދަށުގައި އަޅުގަނޑު ތަންކޮޅެއް ކުރީން ފަންވަތުގެ އަހުލުވެރިންނާ ހާދިސާއެއް ހިއްސާކޮށްލީމެވެ. އެ މަޒުމޫނު ވިދާޅުވި ބޭފުޅުން މިހާރު މޫސަބޭގެ މިޒާޖަކަށް ބީރައްޓެއްސެއް ނޫން ދޮގެއްތޯއެވެ؟ މޫސާބޭގެ ވައްޓަވާޅިއާއި ދިރިއުޅުމުގެ ގޮތްބާވަތް ތަޞައްވުރުކޮށްލައްވާކަށް ދަތިފުޅެއް ނޫން، އެހެން ނޫންތޯއެވެ!
މި ފަހަރުގެ މި ފަތްފުށުގައި ވެސް މިހިމަނާލަނީ އެ މޫސަބޭގެ ވާހަކަ އެކެވެ. އެނގިވަޑައިގަންނަވާނޭ ފަދައިން އެ މޫސާބޭ އަކީ، ވަރަށް ތަފާތު މިޒާޖެއްގެ މީހެކެވެ. އުޅުންތެރި މަސައްކަތްތެރިި މީހެކެވެ. ކާބަފައިންގެ އާދަކާދަތަކާއި ގޮތްފޮތް ދަމަހައްޓަން ފިސާރި ވަރު ހުންނަ އަބުއި މީހެކެވެ. މާބޮޑު ތަޢުލީމެއް ލިބިފައިނެތަސް ދުނިޔޭގައި ހިނގާކަންކަމާމެދު ފިކުރުހިންގައި އެކަންކަމާބެހޭ މަޢުލޫމާތުތައް ހޯދުމަށް ވެސް ޝައުޤުވެރިކަން ބަހައްޓާ މީހެކެވެ.