ޅެމަކާއެކު ވަގުތުކޮޅެއް ހޭދަކޮށްލުން: ޢައްލާމާ އިޤްބާލުގެ މަލާއިކަތުންގެ ލަވަ، މިޅެމުގެ ކިޔައިލުމެއް
ޑރ. ޢަބްދުލްޣަފޫރު ޢަބްދުއްރަޙީމް
ސުރުޚީގައި ބަޔާންކުރެވިފައިވާ ފަދައިން، އަދުގެ ވާހަކަކޮޅު ގުޅެނީ ޅެމަކާއެވެ. ފަލްސަފީ ޅެންވެރިޔެއްގެ ގޮތުން މަޝްހޫރުވެފައިވާ ޢައްލާމާ އިޤްބާލުގެ ޅެމަކާއެވެ. ޅެމާއި ޅެމުގެ ތަރުޖަމާއަކާއި ޅެމުގެ މަޒްމޫނު، އޭގައި އެކުލެވޭ ޖުމްލަ މާނަ، ހުށަހަޅާލައި ޅެމުގެ މައްޗަށް ކަޅިއެއް އެއްލުމުގެ ކުރިން، އެންމެ ފުރަތަމަ ޅެމާ ބެހޭ ގޮތުން އެއްޗެއް ބުނެލަން ބޭނުންވެއެވެ. ޅެމާ ބެހޭ ގޮތުން އެއްޗެއް ބުނަން ބޭނުންވަނީ ޅެމުގެ ތަޢުރީފު، ޅެމަމީ ކޮބައިކަން، މި ކަންކަމާ ބެހޭ ގޮތަކުންނެއް ނޫނެވެ. ނުވަތަ ޅެމުގެ ސޫރަ، ބޭރު ފުށް، މި ކަންކަމާ ބެހޭ ގޮތުންނެއް ވެސް ނޫނެވެ. މިއަދު، މި މަގާމުގައި، ޅެމާ ބެހޭ ގޮތުން ފާހަގަކޮށްލާން ބޭނުންވަނީ ޅެމުގެ ތަރުބަވީ ދައުރާ ބެހޭ ގޮތުނެވެ. ވިސްނުމާއި ފިކުރުކުރުން ކުރިއެވުމަށް ޓަކައި ޅެން އަދާކުރާ ތައުލީމީ ދައުރާ ބެހޭ ގޮތުންނެވެ.