މިއީ، ފަޟީލަތުއްޝައިޚު އަޙުމަދު ފަހުމީ ދީދީ ލިއުއްވާފައިވާ ފޮތެކެވެ. ފަންވަތުގެ ކިއުންތެރިންނަށް، މި އަގުބޮޑު ޢިލްމީ މަސައްކަތް ހަދިޔާކުރެއްވި ކަމަށްޓަކައި، ފަންވަތުގެ ކިއުންތެރިންނާއި ހިންގުންތެރިންގެ ފަރާތުން، އޭނާއަށް އިޚުލާޞްތެރި ޝުކުރު ދަންނަވަމުއެވެ.

ތިންސަތޭކަ ޞަފުޙާގެ މައްޗަށް އެކުލެވޭ، މި ޢިލްމީ ފޮތް، ފަންވަތުގައި ޝާއިޢުކުރަމުން ގެންދާނީ ކިއުންތެރިންނަށް ވިދާޅުވާން ފަސޭހަވާނެހެން، މިފޮތް ބައިބަޔަށް ބައިކޮށްގެންނެވެ. މި ބައިގައިވާނީ، ފޮތުގެ ފެށުމެވެ.

ތަޢާރުފު
خالد އަކީ، ބަނީ އުމައްޔާގެ ޝާހީ ޚާންދާނުގެ ބޭފުޅެކެވެ. ތަރުބިއްޔަތު ލިބިވަޑައިގަތީ، ޝާހީ ގަނޑުވަރުގަ އެވެ. ތަޢުލީމާއި ތަރުބިޔަތު ވަރަށް ރަނގަޅަށް ޙާޞިލުކުރެއްވި އެވެ. ޚާލިދު ޝައުޤު ވެރިވެ ވަޑައިގަތީ، ޢިލްމީ ދާއިރާއަށް (ސައިންސަށް) ކަމުގައިވާތީ، ވެރިކަމާބެހޭ އެއްވެސް ކަމެއްގައި މަޝްޣޫލުވެ ވަޑައެއް ނުގަންނަވަ އެވެ. މީނާއަށް ވެރިކަމަށް ބައިޢަތު ހިފުނެވެ. ނަމަވެސް އެ ކަމުން އޭނާ އެއްކިބާވެ ވަޑައިގަތެވެ.